غزل
منیرنیازی
کسے نوں اپنے عمل دا حساب کیہ دئیے
سوال سارے غلط نیں جواب کیہ دئیے
اْنیندرے کئی صدیاں دے خالی اکھاں وچ
انہاں بے انت خلاواں چ خواب کیہ دئیے
ہواواں وانگ مسافر نیں دلبراں دے دل
انہاں نوں اِکو جگہ دا عذاب کیہ دئیے
اجے سمجھ نہیں حرفاں دی رمز دی اوہنوں
تے ایس عمرے اوہدے ہتھ وچ کتاب کیہ دئیے
شراب منگ دا اے جی اج شرع دے پہرے وچ
پر ایڈی تنگی وچ ایہنوں شراب کیہ دئیے
Load/Hide Comments