غزل

انور اُداس

لُوں لُوں اوہدا عشق رچا کے نگری نگری پھریا
میں گل سُوہا بانا پا کے نگری نگری پھریا
اج توڑی نہ کِدھرے وی تعبیراں ملیاں مینوں
میں اکھّاں وچ خواب سجا کے نگری نگری پھریا
چانن چاہوَن والے مینوں لوک نہ دِسّے کِدھرے
میں ہتھّاں تے دِیپ جگا کے نگری نگری پھریا
جیہڑا ایتھے بھیس وٹائی پھر دا اے ہر ویلے
میں اوہدے لئی بھیس وٹا کے نگری نگری پھریا
مِریاں اکھّاں ساہنویں خورے کِنّے سُورج ڈُبّے
میں کِنّے دُکھ سینے لا کے نگری نگری پھریا
اج اوہنے وی زہری سپّاں وانگوں مینوں ڈنگیا
میں کل جیہنوں موڈھے چا کے نگری نگری پھریا
جگ وِچ مینوں تھاں نہ لبھّی دفناون لئی انورؔ
میں اپنا تابوت اُٹھا کے نگری نگری پھریا