نعت رسولؐ مقبول

عبدالمجید چٹھہ

جدوں ویکھاں گنبد خضریٰ نوں‘ میرے دل نوں سکون آ جاندا اے
اکھیاں وی ناز کریندیاں نیں‘ غم کوئی وی کول نہ آندا اے
لکھاں قدسی مدینے آندے نیں خادم وی برابر جاندے نیں
بے مثل مدینے دیاں گلاں رب روز نہ ہور بناندا اے
معراج دا ویلا آیا سی عرشاں تے آپ بلایا سی
اے آمنہؓ تیرے بچڑے دے رب آپ وی ناز اٹھاندا اے
کئی آساں لے کے آیاں نیں بچے لے کے ٹریاں دائیاں نیں
جدوں سعدیہؓ لال اٹھایا سی پھُل خوشیاں دا مسکاندا اے
کراں ذکر خدا دی عظمت دا کھلیا دروازہ رحمت دا
ہووے ذکر محمدؐ عربی دا من واری واری جاندا اے
خالق نے خزانے بنائے نیں‘ کئی لکھ پیغمبر آئے نیں
ہتھیں آپ محمدؐ ونڈدے نیں پیا سارا ای جگ کھاندا اے
دامن تے مجید دا پھٹیا اے دکھاں نال اے سینہ اٹیا اے
میں مچھلی وانگ تڑپنا واں‘ جدوں یاد مدینہ آندا اے