جناب عثمان بزدار نوں سلام

موجودہ حکومت ولوں پولیس دی چنگی کارکردگی نوں سراہیا جانا قابل ستائش اے

عتیق انور راجہ

عید توں کجھ دن پہلے خبر سنن وچ آئی کہ پنجاب پولیس نے بدنام زمانہ ڈاکو، تے سفاک قاتل لادی گینگ دے سربراہ خدا بخش نوں پلس مقابلے وچ پار کر دتا۔ لادی دے ناں توں شہرت پان والا ایہہ ڈاکو پہلے نکی موٹی چوریاں تے موٹر سیکل کھون جہیاں وارداتاں کیتا کردا سی، پر فیر لادی گینگ دا ناں اغوا، بھتا خوری تے دیگر وارداتاں وچ وی ساہمنے آن لگیا۔ پولیس اک مدت توں ایس گینگ نوں راہ راست اُتے لیان دیاں کوششاں کر رہی سی۔ ایس گینگ دے خلاف وڈے اپریشن دی تیاری ہو رہی سی کہ لادی گینگ نے سوشل میڈیا اُتے دو لوکاں نوں بیدردی نال قتل کردے ہوئے ویڈیو بنا کے شیئر کر دتی جس دا وزیر اعلیٰ، پنجاب سردار بزدار نے سخت نوٹس لیا تے علاقے دی پولیس فورس نوں ایہناں ڈاکوئواں دے خلاف موثر کاروائی کرن دا حکم جاری کیتا۔ ایس حکم نامے دے کجھ ای دناں بعد آئی جی پنجاب انعام غنی نے میڈیا نوں دسیا کہ لادی گینگ دے سربراہ خدا بخش اپنے 10 کارندیاں سنے مارے جا چکے نیں۔ ایس خبر نال نہ صرف علاقے دے لوکاں نے سکھ دا ساہ لیا ہوئے گا بلکہ باقی صوبے دے عوام دے اندر ایہہ احساس مضبوط ہویا ہوئے گا کہ ساڈی حکومت تے حکومتی محکمے عوام دے جان و مال دے تحفظ لئی تیار نیں۔ ایہہ اک حقیقت اے کہ انج دے گروہ اک دو بندیاں دے بل اُتے ای قتل و غارت کردے نیں تے سردار دے مارے جان دے بعد روپوش ہو جان دی کوشش کردے نیں۔ وزیراعلیٰ پنجاب عثمان بزدار اک عرصے توں پنجاب پولیس نوں شہریاں دے تحفظ لئی بروقت اقدامات کرن دی گل کردے چلے آ رہے نیں تے اسیں ویکھ رہے آں کہ ایس حکومت دے دور وچ کجھ واقعیاں دے علاوہ پولیس سیاسی دبائو توں آزاد نظر آ رہی اے۔ ہن کجھ دن پہلے خبر سنی کہ لہور پولیس چیف نے سب تھانیداراں نوں حکم نامہ جاری کیتا کہ اوہ اپنے علاقے دے ہر چارج شیٹ بدمعاش نوں پابند کرن کہ اوہ تھانے حاضری لگواندا رہوے۔ انج ہون نال یقیناََ بدمعاشیاں دا زور ٹٹن لگے گا تے اوہ اپنی اصلاح کر کے معاشرے نوں کسے قسم دا نقصان اپڑان توں باز رہن گے۔ موجودہ حکومت ولوں پولیس دی چنگی کارکردگی نوں سراہیا جانا قابل ستائش اے تے یقینا ایسے لئی پچھلے دو تن ورھیاں وچ پنجاب پولیس دی کارکردگی وچ بہتری ہوندی نظر آ رہی اے۔پنجاب پاکستان دا دل اے جے پنجاب وچ امن و امان دی فضا بہتر ہوئے گی تے پورے ملک وچ چنگا تاثر جائے گا۔ اک پاسے عام شہریاں نال بہتر سلوک کیتا جائے تے دوجے پاسے معاشرے نوں جرائم پیشہ بندیاں توں پاک کرن لئی ڈاکوئواں، راہزناں، بھتہ خوراں تے چوراں دے خلاف جارحانہ پولیسنگ دا آغاز کرنا ہوئے گا، جے صوبے نوں امن و امان دا گہوارہ بنانا اے تے پنجاب پولیس نوں حکومتی اداریاں ولوں مکمل سپورٹ ملدی رہنی چاہیدی اے۔
وزیراعلیٰ پنجاب عثمان بزدار صاحب اپنیاں بیگانیاں دے سبھی تیر خندہ پیشانی نال جھیل رہے نیں۔ یقیناََ ایہو ایہناں دی کامیابی اے کہ اوہ مخالفین نال الجھن دے بجائے عوامی مفاد دے منصوبیاں ول دھیان دے رہے نیں۔ سابق حکومت دے بارے وچ کہیا جاندا سی کہ ایہناں دی ساری توجہ لہور اُتے ای اے پر ہن وزیراعلیٰ پنجاب سردار عثمان بزدار کوشش کر رہے نیں کہ ترقی دے ثمرات سارے صوبے وچ نمایاں ہو کے نظر آن۔ خدا دا شکر اے کہ وزیراعلیٰ تبدیلی دی افواہواں ہن دم توڑ چکیاں نیں۔ ہن وسیم اکرم پلس، جناب عثمان بزدار توں ایہہ توقع کیتی جا سکدی اے کہ اوہ لائن لینتھ اُتے قابو پاندے ہوئے تیز بائونسر وی مارنا شروع کر ن گے۔ یعنی اک پاسے پنجاب وچ ترقیاتی کم ہوندے نظر آن لگن تے دوجے پاسے مخالف سیاسی پنڈتاں دے حربیاں دا موثر جواب وی دتا جائے گا۔ امید قوی اے کہ پنجاب دے لوک اک بہتر ، خوشحال تے محفوظ زندگی لنگھان دے قابل ہو جان گے۔ پنجاب دےجنوبی حصے دی بدلدی ہوئی صورتحال دے بعد اوتھے دے جاگیردار تے وڈیریاں لئی اپنی بادشاہت باقی رکھنا مشکل ای نہیں ناممکن ہوندا چلیا جائے گا۔ ایسے لئی اوہ سب مل کے اک وار فیر وکھرے صوبے دا مطالبا کرن گے۔ عوام دی فلاح لئی نہیں بلکہ اوہ صرف ایس علاقے نوں پسماندہ رکھدے ہوئے اپنا ووٹ بینک، اپنی بادشاہت بچان دی کوشش کرن گے۔ نقطے دی گل تے ایہہ وے کہ جے ترقی دا سفر نکے صوبے بنان نال ممکن اے تے بلاول زرداری توں ایہہ کیوں نہیں پچھیا جاندا کہ سندھ جتھے پچھلی کئی دہائیاں توں پیپلز پارٹی اقتدار دے مزے لُٹدی چلی آ رہی اے اوہ سندھ اج وی باقی ملک توں 50 ورہے پچھے کیوں اے؟ میں تے وزیراعلیٰ پنجاب سردار عثمان بزدار نوں سلام پیش کرنا واں جنہاں نے پنجاب وچ امن و امان دی فضا نوں پہلے توں کدھرے بہتر بنان لئی موثر اقدامات کیتے نیں۔