غزل

زین جٹ

الفت دیاں باغاں چ کدے خار نہ اپڑے
اس امن دی وستی کوئی تلوار نہ اپڑے
سدے کسے مشکل چ جدوں یار میں اپنے
بن دے سی وفا دار مرے یار ،نہ اپڑے
کل رات غریباں دے گھریں اگ دے سی شعلے
سڑدے رہے مسکین تے سردار نہ اپڑے
لکھ روپ بدل کے مرے گھر آئی سی غربت
جنے سی اداکار مرے یار،نہ اپڑے
سر میرا اتر جائے نہیں پرواہ مینوں یارو
دربار دے تیکر مری دستار نہ اپڑے
دن رات دعاواں نیں مری زین زباں تے
اس سانجھ دے ویڑھے کدے دیوار نہ اپڑے