کافی
گلفام نقوی
نہ میں اندر پانی تکیا نہ میں بنیا بوکا
نہ کوئی بھانڈا کول میں رکھیا نہ کوئی ونجھ وجھوکا
اینویں دکھ سہیڑے ویلے کھوہ پئے گیڑے
ویہڑے ویہڑے‘ فالاں پاواں نال سیاں میں لبھاں
تھک تھک حال بے حالی ہوواں خورے ہور کیہ لبھاں
اینویں دکھ سہیڑے ویلے کھوہ پئے گیڑے
کر برباد میں ویلا بیٹھی اینویں جگ ہسایا
گھر دے رستے بھل کے سب کجھ ہتھیں آپ گوایا
اینویں دکھ سہیڑے ویلے کھوہ پئے گیڑے
اینویں ساں میں جھلی ہوئی جوگی سی ایہہ دس دا
رکھ خبر اس رانجھن دی جو تیرے وچ ہے وسدا
اینویں دکھ سہیڑے ویلے کھوہ پئے گیڑے
Load/Hide Comments