غزل
منصور عزمی
آساں نوں پرچائونا ائوکھا
جاگدے خاب سوائونا ائوکھا
خورے کیہڑا راہ بھُل جاوے
کوٹھیوں کاگ اُڈائونا ائوکھا
رَبّ سبَبّیں پین وچھوڑے
ہتھیں یار گوائونا ائوکھا
روندے دل نال بُلھیاں اُتے
ہاسے یار سجائونا ائوکھا
اَمرت جِس پیایا ہووے
اوہنوں زہر پلائونا ائوکھا
ایویں اُچّا بول نہ بولیں
لا کے توڑ نبھائونا ائوکھا
لنگھے ویلے نوں عزمیؔ اج
واجاں مار بُلائونا ائوکھا
Load/Hide Comments