افغانی بالاں دا خط

بابا نجمی

آل اولاداں والیو لوکو
اچیاں محلاں دے وسنیکو
ساری دنیا دے پردھانوں
سچے ہیرے جہے انسانو
دکھی دنیا دے ہمدردو
سارے جگ دے اللہ لوکو
دانشورو، وکیلو، ججو
ساڈے دل دا دکھ سنو
روندی ساڈی ککھ سنو
دل تے لکھو صدما ساڈا
رل کے لڑو مقدما ساڈا
اسیں نمانے آہلنیاں چوں
ڈگے نہیں ساں
کڈھے گئے ساں
اکھاں کھلن نالوں پہلاں
دکھاں دے کھوہ سٹے گئے ساں
کتھے کہڑے جمن والے
رب ای جانے
بم دھماکے یاد نیں سانوں
اپنے فاقے یاد نے سانوں
ساہواں باجھوں ساڈے پلے
کجھ وی نہیں جے
اتے تھلے کجھ وی نہیں جے
ساڈے نالوں چنگے کتے
جہڑے اپنی جوہ اچ سُتے
گندگی والے ڈھیراں اُتوں
پھڑ پھڑ تہاڈے جھوٹھے ٹکر
کہڑے جرم چ کھانے پئے نیں
سانوں تہاڈے بالاں والے
پاٹے لتھے پانے پئے نیں
فر کوئی سنیا طاقت والا
وچ نشے دے
اپنے نال اتحادی لے کے
ست سمندر پاروں آیا
بیڑے وچ برود لیایا
لمیاں فوجاں لے کے چڑھیا
دھکو دھکی ساڈی
دھرتی اندر وڑیا
ساڈے شہر اجاڑی جاوے
جھگے جھگیاں ساڑی جاوے
بمباں دے نال ساڈی جوہ دا
چپا چپا زخمی کیتا، مستقبل دا لہو اے پیتا
ساڈے کولوں ہتھ جڑا لو
سانوں اپنے پیر پھڑا لو
اگے ودھ کے ڈکو ایہنوں
ساڈی جوہ چوں کڈھو ایہنوں
اسیں وی اپنے گھر نوں جائیے
اجڑے اپنے شہر وسائیے