بچے وکدے ویکھ لئے

ڈاکٹر الیاس عاجز

ڈھڈ دی اگ بجھاون پاروں گل وچ پھندے ویکھ لَئے
آٹا چینی لین دے پاروں متھے رنگے ویکھ لَئے
دھی دے ساک دی جھٹ پٹ مورکھ ایویں ہاں کر دتی سی
سٹھ سالہ اس بابے دے جد پیلی بنّے ویکھ لَئے
پٹھیاں سدھیاں سوچاں سوچن نال شریکاں مرنا نہیں
دوڑاں لا لا کوٹ کچہری بوتھے اڈے ویکھ لَئے
چھوٹا موٹا جھگڑا یارو اپنے گھار مُکا لیناں
تیجا بندہ آ وڑدا تے پیندے پھڈے ویکھ لَئے
ایکا ساڈا ہویا نہ تے جُثے خاک ہو جانے نیں
اپنے ملک چہ نفرت دے میں بھانبھڑ مچے ویکھ لَئے
ڈاکو چور لٹیرے تے مشٹنڈے ساڈے رہبر نیں
ماڑے لئی قانون بنا کے آپی لگے ویکھ لَئے
عاجز کوڈی مُل نہیں پانا شہر دے حاکم ظالم نیں
دو سیر آٹے مگروں ہر تھاں وِکدے بچے ویکھ لَئے