غزل
کرم علی کیفی
دار چڑھن تے اوہدا حال پچھاں گا
طاقت نوں کنج آیا زوال پچھاں گا
گھیر کے بندوقاں وچ عقلاں والیاں نے
کسراں کیتے حل سوال پچھاں گا
رسیاں دے وچ بدھا قیدی نکل گیا
چوہے کسراں کٹیا جال پچھاں گا
سیاست وچ آ کے فیر سیاست داناں نوں
کسراں چلی دی اے چال پچھاں گا
جدوں ریٹائر ہوویں گا میں گھر آ کے
لنگھیا کسراں پچھلا سال پچھاں گا
رتبہ ملیا تے میں دولت والیاں نوں
کیویں بنایا سارا مال پچھاں گا
تگڑا وی سی خودکش حملہ کیفی جی
بچیا کسراں بال بال پچھاں گا
Load/Hide Comments