بھراواں دے عالمی دیہاڑ تے

فریدہ خانم

ویرا ویکھیں چھڈ نا جانویں
توں نا مٹی وچ سمانویں
کہنوں ویر میں سداں گی فیر
کہدیاں راہواں تکاں گی فیر
تیری بہن اکلّی ویرا
کِس تے آساں رکھّاں گی فیر
ویرا میرے درد ونڈاویں
ویرا ویکھیں چھڈ نا جانویں
توں نا مٹی وچ سمانویں
دُکھاں کولوں کون بچاوے
سر دے اْتّے چدر پاوے
میریاں ریجھاں پوریاں کر کے
کہڑا میرے لاڈ لڈاوے
ویرا رشتہ توڑ نبھاویں
ویکھیں ویرا چھڈ نا جانویں
توں نا مٹی وچ سمانویں
بہن بھرا دا رشتہ اولڑا
بالکل ماں تے پتر ورگا
میری ممتا تڑفدی اے ہنڑ
میریاں سن لے میرے ربّا
ویر دے دکھ نا مینوں وکھاویں
ویکھیں ویرا چھڈ نا جانویں
توں نا مٹی وچ سمانویں
چین مینوں اِک پل نی ہے گا
دل میرا اے تڑفدا رہندا
نِت میں تیریاں خیراں منگاں
میرے لباں تے ایہو رہندا
کدی نا تتّی وا تْوں کھاویں
ویکھیں ویرا چھڈ نا جانویں
توں نا مٹی وچ سمانویں
اوہ جنہاں دے بھرا نئیں ہوندے
مغر اوہناں دے کتے ہوندے
ربّا! رکھیں ویر سلامت
ویر بڑے ای پیارے ہوندے
ایہناں نوں نا دور لجاویں
ویکھیں ویرا چھڈ نا جانویں
توں نا مٹی وچ سمانویں
خانم دی توں جان وی کڈھ لے
مینوں اپنے کول توں سد لے
میرے ویر دے ساہ ودھادے
ربّا میریاں ہاواں سْن لے
ربّا! میری آس پْجاویں
ویکھیں ویرا چھڈ نا جانویں
توں نا مٹی وچ سمانویں