غزل

جان کاشمیری

رنگ برنگا سدھراں بھریا ورقہ ورقہ پھاڑی جاؤ
اکھاں دے وچ پے گئے ککرَے فیر وی دلبر تاڑی جاؤ
کپڑے لَتّے ، بستے کتاباں بھانڈے ٹینڈے ایرہ وغیرہ
مینہ توں پہلاں جھلانی اندر وڑدا جو وی واڑی جاؤ
عشق سلامت حُسن سلامت، حُسن سلامت عشق سلامت
دونویں رستے کھلّم کھلّے اگاڑی جاؤ پچھاڑی جاؤ
دل دا کاغذ، اَکھ دی کُلّی، غم دی تلائی، روح دی جُھلّی
سچّے عشق دا مچ اے بھخیا سڑدا جو وی ساڑی جاؤ
سارے چنگے طور طریقے مِنٹو مِنٹی سمجھاوے گا
مشکل ویلے کم آوے گا لے کے نال کھلاڑی جاؤ
مِٹیو مٹّی ملبے تھلّے جد وی مَردے ماڑے مَردے
سارے ردّے درد دے لگّے وَس دا شہر اجاڑی جاؤ
جانؔ بچا کے جا نئیں سکدا اپنی کُھڈ نوں پا نئیں سکدا
سپ اے لُکیا جھاڑی اندر، جھاڑی جھاڑی جھاڑی جاؤ