غزل

انورمسعود

پلکاں اتے اتھروواں دے دیوے بالی رکھاں
کجھ تے گھپ ہنیرے اندر چانن لائی رکھاں
مدتاں ہویاں مکدا نہیں ایہ لْک چھپ جانا تیرا
ہور کدوں تک بیبا ہن میں اکھیاں میٹی رکھاں
بجلی جیہڑی لشک مریندی اسدیاں کیہ تدبیراں
نِریاں کنیاں وسن تے میں ہتھ وچ چھتری رکھاں
بخت مرے دی تختی اتے لکھو تسی جو چاہو
میں کیہڑا میں کون کسے دی حرف تے انگلی رکھاں
کوئی بھرم نہ مینوں بھانویں میں مقبول نہ ہونواں
میرے کولوں ہو نہیں سکدا سب نوں راضی رکھاں
رہوے خیال ہمیشہ مینوں فکر سخن دے ویلے
خاصاں دی گل کراں میں انور طرز عوامی رکھاں