غزل

عمران سلیم

ترے غرور دی ایسی سزا دیاں تینوں
دکھا کے آئینہ پتھر بنا دیاں تینوں
غماں دی جوک ترے دل نوں آپ چمڑے گی
ترے جیہا ای جے کوئی ملا دیاں تینوں
کویں تلی تے جماندے نیں لوک سرسوں نوں
ایہہ شعبدہ جدوں چاہویں وکھا دیاں تینوں
مرے بغیر مکمل نہ ہو سکیں توں وی
میں اپنی ذات دا حصہ بنا دیاں تینوں
سنبھال رکھے نیں میں تے گلاب یاداں دے
کہویں تے کھول کے سینہ دکھا دیاں تینوں
خدا کرے نہ رہوے دل نوں جاچ دھڑکن دی
سلیمؔ بھل کے جے دل توں بھلا دیاں تینوں