پنجابی ہور برداشت نہیں کرن گے

مدثر اقبال بٹ

پنجاب دی مٹی وچ محبت دی تاثیر اے۔ایہہ خطہ نفرتاں نہیں پالدا۔ہمیشہ دوجیاں نوں محبتاں ای ونڈدا اے۔ایس مٹی نے کدی وی پنجابی تے غیر پنجابی وچ فرق نہیں رکھیا۔کوئی پٹھان آیا تے اونھوں وی گل نال لایا،جے کوئی سندھوں آیا تے اوہدے اُتے وی محبتاں نچھاور کیتیاں۔بلوچ ہون یا کشمیری،پنجاب نے ہمیشہ اونھاں نال محبتاں تے دکھ سکھ سانجھے کیتے نیں۔پر ایہدے بدلے پنجاب نوں ہمیشہ نفرتاں تے منافقتاں ای لبھیاں۔ساڈے تعلیمی ادارے ہون،فیکٹریاں یا منڈیاں۔تسیں ویکھو،ہر تھاویں دوجے صوبیاں توں آئے بھرا برابری دی بنیاد اتے کم کردے نظر آون گے۔کیہ دوجے صوبیاں وچ وی انج ای؟۔۔۔جیویں ساڈے تعلیمی اداریاں وچ پختون تے بلوچ طالب علماں لئی کوٹے نیں،کیہ اوتھے وی پنجابیاں نوں ایسے طرحاں محبتاں بھرے رویے ملدے نیں؟
تہانوں ایہدا جواب بلوچستانوں آئیاں پنجابی مزدوراں دیاں لاشاں دین گیاں،اوہ لوک جیہڑے وچارے اپنے بالاں لئی رزق روٹی کماون گئے تے صرف ایس کر کے مار دِتے گئے کہ اوہ پنجابی سن۔یافیر اوہ جیہڑے کے پی وچ کاروبار کرن گئے تے ایس کرکے ظلم دا شکار ہوئے کہ اونھاں دا تعلق پنج دریاواں دی دھرتی نال سی۔سندھیاں دا تعصب وی کجھ گھٹ نہیں۔پنجابی نال نفرت بھرے لہجے آپ بولدے نیں کہ اونھاںنوں پنجاب نال کنھی نفرت اے۔
سجنو تے مترو!
میرا مقصد ہر گز نفرتاں پھیلاونا نہیں،تے نہ ای میں لسانی بنیاداں اُتے تفریق دا قائل ہاں،میں تے صرف اوہ حقیقت دس رہیاں جیہڑی پنجابیاں نوں ایہہ سوچن اُتے مجبور کررہی اے کہ ہن وی ویلا اے،اَکھاں کھولو تے اپنے پنجاب نوں اوہدا حق دوان لئی ہر فورم اُتے آواز چکو۔۔۔۔
اج دی گل دا مقصد،بلاول زرادری دی اوہ نویں بکواس اے جیہڑی اوس پنجاب بارے کردیاں آکھیا اے کہ پنجابی سندھ دا پانی چوری کررہے نیںجیہدے پاروں سندھ وچ مسئلے ودھ رہے نیں۔حالانکہ سچ ایہہ ہے کہ پنجاب اپنے حصہ دا پانی سندھ نوں دے رہیا اے۔ اپنیاں زمیناں بنجر کرکے سندھیاں دیاں زمیناں آباد کررہیا اے پر فیر وی سندھ ولوں خیر دی کوئی گل نہیں سنیندی۔ایس توں پہلاں تہانوں ایہہ وی یاد ہووے گا کہ جد وںکرونا وائرس ودھ رہیا سی تے سندھ حکومت ولوں پنجاب نال آمدورفت اُتے پابندی لاکے ایہہ تاثر دین دی کوشش کیتی گئی سی کہ جیویں کرونے دی تریجی لہر دا سبب پنجابی ای نیں۔
مراد علی شاہ سنے سندھ دے وزیراں پنجاب بارے بہت زہر اگلیا،جیہڑا ساڈے میڈیا نے وکھان توں اجتناب ورتیاجیویں ایہناں دی بکواس ساڈے تیکر نہیں اپڑے گی۔پنجابی ہون دے ناطے میں دوجے صوبیاں دی ہمیشہ عزت تے احترام وچ کدی ڈنڈی نہیں ماری۔ اسیں پنجابیاں بلاول دے نانے بھٹو نوں سر اکھاں اُتے بٹھایا،اونھوں عزت دتی، وزیر اعظم بنایا تے فیر جد وںبھٹو اُتے اوکھا ویلا آیا تے اسیں پنجابی ہی اوہدے نال کھلوتے۔بلاول دی ماں،بے نظیر نوں وی اسیں وزیر اعظم بنایا تے اوہدے وی پچھے کھلوتے۔ایس دے باوجود کہ بی بی مرحومہ نے ہمیشہ پنجاب دی نندیا کیتی تے سیاست وچ لسانی تعصب نوں ہوا دتی۔اسیں پنجابیاں برداشت وی کیتا تے اوہدی عزت وچ وی کمی نہیں آون دتی۔
فیر بی بی شہید ہوئی تے اسیں آصف زرداری دی پیپلز پارٹی نوں وی حاکمی دی راہے پایا۔بدلے وچ زرداری تے اوہدے حواریاں پنجاب دی ونڈ دا چھرا گھونپیا۔اسیں فیر وی برداشت کیتا تے ایہہ نہیں آکھیا کہ سندھی فطرتاًاحسان فراموش تے کھاپی کے حرام کرن والے ہُندے نیں،اسیں تے گلہ وی نہیں کیتا۔
میرے پنجابی بھراواں بی بی دے پُتر بلاول نوں وی بڑی عزت دتی،حالانکہ اوہدے خاندان نے ساڈے کساناں دیاں فصلاں بنجر کیتیاں۔ساڈا پانی لے کے،سانھوں ای گالہاں کڈیاں تے کالاباغ جیہے منصوبے نوں صرف اور صرف اپنی سیاست چمکاون لئی برباد کر دِتا۔ اسیں فیر وی برداشت کیتا تے ایہو ای آکھیاکہ کوئی گل نہیں،ساڈے پاکستانی ویر نیں،ساڈا دُکھ سکھ سانجھا اے،اَج بھٹک گئے نیں تے کل سدھے راہے وی آ ای جان گے۔پر اسیں انجان ساں کہ راہ بھلییا تے سدھے راہے آجاندا اے پر جیہڑا نفرتاں پالن دی راہ چُن لوے اوہ کدی تہاڈا سگا نہیں بنے گا۔پنجاب دی ونڈ دی گل کرن والے ایہہ سندھی سیاستدان،جیہڑے سندھ دی ونڈ دا ناں سُن کے وڈھن نوں پیندے نیں حالانکہ حالات ویکھو تے سندھ نوں پنجاب توں ونڈ دی زیادہ لوڑ اے،پر سیاسی گٹردے ایہہ گندے کیڑے اپنے مفاداںاُتے مبنی پنجاب دشمنی توں وکھ کچھ سوچن نوں ای تیار نہیں۔
میں کدی وی ایس حد تک قوم پرستی دا قائل نہیں کہ ایہہ نفرت بن کے اپنے ای ملک دیاں جڑاں کھوکھلیاں کرن لگ پئے۔میں ہمیشہ اپنے حقاں نال برابری دی گل کیتی اے۔میں ہمیشہ سندھی،بلوچ تے پٹھان نوں عزت دتی تے اونھاں نال اپنا دستر خوان سانجھا کیتا، پر ہن میرا صبر جواب دے رہیا اے۔میری برداشت تے ہمت جواب دے رہی اے۔۔۔پنجابیاں نوں ایہناں نہ ستائو کہ اوہ وی اُنج دا رویہ اختیار کرن جیہڑا اج سندھ یا بلوچستان چے پنجابیاں نال روا رکھا جارہیا اے۔پنجابیاں دے حق کھوہ کے پنجابیاں نوں گالہاں کڈھیاں جارہیاں نیں۔ایہہ رویہ ہن مزید نہیں چلے گا۔پنجابی سب نال پیار کردے نیں،اونھاں دے مان سمان دا خیال رکھدے نیں،تسیں بدلے وچ پنجابیاں نوں اونھی محبت واپس نہیں کر سکدے تے گھٹو گھٹ اپنے اندر دیاں نفرتاں تے کرودھ نوں تے قابو رکھو۔جے احسان دا بدلہ نہیں دے سکدے تے کم ازکم ڈنگ تے نہ مارو۔۔۔۔
میں خاص طور تے پیپلز پارٹی دے آگوواں نوں آکھاں گا کہ ایس جماعت نو ںاُسارن والے پنجابی سن،جیہدوں تیکر تسیں پنجاب دا احترام کیتا تہاڈا ستارہ عروج تے رہیا تے جد تسیں پنجاب نال نفرت دا رشتہ بنا کے محسن کشی دی راہ اختیار کیتی،اوہدوں دی ذلالت تہاڈا مقدر بنی ہوئی اے۔تے جے اگے وی تسیں پنجاب تے پنجابیاں بارے انج ای بھونکو گے تے فیر پنجابی وی چپ نہیں رہن گے۔تہانوں جواب وی دین گے تے تہاڈا علاج وی چنگی طرح کرن گے۔۔۔میں اک واری فیر عرض کردا ہاں کہ پنجابیاں نوں پریشان نہ کرو،اسیں نہیں چاوہندے کہ ماحول خراب ہووے۔تے جے تہانو ں اپنے اندر موجود پنجاب دشمن کیڑے اُتے کنٹرول نہیں تے فیر اسیں اوہدا چنگی طرح علاج کردیاں گے۔
پنجاب نال پیار کرن والیاں نوں ہزاراں سلاماں تے پنجاب نال بغض رکھن والے کتیاں اُتے لکھ لکھ لعنتاں۔