چھوٹی گل ودھا کے بیان کرنا

تحریر حمیداللہ بھٹی

حکومتی دعوے دے مطابق معاشی گروتھ 3.9 اے ایہہ دعویٰ قومی و عالمی اداریاں دے اندازیاں دے برعکس تے زائد اے حکومتی دعوے دی غیر جانبدار ذرائع تصدیق نہیں کردے ایسے بنا اُتے فہمیدہ حلقے حکومتی دعوے نوں گل دا بتنگڑ کہندے نیں پر ایہہ اپنے جیہڑے وزیر خزانہ شوکت ترین نیں، ایہہ ہجے کجھ دن پہلاں ای معیشت دی زبوں حالی دا رونا روندے ہوئے فرما رہے سن کہ ساڈی اولین کوشش معیشت نوں 2018 والی سطح اُتے واپس لیانا اے۔ ہن اچانک جانے کیہ سوجھی اے کہ اگلے برس معاشی ترقی پنج فیصد جد کہ ایس توں اگلے ورہے 6 فیصد ہون دی پشین گوئی فرمان لگے نیں جے ایہناں دا فرمایا حقیقت وچ وی درست اے تے ایہہ بوہت چنگی گل اے کہ مایوسی دے شکار وطن عزیز دے باسی مسائل دے گرداب توں نکل سکن گے پر امید دلوا کے جدوں وزیر خزانہ کہندے نیں کہ این ایف سی ایوارڈ دے اہداف پور ے نہیں ہوئے ایس لئی کوشش اے کہ صوبیاں دے اتفاق رائے توں نظر ثانی کیتی جائے نیز ایف بی آر دے محصولات ودھن تیکر مشکلات موجود رہن گیاں تے حکومتی دعوے اُتے یقین نہیں آندا تسلیم کہ حکمران جماعت اقدار دی ادھی مدت لنگھا چکی تے ہن ایس نے کارکردگی نہ وکھائی تے مقبولیت دے غبارے توں ہوا نکل سکدی اے پر غبارے دی ہوا بچان لئی بات دا بتنگڑ بنان دی کوئی تُک سمجھ وچ نہیں آندی جے حکومت دا خیال اے کہ ہر شہری بصیرت تے بصارت توں محروم اے ایس لئی جو وی کہیا جائے گا سارے من وعن تسلیم کر لین گے۔ ایہہ خیال غلط اے خواب ویکھن تے خیالات دے گھوڑے دوڑان اُتے تے پابندی عائد نہیں کیتی جا سکدی پر جدوں حقیقت دے منافی گلاں ہون گیاں یا بات دا بتنگڑ بنا کے لوکاں نوں مطمئن کرن دی کوشش کیتی جائے گی تے قومی تے عالمی اداریاں دے نال مسائل و آلام وچ گھرے عوام وی زمینی حقائق دے منافی دعوے دی تردید کرن وچ تاخیر نہیں کرن گے۔
اسیں کافی خوش فہم آں تے کوئی نہ کوئی خوشی دا پہلو لبھ ای لینے آں جویں اج کل اسرائیل و فلسطین دی جنگ بندی دا کریڈٹ لئے رہے آں حالانکہ پاکستان عالمی سطح اُتے کمزور ریاست اے عوامی دبائو گھٹ کرن لئی شاہ محمود قریشی دے بھاگ دوڑ دی اسرائیل دا مقصد غزہ وچ فلسطینیاں نوں بے گھر کرنا تے مہاجرت اختیار کرن اُتے مجبور کرنا سی ایس نے مقصد حاصل ہون دے بعد جنگ بندی دی ہن اوہ یہودی بستیاں نوں توسیع دین دی بہتر پوزیشن وچ اے جد کہ فلسطینی گھراں دی تباہی دی صورت وچ لگن والی چوٹاں نوں ورھیاں تیکر سہلاندے رہن گے اسیں اپنے گھر خوش آن پر بات دا بتنگڑ بنان نال حالات تبدیل نہیں ہوندے تے ایسے گل دا سانوں ادراک نہیں۔
چوہدری نثار علی خان نے پچھلے دور حکومت وچ اپنی ای حکومت تے قیادت نوں ہدف تنقید بنا کے شہرت حاصل کیتی ایس انداز نوں کجھ لوک متقدر قوتاں دے احکامات دا شاخسانہ قرار دیندے رہے کئی کئی گھنٹیاں اُتے محیط بے مقصد پریس کانفرنس ہوندیاں جنہاں دے اختتام اُتے صحافی ایہہ سوچدے رہندے کہ پوٹھوہار دے چوہدری نے کیہ کہیا اے یا کیہ کہنا چاہندے سن پر کسے دی سمجھ وچ نہیں آندا لبتہ ہر پریس کانفرنس دے اختتام اُتے ایہہ خیال قوی تر ہوندا گیا کہ اوہ نواز شریف دی ہمرکابی وچ مزید سیاست کرن توں گریزاں تے متبادل بنن دے متمنی نیں۔ 2018 دے انتخابات وچ مسلم لیگ ن دا ٹکٹ لین دی بجائے بطور آزاد امیدوار میدان وچ اُترے تے انتخابی نشان جیپ حاصل کیتا تے پورے پنجاب وچ جیپ دے انتخابی نشان اُتے امیدوار کھڑے کرنے شروع کیتے تے یار انِ نکتہ داں نوں یقین ہو گیا کہ مقتدر قوتاں نواز شریف نوں ناکام بنانا چاہندیاں نیں پر نتیجے ساہمنے آئے تے چوہدری نثار سنے جیپ دا نشان رکھن والا ہر امیدوار عبرتناک انجام نال دو چار ہویا کراچی توں پی ایس پی نوں وی ناکامی دا منہ ویکھنا پیا چوہدری نثار بمشکل صوبائی اسمبلی دی نشست جت سکے ایہہ حیران کُن نتیجے تردید کردے محسوس ہوئے کہ مقتدر قوتاں دا آلہ کار ہونا محض وکھاوا یا بات دے بتنگڑ توں ودھ کجھ نہیں سی۔
اک ممبر صوبائی اسمبلی دے حلف نال تبدیلی نہیں آ سکدی اک ممبر صوبائی اسمبلی ایس لئی لکھیا اے کہ شہباز شریف نال تعلق دی حد تیکر تے گل ٹھیک اے پر عملی طور اُتے ن لیگ نال چوہدری نثار دا تعلق نہ ہون دے برابر اے آزاد الیکشن لڑن نال سب نوں پتہ چل گیا کہ ایہناں دی انتخابی فتوحات نواز شریف دی مرہونِ منت سن بدلے حالات وچ مریم نواز اپنے والد دی جانشین بن چکی اے جس وچ کسے نوں ابہام نہیں جماعت دی سربراہی شہباز شریف دے کول ہون دے باوجود ویٹو پاور مریم دے کول اے جس دا ثبوت ایہہ وے کہ ایس ورہے مارچ وچ سینٹ الیکشن دے دوران جدوں پنجاب وچ پی ٹی آئی، مسلم لیگ ن تے مسلم لیگ ق دے امیدوار بلامقابلہ کامیاب کران دی گل چلی تے مریم نواز نے ایہہ تجویز سختی نال رد کر دتی تے حکومتی جماعت دی گھٹ توں گھٹ اک نشست کھون دی پلاننگ کیتی حالانکہ ملک وچ موجود شریف خاندان دے بندے وی تجویز دے حامی سن، ایس لئی اعظم نذیر تارڑ سنے کئی لوکاں نے نس بھج وی کیتی پر گل نہ بنی آخر کار کراچی وچ آصف زرداری تے لندن وچ نواز شریف نال رابطے ہوئے آخر کار مریم نواز نوں والد ولوں ہدایت ملی اودوں ای بلامقابلہ کامیابی دا اعلان ہو سکیا ایہہ وی عیاں حقیقت اے کہ چوہدری نثار توں مریم نواز ناخوش اے مسلم لیگ ن دے بغیر پنجاب وچ تبدیلی دی توقع بھلا کنج پوری ہو سکدی اے۔ اراکین اسمبلی شہباز شریف دی مصلحت دی سیاست پسند کردے نیں پر ووٹر نواز شریف دے بیانیے اُتے فدا اے موجودہ حکومت دا دورہ اقتدار روز بروز اختتام ول ودھ رہیا اے تے اراکین اسمبلی کیونکر چوہدری نثار ول مائل ہو کے ووٹراں توں محروم ہون دی خسارے دی تجارت کرن گے؟ایہناں حالات وچ مینوں ایہہ کہن دیو کہ پنجاب وچ تبدیلی دی گل محض افسانہ یا بات دے بتنگڑ دے سوا کجھ نہیں۔
جہانگیر خان ترین متحرک ضرور اے تے حکومتی جماعت اُتے دبائو وی ودھا رہیا اے پر تبدیلی لئی موہڈھا پیش کرن نوں تیار اے نہ ای ایہناں نوں اپوزیشن قبول کرن اُتے آمادہ اے اپوزیشن دی ساری توجہ عمران خان دی دیانتداری دا غدار کرن اُتے اے جس دی اک توں ودھ وجہ نیں پر پنجاب وچ تبدیلی نہ آن دی وڈی وجہ مسلم لیگ ن دی موجودہ سیٹ اپ برقرار رکھن دی خواہش اے جدوں چوہدری پرویز الٰہی جہے زیرک سیاستدان نوں نال ملان دی تجویز قبولیت دا درجہ حاصل نہ کر سکی تے ہن سخت ناقد چوہدری نثار اُتے کیونکر اعتماد کیتا جا سکدا اے۔ تبدیلی دی خبراں نال حکومتی جماعت ششدر تے خوفزدہ ضرور اے تے حلف برداری روکن لئی کوشاں اے حالانکہ اسپیکر و ڈپٹی اسپیکر دی عدم موجودگی وچ پینل آف چیئر مین حلف لین دا مجاز اے ۔ 12 جون 2020 نوں فلیٹیز ہوٹل وچ اسمبلی اجلاس دے دوران میاں شفیع نے وزیرقانون راجہ بشارت دی موجودگی وچ پی ٹی آئی دی رکن ثانیہ کامران نال بطور پینل آف چیئر مین حلف لیا اک حلف نوں روکنا اصل وچ اندر دے ڈر دے سوا کجھ نہیں سچ ایہہ وے کہ عثمان بزدار نوں اپوزیشن ہٹانا ای نہیں چاہندی بلکہ ایہناں دی ناکامیاں تے پنجاب دی محرومیاں آمدہ الیکشن وچ انتخابی ایشو بنانا چاہندی اے ایس لئی جہانگیر ترین گروپ دی خواہش تے کاوشاں دے باوجود مسلم لیگ ن تبدیلی دی حوصلہ افزائی نہیں کر رہی البتہ یار انِ نکتہ داں نوں افسانے تراشنے یا بات دا بتنگڑ بنان توں تے روکیا نہیں جا سکدا تاریخ وچ شیخ چلی نوں تصوراتی قلعے بنان وچ شہرت حاصل اے کسے ہور نوں وی ایہہ مرض لاحق اے تے علاج دے طور اُتے کیہ کیتا جا سکدا اے؟