جنگ وجدل د ے للکارے

حمیداللہ سیٹھی

اک ورھے توں ودھ عرصہ ہو گیا اے اوہ انسان جو سوشل اینیمل کہلاندا اے دوست احباب تے رشتہ داراں نال میل جول چھڈ کے اپنے اپنے گھراں وچ قید تنہائی اختیار کرکے بستر‘ ٹیلی فون تے ٹیلی ویژن دے نال حیاتی گزار رہیا اے۔ ایہ عرصہ کناں لماں ہووے گا اجے کسے سائنسدان یاں ماہر علم نجوم دے علم وچ نہیں۔ انج جے اللہ نے انساناں دی گریہ و زاری نوں قبولیت بخش دتی تے شاید عرصہ لماں نہ ہووے تے چھیتی معافی مل جاوے پر کافی حد تک لوکاں تے خودی دا نشہ چڑھیا ہویا نظر آ رہیا اے یاس یگانہ چنگیزی نے کافی چِر پہلاں کہہ دتا سی کہ:
خود کا نشہ چڑھا آپ میں رہا نہ گیا
خدا بنے تھے یگانہ مگر بنا نہ گیا
ٹیلی ویژن دے حوالے نال گل کریئے تے ڈرامیاں نوں ای لے لوو کدی پاکستانی ٹی وی ڈرامیاں دی اوہ دھم سی کہ سرحدپار مارکیٹاں بند ہو جاندیاں سن تاں جے دکاندار تے گاہک گھراں وچ جا کے ڈرامے توں لطف اندوز ہون۔ ہن وی کجھ چینل ایس پاسے دھیان دیندے نیں پر اک ورھے توں کرونا ناں دی وباء نے پہلے توں پریشان حال لوکاں دی زندگی عذاب بنا رکھی اے۔ اودھر ٹی وی تے سیاسی جنگ وجدل دے للکارے‘ اک دوجے دیاں پگڑیاں اچھالدے‘ ویکھن سنن نوں ملدے نیں جو کرونا دی دہشت نوں پچھے چھڈ گئے نیں اکثر اوقات تے سیاسی گل بات نوں طوفان بدتمیزی دا ناں دینا مناسب معلوم ہوندا اے۔ ہن لگدا اے کہ ایہ طوفان بدتمیزی صرف عوامی سطح تے نہیں سگوں اعلیٰ تے خواص وی ایس سرشت دے حامل نیں۔ ایس موضوع تے ہور کجھ کہنا یاں کھل کے بیان کرنا توہین دے زمرے وچ آ سکدا اے ایس لئی ایتھے ای بس۔ ایس قید تنہائی توں کافی چر پہلاں پاکستان دے دوست ملک ترقی دے ٹی وی ڈرامے اردو وچ ڈب ہو کے پی ٹی وی تے وکھائے جانے سن۔ ساڈے اردو ٹی وی ڈرامے معیار تے گنتی وچ کجھ گھٹ ضرور ہوئے پر لوکاں دی اوہناں وچ دلچسپی برقرار رہی۔ جے مدت دا اندازا تعین کیتا جاوے تے ترکش ڈرامے کجھ زباناں وچ ڈب ہو کے دوجے پندراں ویہہ ملکاں وچ ویکھے جا رہے نیں پاکستان تے انڈیا وچ ایہناں دی اردو تے ہندی وچ ڈبنگ ہوندی اے جد کہ پاکستان وچ صرف اردو وچ ڈبنگ ہوندی اے۔
میرے سامنے ایس ویلے 28 ترک ڈرامیاں دی فہرست اے جہناں وچوں میں ڈبنگ شدہ ڈرامے پچھلے دس ورھیاں وچ ویکھے۔ تریہہ دے نیڑے ڈرامیاں وچوں میں 16 ڈرامے ویکھ لئے نیں جد کہ ستارھواں ڈرامہ ارتغرل غازی اپنے اختتام نوں جا رہیا اے۔ ایس ڈرامے دے بعد دے حالات طویل تے فتوحات نیں جہناں دا نتیجہ ایہ ہویا کہ گل ارتغرل غازی دے پُتر عثمان تک اپڑی تے فیر سلطنت عثمانیہ جہدی حکمرانی تن براعظماں تے چھ سو ورھے تک رہی تے ایہدے بعد خدائی قدرت کہ ہر عروج تے زوال تے ایہدی وجہ اوہو دائم حکمرانی دی خواہش جنہوں قائم رکھن دا شاہی فرمان جہدے مطابق تخت تے بیٹھے حکمران دا قنون کہ اوہدی بادشاہت دے دوران جنے وی عہدیدار ہون بھاویں اوہ پُتر ہووے‘ بھائی ہووے‘ ہر کسے دا سر لاہنا لازم ہوندا کہ اوہدی حکمرانی قائم رہوے۔ جس ٹیم نے ایس ڈرامے دی اردو زبان وچ ڈبنگ کیتی اے اوہ وی سلاہن جوگ اے ایس ڈرامے دا ہیرو دو واری دعوت تے پاکستان آیا پر اوہنوں سدن والے شاید نالائق سن۔
تقسیم ہند توں پہلاں 1526ء 1761ء تک ایتھے مغل ایمپائر سی۔ مغل بادشاہ بابر دا عہد ابتدائی سی جو 1526ء وچ صرف چار ورھے رہیا۔ ایہدے بعد ہمایوں اقتدار وچ آیا جنہے 26 ورھے تک حکومت کیتی۔ ایہدے بعد اکبراعظم 49 ورھے حکمران رہیا۔ اوہدے عہد وچ کئی یادگار واقعات نے جنم لیا تے کجھ رومان پرور واقعات نوں فلم انڈسٹری نے دوام بخشیا۔ جہانگیر دا عہد حکومت 22 ورھے سی شاہ جہاں نے 31 ورھے بادشاہت کیتی جہدے بعد اورنگزیب 49 ورھے برسراقتدار رہیا۔
تاج محل آگرہ شاہ جہاں دا تعمیر کردہ اے جو 1632ء وچ تعمیر ہوناشروع ہو کے 1648ء وچ مکمل ہویا۔ ایہ عمارت بادشاہ نے اپنی بیوی ممتاز محل دی یادگار دے طور تے شروع کیتی سی۔ مغلاں دا آخری حکمران بہادر شاہ ظفر سی جو 1658ء توں 1707ء تک تے بادشاہ سی فیر قیدتنہائی وچ رنگون دے اک گیراج وچ بند رہیا۔ فیر ایسے گیراج وچ ای فوت ہویا۔ آخر وچ مغل بادشاہواں دے آخری فرمانروا داشعر
کتنا ہے بد نصیب ظفر دفن کے لیے
دو گز زمین بھی نہ ملی کوئے یار میں