باغی ارکان تے روایتی سیاست

لكهت:ڈاکٹر آختر شمار

اک وکیل نے عدالت وچ جج نوں کہیا:
جناب! میں تہاڈے اگے درخواست کراں گا کہ میرے موکل دے مقدمے دی سماعت دوبارہ شروع کیتی جاوے میرے علم وچ اک نواں ثبوت آیا اے جہدے نال ایس مقدمے وچ جان پے سکدی اے۔
جج نے پچھیا: کہڑا ثبوت؟
وکیل: ایس گل دا ثبوت کہ میرے موکل دے کول اجے اک لکھ روپیہ ہور وی ہے۔
حکومت وی حدیبیہ پیپر ملز دا مقدمہ دوبارہ شروع کرنا چاہندی اے سنیا اے کہ ہن کجھ ہور ثبوت وی سامنے آئے نیں اجے مقدمے کھلن دیاں گلاں ہو رہیاں سن کہ حکومت دی جھولی وچ بیٹھے اپنے لوک حکومت دی داڑھی نال کھیڈن لگ پئے نیں۔ تسیں کہوو گے کہ عمران خان یاں شاہ محمود قریشی سنے کسے دی داڑھی نہیں بالکل ٹھیک اے اسیں تے داڑھی دا بڑا احترام کرن والیاں وچوں آڈں ایتھے داڑھی علامتی طور تے استعمال کیتی جا رہی اے اصل وچ تحریک انصاف دے باغی گروپ دے اراکین عمران خان نوں تے کسے حد تک پسند کردے نیں پر بزدار پنجاب دی کرسی تے بیٹھا اوہناں نوں اک بالکل وی چنگا نہیں لگدا تے ایہ صرف باغی اراکین دا معاملہ نہیں سگوں تحریک انصاف دے کافی لوک عثمان بزدار دے خلاف نیں۔ حق وچ صرف عمران خان نیں تے عمران خان نے بھاویں درجناں یوٹرن لئے نیں پر بزردار والی غلطی دا یوٹرن لین تے کسے طرح تیار نہیں۔ کجھ تجزیہ نگار کہندے رہے نیں کہ پنجاب دی وزارت اعلیٰ جہانگیر ترین لئی رکھی سی۔ بھاویں ایس عہدے لئی شاہ محمود قریشی‘ علیم خان توں لے کے فواد چوہدری تک اپنے آپ نوں حق دار سمجھ رہے سن ایہ تے جہانگیر ترین دی قسمت نکلی تے اوہ نااہل ہو کے کسے جوگے نہ رہے تے ہن تے جس طرح نوازشریف‘ شہبازشریف تے اپوزیشن دے کجھ دوجے لوک زیرعتاب نیں جہانگیر ترین وی ایس صف وچ شمار ہوندے نیں۔ حالاں کہ ترین دی خدمات کسے توں لکی چھپی نہیں۔
عمران خان مجبور وی نیں پر اوہناں دی پارٹی دا ناں تحریک انصاف اوہناں نوں بہرحال انصاف کرنا اے بدقسمتی نال اوہناں دے سجے کھبے دے دے لوک تے کجھ وزیر پاکستان دی روایتی سیاست دے دلدادہ نیں تے ہر کوئی کسے نہ کسے طرح مال بنان لئی سیاست نال جڑیا اے۔ عمران خان نے جہانگیر ترین نوں یقین دوایا اے کہ اوہناں دے نال ناانصافی نہیں ہووے گی پر اوہ ہمیشہ ایہ وی کہندے نیں کہ کرپشن بھاویں ساڈی پارٹی دا کوئی رکن وی کرے گا تے اوہنوں معاف نہیں کیتا جاوے گا ایس لئی ترین نوں پتہ اے کہ اوہناں نوں اپنا کیتا دھریا آخر کار بھگتنا پوے گا ایہ جو اوہناں دے نال اراکین اچانک حلف چک کے اوہناں دے حق وچ بانگاں دین لگ پئے نیں ایہدا مقصد وی سوائے بلیک میلنگ دے کجھ نہیں۔ اوہناں نوں لوکاں دے مسئلیاں تے خاص طور تے مہنگائی دی اینی فکر ہوندی تے اوہ اپنے نویں لیڈر جہانگیر ترین نوں کہندے کہ تہاڈے تے الزامات نیں تے کلیئر ہو جائو۔ شوگر مافیا دے پچھے کدھرے نہ کدھرے مبینہ طور تے جہانگیرترین دا ناں تے آئوندا اے۔
جہانگیر ترین نوں پتہ اے کہ بجٹ تک ای حکومت توں کجھ منوایا جا سکدا اے بعد وچ کنہے پچھنا اے؟ سو اوہ کھل کے دھڑے بندی دا اعلان کر چکے نیں پر نال ایہ وی فرما رہے نیں کہ اسیں تحریک انصاف وچ ای آں۔ بھئی جے انج ہوندا تے عدالت وچ ممبران اسمبلی دا جلوس لے کے جان دی کیہ لوڑ اے تسیں سچے او تے عدالت توں بری ہو جائو گے پر جہانگیر ترین اپنے پتے شوکر کے تڑھی وی لا رہے نیں کہ اوہناں نوں کلین چٹ دیو نہیں تے پنجاب دی حکومت تے کسے لمحے وی اسیں ڈھا سکنے آں عوام جنے بے حس تے جاہل سمجھے جان اینی گل تے ہر بندہ سمجھدا اے کہ ایہ سارے لوک مفادات دے فصلی بٹیرے نیں تے ایس حمام وچ سارے الف ننگے نیں۔ جدوں تسیں اسمبلی وچ وکھرا پارلیمانی لیڈر بنا کے اپنی وکھری پچھان یاں گروپ دے نال بیٹھن دیاں گلاں کر رہے او تے ایہدا مطلب کیہ اے؟ عمران خان نوں ذرا اُچا سنائی دیندا اے اک دو دن بعد اوہنوں پتہ لگے گا کہ اوہدی حکومت لئی کون کون اوہدا اپنا خطرے دی علامت اے؟ عمران خان نوں اخلاقی طور تے ایس گروپ دے سامنے آن دے بعد حکومت توں وکھ ہو کے اپوزیشن وچ بیٹھ جانا چاہیدا اے تے اپوزیشن نوں حکومت دے دینی چاہیدی اے۔ اصولاً تے شروع توں ای خالی خزانے دے نال اوہنوں وزارت عظمیٰ نہیں سی سانبھنی چاہیدی پر ہن وی اسمبلیاں توڑ کے نویں الیکشن دا اعلان کرنا چاہیدا اے یاں فیر ساریاں نوں کلین چٹاں دے کے روایتی پاکستانی سیاست کرنی چاہیدی اے ملک تے عوام ایہناں سیاستداناں لئی بھاویں جائے بھاڑ وچ‘ اوہناں نوں ایہدے نال کیہ فرق پیندا اے۔ ایہ لوکاں واسطے تھوڑی آئوندے نیں ایہ تے بس اپنے ڈھڈ بھرن لئی آئوندے نیں۔٭