ایمانی قرآنی تفتیش والا منتظرنظام

لكهت:اشرف شریف

اسیں اوس سماج وچ رہنے آں جتھے لوک انصاف منگدے نیں پر ناانصافی کردے نیں۔ اسیں اوس سماج وچ رہنے آں چھوٹے توں وڈے قاضی تک بولدے نیں پر کردے کجھ نہیں۔ ریاست دے تھم مقننہ‘ انتظامیہ تے عدلیہ ہوندے نیں۔ اسیں پاکستانیاں فوج تے میڈیا نوں چوتھا تے پنجواں تھم بنا رکھیا اے۔ ریاست دے دو تھم آپس وچ ٹکرا جان تے ملک وچ بحران پیدا ہوندا اے۔ ریاست دے سارے تھم اک دوجے خلاف تلواراں کس لین تے ملک انارکی دا شکار ہو جاندا اے۔
90ء دے عشرے وچ جدوں اسمبلیاں ٹُٹدیاں سن تے سیاسی بحران جنم لیندا۔ چیف جسٹس یاں آرمی چیف دے نال انتظامیہ دا سربراہ وزیراعظم جھگڑے تے تیار ہوندا تے آئینی بحران دا خدشہ پیدا ہو جاندا۔ عموماً انتظامیہ دے مقابلے وچ باقی تھم دوجا دھڑا بنا لیندے ایس طرح جمہوریت نوں کمزور کیتا جاندا۔ جمہوریت دی مضبوطی لئی سب توں ودھ جانی و مالی قربانیاں کھبے بازو دیاں جماعتاں نے دتیاں۔ پر سچ ایہہ وے کہ جمہوریت نوں اپنے مفادات دی لونڈی مسلم لیگ (ن) نے بنایا۔ ایہ مسلم لیگ اے جنہے بازار سیاست توں ہر اوہ جنس نایاب چک لئی جہدے دوالے لوک اکٹھے ہو سکدے سن۔ عدلیہ دے بہت سارے اہم کردار خریدے گئے تے فیر اوہناں وچوں کجھ نوں سیاسی عہدیاں نال وی نوازیا گیا۔ اوہ عدلیہ جہڑی لڑائی دے فیصلہ کن موڑ تے انتظامیہ خلاف آمراں نوں قنون جواز دیندی رہی اوہنوں اپنی طاقت پچھانن وچ کئی عشرے لگ گئے۔ جسٹس افتخار چوہدری دی بحالی دی تحریک کیویں تے کہڑے لوکاں نے منظم کیتی ایہدے توں ہٹ کے ویکھو کہ ایس تحریک دے نتیجے وچ عدلیہ نے سلیپنگ پارٹنر دا کردار جاری رکھن توں انکار کر دتا۔ ہن انتظامیہ تے سکیورٹی اداریاں دے نال عدلیہ وی سرگرم کردار ادا کرن لگ پئی۔ افتخارچوہدری نے ایہنوں جوڈیشل ایکٹوازم دا ناں دتا جے کوئی تجزیہ نہیں کر سکیا تے سمجھ لوو کہ وکیل تے عدالتاں توں شکایتاں ایس تحریک دے بعد ودھیاں نیں لوکاں وانگوں ادارے وی ایس صورتحال توں پریشان نیں۔
تحریک انصاف دے 35 دے نیڑے اراکین دی وزیراعظم نے تسلی کرا دتی اے۔ جہانگیرترین دی حمایت وچ گروپ بنان والے اراکین دا خیال سی کہ پنجاب تے وفاق دیاں حکومتاں اوہناں دے پیراں دے کھڑک نال ڈگ جان گئیاں۔ چھوٹے چھوٹے دھڑیاں توں بلیک میل ہون والیاں حکومتاں دی پوری تریخ اے۔ شاید ایسے لئی تجزیہ کاراں دی رائے وچ عمران حکومت دے چل چلائو دا ویلا آ چکیا سی۔ ہو سکدا اے چل چلائو دی کیفیت ہن وی ہووے پر ایس واری وزیراعظم عمران خان نیں تے اوہناں نے جو موقف اختیار کیتا اے اوہ پاکستان دی سیاست وچ نویں موسماں دی خبر دیندا اے۔ دسیا جا رہیا اے کہ وزیراعظم نے جہانگیرترین خلاف شوگر کمیشن دی تحقیقات تے منی لانڈرنگ مقدمیاں وچ کوئی دبائو قبول کرن توں صاف انکار کر دتا اے۔ وزیراعظم نے راجہ ریاض ورگے خیالات رکھن والے جہانگیرترین دے ساتھی اراکین نوں واضح جواب دے دتا اے کہ جنہے استعفیٰ دینا اے دے دیوے۔ میں سچ توں نہیں ہٹ سکدا ساری کاروائی بلاامتیاز ہووے گی۔ کسے دے نال ناانصافی نہیں ہووے گی جہانگیر ترین بے گناہ ہوئے تے چھٹ جان گے۔ قصوروار ہوئے تے کاروائی ہووے گی۔ وفد نے جہانگیرترین تے الزامات دی تحقیقات لئی جوڈیشل کمیشن بنان تے مشیر احتساب شہزاد اکبر نوں ہٹان دا مطالبہ کیتا۔ وزیراعظم نے ایس مطالبے نوں رد کر دتا پر بیرسٹر علی ظفر دی ون مین کمیٹی بنا دتی جو فریقین دا موقف جان کے اپنی رپورٹ وزیراعظم نوں پیش کرے گی۔ ہے نا کمال دی جرأت مندی تے مشکل حالات وچ جرأت مند فیصلہ۔
پر کوئی اعلیٰ رائے قائم کرن توں پہلاں کراچی دے ضمنی انتخابات وچ پی ٹی آئی دی نکامی دی وجوہات ضرور سامنے رکھیاں جان۔ اک پاسے بلندی دوجے پاسے زوال‘ میری تہاڈی زندگی وچ طاقتوراں دا گھولیا زہر شامل ہو رہیا اے اک تھم بولدا اے کہ دوجے تھم نوں ہتھکڑیاں لا دیوے گا‘ دوجا تھم تریجے نوں اپنا رویہ ٹھیک کرن دا کہندا اے۔ تریجا پہلے دا سافٹ ویئر اپ ڈیٹ کر دیندا اے۔ آوازاں اینیاں اچیاں کہ جیویں لوکاں دا ہر مسئلہ حل کیتا جا رہیا اے۔ حقیقت ایہہ کہ اپنا ای کوئی مطالبہ دوجے تھم توں منوایا جا رہیا ہوندا اے۔ وڈے لوکاں دیاں وڈیاں گلاں۔ اسیں تے تسیں کتھے اپنی رائے دے سکنے آں کوئی رائے دیو وی تے کسے نوں کیہ فرق پیندا اے۔ رائے تے اوہناں دی ہوندی اے جہناں دی گل تے ہیڈلائنز بن دیاں نیں۔ اج کل مخصوص شخصیات نوں ہیرو بنان دی حکمت عملی چل رہی اے۔ طاقتور حلقے اپنے اپنے ہیرو بنا کے سانوں مرعوب کردے نیں۔ اسیں اوہناں ساریاں نوں سلام کرکے عافیت دے درخواست گزار ہونے آں۔ کل اک دوست نے بڑا دلچسپ واقعہ سنایا کہ کسے علاقے وچ چوری دی وڈی واردات ہو گئی۔ بڑی تحقیقات ہوئی اتھرے جہے تھانیداراں نے مشکوک بندیاں نوں پٹھا لمکا کے تفتیش کیتی کھوجیاں نے پتہ لایا کجھ سمجھ نہ آئی۔ آخر گل ایمانی قرآنی تفتیش تے آ گئی۔ چار بندیاں نے اک چادر پھڑی اوہدے وچ قرآن پاک رکھیا تے سارے قصبے نوں کہیا گیا کہ چادر دے تھلیوں گزرو۔ یقین ایہ سی کہ چور چادر دے چارے کونیاں دے تھلیوں گزریا تے مر جاوے گا۔ پورا قصبہ لنگھ گیا پر چور دا پتہ نہ لگا۔ پتہ وی کیویں چلدا کہ چوراں نے تے چادر دے کونے پھڑے ہوئے سن۔ عمران خان اتحادیاں نوں منا رہیا اے اپنے اراکین دے غیرقنونی مطالبے تے دبائو نوں رد کر رہیا اے۔ انتظامیہ خلاف اک تھم دے سرگرم کردار نوں برداشت کر رہیا اے۔ مسئلیاں دا کڑوا ملک شیک روز پینا پے رہیا اے۔ عام بندے نوں ہر دن وکھووکھ ٹی وی شوز وچ دس بندے دس رہے نیں کہ عمران دے دور وچ غریب ماریا گیا۔ غریب نوں کوئی نہیں دس رہیا کہ ملک انارکی ول جان دا ن تیجہ کیہ نکلے گا؟ انارکی ملک نوں کمزور کردی اے۔ قیمتی اثاثے وِک جاندے نیں اصولی موقف تبدیل کرا لئے جاندے نیں تے آزادی گروی رکھ دتی جاندی اے۔٭٭