’’چوہدری نثار دا حلف، سیاست وچ ہلچل‘‘

تحریر اکرم عامر سرگودھا

پاکستان سیاست بڑی بے رحم وی اے تے سیاستداناں لئی سود مند وی، ملکی سیاست دے کھلاڑٰ دناں وچ امیر ہوندے ویکھے گئے نیں۔ ساڈے ملک دی سیاست وچ اکثریت سیاستداناں اُتے طرح طرح دے کرپشن دے الزامات نیں تے ہر حکومت دے دور وچ احتساب دا نعرہ لگدا رہیا پر کسے دور حکومت وچ وی کرپٹ عناصر دا احتساب نہ ہو سکیا، ہن موجودہ حکومت وی کرپٹ تے بدعنوان سیاستداناں دا احتساب دا نعرہ لا کے برسر اقتدار آئی اے تے سیاستداناں تے ملک دی قومی دولت نوں لُٹن والیاں دے احتساب وچ لگی ہوئی اے۔ کرپشن زدگان دے وڈے وڈے ناں ساہمنے آ چکے نیں، ایتھے خاص گل ایہہ وے کہ 1980 توں سیاست دے وڈے ناں چوہدری نثار اُتے کسے دور وچ کرپشن دا کوئی الزام ساہمنے نہیں آیا، تاں ایہناں اُتے اختیارات توں تجاوز تے دوران وزارت سستی کاہلی دے الزام لگدے رہے۔ ایسے چوہدری نثار نے 2 سال 10 مہینے بعد ایم پی اے دے عہدے دا حلف چکیا اے۔ ایس دے پس پردہ کیہ حقائق نیں ایہہ آئندہ کجھ دن وچ ساہمنے آ جان گے، موصوف نے 2018 دے انتخابات وچ ایم این اے تے ایم پی اے دو نشستاں اُتے آزاد امیدوار دی حیثیت نال الیکشن لڑیا سی۔ 25 جولائی 2018 نوں ہون والی پولنگ دے نتیجے وچ چوہدری نثار ایم این اے دی نشست چوہدری غلام سرور توں ہر گئے سن پر پی پی 10 راولپنڈی توں ایم پی اے دی نشست جت کے ایم پی اے منتخب ہو گئے سن ، چوہدری نثار دا شمار ملک دے وڈے سیاست داناں وچ ہوندا اے پر قومی اسمبلی دی نشست اُتے ایہناں نوں 2018وچ شکست دین والے ایہناں دے مخالف چوہدری غلام سرور نوں پی ٹی آئی دی حکومت بنن اُتے وزارت پٹرولیم دا قلمدان سونپ دتا گیا سی۔ ایہہ عہدہ ماضی وچ چوہدری نثار دے کول کئی حکومتاں دے دور وچ رہیا جس اُتے چوہدری نثار سیاست توں دلبرداشتہ ہو گئے تے موصوف نے اینے عرصے تیکر سیاست وچ خاموشی اختیار کیتے رکھی تے ایم پی اے دی نشست اُتے حلف نہ چکیا۔ چوہدری نثار دا شمار 2018 دے الیکشن توں پہلاں مسلم لیگ ن دے اہم راہنمائواں وچ ہوندا سی، موصوف دا 1985 دے بعد ہر سیاسی دور وچ سیاست وچ نمایاں کردار رہیا اوہ مسلسل 2013 تیکر رکن قومی اسمبلی منتخب ہوندے رہے۔ موصوف 2008 توں 2013 تیکر قومی اسمبلی وچ قائد حزب اختلاف رہے، اوہ 1988 وچ وفاقی وزیر سائنس و ٹیکنالوجی رہے، اوہ میاں نواز شریف دے دونواں ادوار حکومت وچ وزارت پٹرولیم تے قدرتی وسائل دے عہدے اُتے فائز رہے۔ مسلم لیگ ن دے تیجے دور حکومت جس وچ میاں نواز شریف دے سبکدوش ہون اُتے خاقان عباسی وزیراعظم بنے سن ، وچ چوہدری نثار وفاقی وزیر داخلہ سن، چوہدری نثار 1980 وچ جنرل ضیاء الحق دے دور وچ چیئر مین ڈسٹرکٹ کونسل راولپنڈی بنے تے میاں نواز شریف نال ایہناں دی قربت ہو گئی۔ چوہدری نثار 1985 وچ قومی اسمبلی دے حلقہ 52 توں اسلامی جمہوری اتحاد دے ٹکٹ اُتے ایم این اے بنے، فیر 1988 وچ ایسے حلقے تے ایسے جماعت توں دوبارہ ایم این منتخب ہوئے، چوہدری نثار 1990 وچ دوبارہ جتے تے وفاقی وزیر بنے، 1993 دے انتخاب وچ چوہدری نثار چوتھی وار رکن قومی اسمبلی بنے، 1997 وچ پنجویں وار جت کے چوہدری نثار علی خان وفاقی وزیر پٹرولیم و قدرتی وسائل سن کہ جنرل پرویز مشرف نے نواز شریف دی حکومت دا تختہ الٹ کے اقتدار سنبھال لیا سی، تے دیگر لیسی قائدین وانگوں ایس دوران چوہدری نثار وی کئی ہفتے تیکر پابند سلاسل رہے، ایس ویلے تیکر چوہدری نثار علی خان مسلم لیگ وچ میاں نواز شریف دے بعد سب توں طاقتور شخصیت تصور ہوندے سن، چوہدری نثار علی خان ایہناں شخصیات وچ شامل سن، جنہاں نے مشکل ویلے وچ وی مسلم لیگ ن نوں زندہ رکھیا۔ 2002 دے الیکشن وچ چوہدری نثار قومی اسمبلی دے حلقہ 52 تے 53 دونواں توں کامیاب ہوئے پر این اے 52 دی نشست چھڈ دتی۔ 2008 وچ ستویں وار ایم این اے بن کے وفاقی وزیر خوراک، زراعت، لائیو سٹاک تے مواصلات دے وزیر دے عہدے اُتے براجمان رہے۔ ستمبر 2008 وچ چوہدری پرویز الٰہی دے استعفے دے بعد اوہ قومی اسمبلی وچ قائد حزب اختلاف رہے۔ 2013 وچ چوہدری نثار مسلم لیگ دے امیدواراں دا انتخاب کرن والے پارلیمانی بورڈ دے اہم رکن سن، 2013 دے انتخابات توں پہلاں چوہدری نثار علی خان نے پنجاب دی وزارت اعلیٰ لئی لابنگ وی کیتی، پر نواز شریف نے چوہدری نثار نوں ایم پی اے دا ٹکٹ نہ دتا، ایس دے باوجود چوہدری نثار نے ایم پی اے دا وی آزاد الیکشن لڑیا تے اوہ پارٹی ٹکٹ اُتے ایم این اے تے زادحیثیت نال ایم پی اے منتخب ہو گئے۔ پر چوہدری نثار کوشش دے باوجود وزیراعلیٰ پنجاب نہ بن سکے تے میاں نواز شریف نے اپنے بھرا شہباز شریف نوں وزیراعلیٰ پنجاب بنان نوں ترجیح دتی، تے چوہدری نثار علی خان نوں وزیر داخلہ بنا دتا گیا۔ ذرائع کہندے نیں کہ وزارت اعلیٰ پنجاب نہ دین اُتے نواز شریف تے چوہدری نثار وچ اختلاف چل رہے سن کہ پانامہ کیس دے فیصلے توں بعد نواز شریف نے استعفیٰ دے دتا، تے چوہدری نثار نے 27 جولائی 2017 نوں وزارت داخلہ دے عملے توں الوداعی ملاقات کیتی تے اگلے دن وزارت داخلہ دا عہدہ چھڈ دتا تے موصوف شاہد خاقان عباسی دی کابینہ دا حصہ نہ بنے۔ سیاسی ذرائع کہندے نیں کہ چوہدری نثار اُتے الزام لایا گیا کہ غداری دے مقدمے دے ملزم پرویز مشرف نوں موصوف (چوہدری نثار علی خان ) نے محفوظ رستہ دتا اے۔ 2018 دے الیکشن توں پہلاں پاکستان تحریک انصاف دے سربراہ عمران خان نے چوہدری نثار علی خان نوں پی ٹی آئی وچ شمولیت دی دعوت دتی پر چوہدری نثار علی خان نہ منے جد کہ ایس دوران مسلم لیگ دے میاں برادران نال وی ایہناں دی دوریاں ودھ چکیاں سن تے جون 2018 وچ چوہدری نثار نے مسلم لیگ ن نوں باضابطہ الوداع کہہ دتا۔
سو گل کتھوں کتھے نقل گئی ، گل ہو رہی سی 2018 دے الیکشن وچ چوہدری نثار علی خان دے ایم پی اے دی نشست جت کے حلف نہ چکن تے دو سال 10 مہینے تیکر سیاست وچ مسلسل خاموشی توں بعد چوہدری نثار دے حلف چُکن دی، تے توجہ طلب گل ایہہ وے کہ چوہدری نثار نے اینا عرصہ چُپ رہن دے بعد حکومتی نشست اُتے کھڑا ہو کے حلف چُکیا اے پر چوہدری نثار نے پی ٹی آئی وچ شمولیت دا ہجے اعلان نہیں کیتا چونکہ موصوف نے حکومتی نشست اُتے کھڑے ہو کے حلف چُکیا اے تے ایس گل دا قوی امکان اے کہ اوہ حکومتی جماعت وچ ای شامل ہون گے؟ پر کیہ اوہ عمران خان دی قیادت نوں تسلیم کرن گے؟ یا فیر جہانگیر ترین دے گروپ وچ شامل ہون گے۔ ایہہ عندیہ آئندہ دو تن دن وچ کھل جائے گا۔ پر ایہہ گل ببانگ دھل کہی جا سکدی اے کہ چوہدری نثار علی خان دا پنجاب اسمبلی دی رکنیت دا حلف چُکنا کسے سیاسی تبدیلی دا پیش خیمہ ہو سکدا اے کیوں جے چوہدری نثار علی خان مسلم لیگ ن دے لمبے عرصے تیکر پردھان رہے نیں تے نواز شریف اُتے جدوں کڑا ویلا سی تے چوہدری نثار نے ایہناں نوں تحمل نال سیاست کرن دا مشورہ دتا سی۔ ذراء عکہندے نیں کہ چوہدری نثار علی خان آئندہ کجھ دن وچ اپنی سیاسی گہما گہمی شروع کرن گے تے مسلم لیگ ن سنے دیگر اپوزیشن جماعتاں دی قیادت نال ایہناں دی ملاقاتاں وی متوقع نیں۔ چوہدری نثار علی خان سیاست وچ کیہ نواں رنگ وکھاندے نیں ایہہ کہنا قبل از وقت اے پر سیاسی حلقے ایہہ کہہ رہے نیں کہ چوہدری نثار علی خان دا ایم پی اے دی نشست اُتے حلف چُکنا بوہت ساری سیاسی تبدیلیاں دا پیش خیمہ ثابت ہوئے گا۔