ظلمتاں دے موسم توں ضمانتاں دے موسم تک

لکھت:آصف عنایت

وطن عزیز عجیب حیرت کدہ دی صورت گری دا شاہکار ہوئے جا رہیا اے۔ رانا ثناء اللہ دی ضمانت تے رہائی بارے بیگم فردوس عاشق اعوان فرماندیاں نیں کہ لہور ہائی کورٹ دا انوکھا فیصلہ اے منشیات کیس وچ ضمانت دے کے نویںمثال بنائی گئی۔ دوجے پاسے شہریار آفریدی نے فرمایا کہ ایہ ضمانتاں دا موسم اے، تفصیلی فیصلے وچ عدالت نے لکھیا اے کہ سیاسی انتقام ساڈے ملک وچ کھلا راز اے۔
رہائی دے بعد رانا ثناء اللہ نے پوری پریس کانفرنس قرآن ہتھ وچ پھڑ کے کیتی جہدے توں حکومت دے باقی رہن دا کوئی قنونی و اخلاقی جواز باقی نہیں رہندا۔ پرویز مشرف نے غداری تے سزائے موت دے خلاف اپیل دائر کر دتی اے۔ سزا یافتہ تے اشتہاری نوں جے سرنڈر کیتے بغیر ریلیف ملدا اے تے فیر کہڑا فیصلہ انوکھا تے کہڑا موسم ہووے گا۔ انج تاں عمران خان اشتہاری ہوندیاں ہوئیاں وی منتخب وزیراعظم دے خلاف رٹ پٹیشن وچ ریلیف لے کے وزیراعظم نااہل کروا چکے نیں۔
لال حویلی دے شیخ رشید مورت بدھوبائی والے بلاول بھٹو کہندے نیں کہ بچے او تے بچے رہو تے عمران خان نوں احتساب خان دا ناں دے دتا جد کہ تریخ ایس احتساب نوں بدترین انتقام دا ناں دے رہی اے۔ گویا عمران خان نوں بین السطور انتقام خان دا ناں دتا جا رہیا اے۔ اک دوجے انتہائی اہم معاملے یعنی جناب آرمی چیف دی مدت کمانڈ وچ توسیع لئی حکومت نے جہڑی نااہلی دا مظاہرہ کیتا ایہدی کوئی مثال نہیں ملدی۔ وزیراعظم گھر وچ بیٹھ کے بددلی نال لکھے گئے خط دے راہیں مدت کمانڈ وچ توسیع کردے نیں تے فرماندے نیں کہ تیجے مہینے وچ ای فیصلہ کر لیا سی کہ تن ورھے دی توسیع دے دیواں گا چلو پہلی واری تے ناتجربہ کاری نااہلی دی وجہ توں توسیع لئی لکھے گئے خط وچ کمی رہ گئی پر سپریم کورٹ وچ مقدمہ دی سنوائی دے دوران بابر اعوان تے فروغ نسیم دی موجودگی وچ پوری کابینہ نے پورے دماغ استعمال کرکے پورے آئین تے قنون دا مشاہدہ کرکے جو بار بار خط لکھے اوہ وی ادھورے، بے بنیاد تے بے جان سن پر آرمی چیف دی مدت کمانڈ وچ توسیع دے حوالے نال قنون سازی لئی فیصل واوڈا فرماندے نیں کہ اپوزیشن والے لیٹ کے توسیع دا قنون پاس کرن گے۔ سوال ایہ پیدا ہوندا اے کیوں لیٹن گے گویا حکومت دے کول کوئی قوت اے جو بلیک میل کردی اے جہدے وچ سینیٹ دے عدم اعتماد دا بند لفافیاں وچ دل دے پیغام بدلن دا بہت حوالہ دیندے نیں۔ واوڈا کہندا اے کہ اپوزیشن نال ہتھ ملانا، گل کرنا تے دور اسیں اپوزیشن دی شکل وی نہیں ویکھنا چاہندے۔ دراصل ایہناں دے رویے پارلیمانی نیں نہ جمہوری فیاض الحسن چوہان، فردوس عاشق اعوان، شیخ رشید مورت بدھو بائی دی کوٹھی خانے والے، اسلم اقبال، واوڈا، علی زیدی، شہریار آفریدی تے اپنی زہریلی ، مزاحیہ تے غیر سنجیدہ زبان و بیان دی وجہ توں عہدیاں تے نیں جد کہ فروغ نسیم قنون دان نے مسٹر جسٹس وقار سیٹھ بارے جہڑا بیان دتا اوہ صریحاً توہین عدالت دے زمرے وچ آندا اے۔ آرمی چیف دی کمانڈ وچ توسیع دے حوالے نال آئین وچ تبدیلی دے معاملے وچ بے بسی تے نااہلی ویکھ کے ریویو پٹیشن دائر کر دتی تے ان کیمرہ دی عرضی وی دے دتی گئی۔ پہلے بال دی کھال پوری دنیا دے ساہمنے اتاری گئی تے ہن ریویو پٹیشن ان کیمرہ جے فیصلہ پہلے فیصلے توں وکھرا آندا اے تے ایہدے بارے جہڑے تاثرات ابھرن گے اوہ کیہ ہون گے اندازہ لانا کجھ زیادہ مشکل نہیں جے پہلے فیصلے دی توثیق کیتی جاندی اے تے فیر ہور خاک اُڈے گی ہن جے قنون سازی نہیں ہوندی تے ایہ انتہائی اہم ایشو بغیر حل ہوئے آئینی تریخ دے متھے تے بدنما داغ وانگوں نمایاں رہوے گا۔ سپریم کورٹ نے سرکار دی بہت مدد کیتی ملک دے معتبر ترین ادارے دا احترام ملحوظ خاطر رکھدیاں ہوئیاں تے صوابدیدی اختیارات استعمال کردیاں 6مہینے دی مہلت دے دتی پر کہڑی حکومت نوں جہدی کوئی کل سدھی نہیں اے۔ اینے اہم تے حساس معاملے تے قنون سازی تے درکنا ایس حکومت نوں نیب دے حوالے نال وی آرڈیننس لیانا پیا اوہ وی انتہائی بھونڈے انداز دے نال چاہیدا تے ایہ سی کہ ساکھ تباہ ہو جان دی وجہ توں نیب دا ادارہ ای توڑ دتا جاندا تے متفقہ طور تے قنون سازی کرکے آئین نال ہم آہنگ احتساب دا نواں قنون بنایا جاندا۔ مینوں تے اوس دن ای اندازہ ہو گیا سی ایہ نااہل نیں جس دن ایف آئی اے نوں اختیارات زیادہ دین دی گل کیتی سی جد کہ نوازشریف اپنے دوجے دور وچ ایف آئی اے توڑ دین دے در اُتے سن سب سمجھدے نیں کہ ایف آئی اے ختم ہو جاوے تے کجھ فرق نہیں پوے گا سوائے کرپشن گھٹ ہون دے ایہو حالت نیب دی اے پر سیاسی انتقام لئی پلس دی لوڑ پوے گی جو وفاقی حکومت نوں ہر صوبہ وچ میسر نہیں ہوندی۔
اک پاسے نوکریاں توں چھانٹیاں جاری نیں، دوجے پاسے سرکار سوئی گیس، بجلی دے بلاں وچ واداھا کر رہی اے تے ایہناں حالات وچ 2020نوں ترقی تے تبدیلی دا سال قرار دین دے دعوے نیں تے فیر فرماندے نیں کہ کنٹینر تے چڑھ کے جناں وڈا چور اے اوناں زیادہ شور مچا رہیا سی۔ شاید ایہ اوہناں دناں ول اشارہ سی جدوں فرماندے سن جے پٹرول تے ڈالر مہنگا ہووے تے سمجھو تہاڈا وزیراعظم چور اے۔ بقول فیض احمد فیض:
چلی ہے رسم کہ کوئی نہ سر اٹھا کے چلے
ایس رسم نوں موجودہ دور وچ گرفتاریاں دی رسم وی کہہ سکنے آں تے جدوں جھوٹے مقدمیاں دی بھرمار ہووے تے فیر ضمانتاں دے موسم وی آندے نیں پر احسن اقبال تے دوجے لوکاں دے نیڑے گرفتاریاں دا جد کہ ماڈل ٹاؤن لہور وچ چھاپیاں دا موسم چل رہیا اے۔ صد افسوس کہ دنیا دے معاشرے تے ملک آئین تے قنون دے تحت چلدے نیں نہ کہ موسماں دے تحت۔ ساڈے ایتھے کدی گرفتاریاں دا موسم ہوندا اے تے کدی ضمانتاں ، کدی مارشل لاواں دا تے کدی انتخابات دا موسم۔ عوام تے اللہ دے شکر گزار نیں کہ ملک وچ عمران خان دی حکومت اے نہیں تاں حکومتی کارکردگی تے مارشل لاء لگ جاندا جے عمران وزیراعظم نہ بن دے تے عوام ایہ گل دل وچ لے کے دنیا توں چلے جاندے کہ وطن عزیز وچ پٹرول دراصل 27روپے لٹر ہونا چاہیدا اے جے ڈالر مہنگا ہووے تے سمجھو حکمران چور اے شیخ رشید چپڑاسی ہون دے وی لائق نہیں اے۔ چودھری پرویز الٰہی پنجاب دا سب توں وڈا ڈاکو اے ، زرداری سب توں وڈی بیماری اے، اسٹیبلشمنٹ اپنی مرضی دا وزیراعظم لے کے آندی اے وغیرہ وغیرہ بہرحال حکومت اے کہ اک مزاحیہ تھیٹر اے تے ہر کوئی اپنی اپنی جگت سنا کے اگے ودھدا چلا جاندا اے تے فیر لوٹ آندا اے جمع خاطر رکھو گرفتاریاں دی رسماں ہون تے فیر ضمانتاں دے موسم دے بعد مخالفاں دے اقتدار لوٹ آن دے موسم وی آ جایا کردے نیں۔