جس دن نواں کٹھ نہ کیتا سمجھو حیاتی دا اوہ دن اسیں ضائع کیتا

اپنی حیاتی نوں کامیاب کرن لئی تے اپنے سکون لئی نویں نویں تجربے کرنے چاہیدے نیں

فرحانہ مرزا

اج سویرے جد میں سو کے اٹھی تے کافی ویلے تک بستر تے کسملندی لئے کے پئی رئی اٹھن دا دل نہیں سی کر رہیا۔ سوچ رہی ساں اج دا دیہاڑ اوس عام دناں وانگوں ہوئے گا اوہ ای سویرے اٹھ کے نماز سبق دے بعد، کیک رس دا چاء دے کپ نال ناشتہ کراں گی تے فیر کپڑے تبدیل کر کے لگی بندھی 9:00 تو ں 5:00 دی نوکری تے چلی جاواں گی۔ سارا دن بس، ٹرین تے پیدل چلن دی روزمرہ دی روٹین نال نبردآزما ہوواں گی کوئی نویں شے تے ہوئے گی نہیں جد کہ اوس روٹین توں مینوں بوریت محسوس ہون لگ پئی سی۔اج میں سوچیا نہیں اج بڑے اہتمام نال پراٹھا بناواں گی رات دی بھنڈی دا سالن پیا سی اوہ پراٹھے تے چاء نال گرم کر کے کھاواں گی۔ خیر میں ایس منصوبے تے عمل کیتا تے کافی اپنے آپ چ توانائی محسوس کیتی۔ کجھ نواں پن لگا۔ اوس توں بعد لباس دے چنائو دا مرحلہ آیا تے میں اج بارش دا دن سی عام دناں دی نسبت ذرا شوخ رنگ دے کپڑے کڈے۔ تیار ہون دا ارادہ سی۔ اپنے آپ نوں سنوارن لئی ہلکا ہلکا میک اپ کیتا۔ اپنے آپ نوں شیشے وچ تیار ویکھ کے مینوں بڑا چنگا لگا۔ میرا اپنا تجربہ بیان کرن دا ایہہ مطلب سی کہ ہر انسان نوں لگی بندھی روٹین توں ہٹ کے ہر روز کجھ نواں کرنا چاہی دا اے۔ تبدیلی تے فیر رب دا، فطرت دا، کائناتی اصول اے۔ موسماں دی گل لئے لووں جے اووی ناں بدلن تے کائنات چ خوبصورتی ناں رہوے۔ دن رات دی تبدیلی وی انسان نوں درس دیندی اے کہ ہر دن نویاں خوشیاں لئے کے آندا اے۔ دن تے رات رب ے سانوں دان کیتے نیں۔ ایہہ ساڈی ذمہ داری اے کہ اسیں اوہدے چ رنگ کسطراں بھرنے نیں ۔ پھیکے رنگ، گُوڑے رنگ، خوشی دے رنگ، اداسی دے رنگ، ایہہ ساری کھیڈ ساڈے دل و دماغ تے مزاج دی اے۔ جد رب سانوں ہر نویں دن دا موقع دیندا اے تے سانوں وی ایس موقعے توں پورا پورا فائدہ چکنا چاہیدا اے۔
جیہڑے لوکی ہر دن لگی بندھی روٹین نال حیاتی گزاردے نیں اوہ بوریت محسوس کرن لگ پیندے نیں اوہناں دی حیاتی چ کوئی رنگ نہیں ہندا اوہ فرسٹریشن دا شکار ہو جاندے نیں اپنے نال نال گھر والیاں، یاراں، بیلیاں دی حیاتی نوں وی مایوسی تے اکلاپے چ پا دیندے نیں اوہ اپنے آپ نوں کولہو دے تیل وانگوں ساری حیاتی واندے رہندے نیں کھتوں دے ڈڈو وانگوں حیاتی لنگاندے نیں تاں اوہ زندگی دی رنگینیاں چ مزا لیندے نیں ناں بچیاں نوں رشتہ داراں چ، پارک چ کدے وی نہیں لئے کے جاندے۔ ساری حیاتی آپ وی ترسدے رہندے نیں تے، ترساندے وی رہندے نیں۔
فطرت دا اصول Variation اے تے جیہڑے لوکی ایدھے توں منہ موڑ دے نیں دراصل اوہ فطرت دے نال نہیں ٹردے تے نالے اوہ کھلم کھلا بغاوت کردے نیں۔ اپنی حیاتی دُکھ وچ گزارن دے نال نال سب آلے دوالے والیاں نوں وی حیاتی دے مزے نہیں چکھن دیندے نیں ایس گل تے ای غور کرو کہ کوئی وی بندہ ساری رات اک پاسے نہیں سو ں سکدا۔ ایہہ فطرت دا اصول اے حتیٰ کہ رات نوں سون نال ساڈے مردہ خلیاں دی تھاں نویں خلیے پیدا ہوندے نیں۔نیند وی اک نیم موت اے۔ سون توں بعد روح جسم دی قید توں آزاد ہو جاندی اے تے فیر رب دے حکم نال جسم چ واپس آندی اے تے حیاتی دی چہل پہل شروع ہو جاندی اے۔
کجھ لوک اپنے آپ نوں Entertain کرن لئی باہر دوستیاں پالدے نیں پر ایہہ Entertanment بہتی دیر تک نہیں نبھدی کیونکہ دوستاں نے ٹھیکہ نہیں لیا ہویا کہ کسے نوں لطف اندوز مسلسل کرے شادی شدہ لوکی باہر منہ مارن لگ پیندے نیں تاکہ اوہناں نوں کجھ نواں لبھے جے گھر چ بیوی خاوند نوں کھان پین چ، اپنے آپ نوں تیار کرن چ گھر دی سیٹنگ بدلن چ نواں کرن لگ پین تے حیاتی چ نواں پن آنا شروع ہو جاوے گا نتیجہ اے کہ سانوں اپنے آپ نوں آپے ای Entertain کرنا اے کجھ نواں کر کے۔ ہر دن کجھ تے ایسا نواں کریئے کہ جیہڑا ساڈی حیاتی چ ہر دن یادگار بن جاوے۔ آسان توں آسان اے کہ گھر جائو تے ہسدے، مسکراندے ہوئے جائو۔ کوئی تھوڑی جیہڑی شے اپنے پریوار لئی لئے جائو، کدی اوہناں نال مل کے پارٹی، پارٹی کرو، راہ جاندیاں ہوئے کسے پتھر نوں ای راہ توں ہٹا دیو جے کوئی بزرگ جا رہیا اوہدے ہتھوں سامان پھڑ کے گھر تک پہنچا دیو۔ کسے نوں سڑک پار کرا دیو جے گڈی تے موٹر سائیکل تے او کسے نوں لفٹ دے دیو۔ ایناں تے کوئی مُل نہیں لگدا لیکن تہانوں دلی اطمینان تے سکون مل جاوے گا۔
پتہ نہیں لوکی نویں تجربے کرن توں کیوں ڈردے نیں حیاتی برف دی سیل اے جیہڑی دن بدن پگھل رہی اے ہر جاندے دن نوں یادگار بنائو۔ اپنی حیاتی ضائع نہ کرو بلکہ اینوں اپنے لئی تے دوجیاں لئی مفید تے کارآمد بنائو۔ دنیا تے عمل کرن آئے آں تے ہر روز ہر پل عمل دی دعوت نوں قبول کرو۔ سانوں حیاتی موقع دے رہی اے ہر روز کوئی کم از کم اک کارا ایہوں جیا نواں کرو کہ حیاتی چ بوریت دی بجائے نواں پن آوے تے سانوں لگے کہ اج اسیں کجھ نواں کیتا اے جنہوں کر کے اسیں اطمینان حاصل کریئے پاویں کارا نکا ہووے لیکن اج دا دن ضائع نہیں ہویا۔
اپنی حیاتی نوں کامیاب کرن لئی تے اپنے سکون لئی نویں نویں تجربے کرنے چاہیدے نیں جسطراں ہر رات دے بعد دن تے تنگی دے بعد آسانی اسیں جے اسیں دوجیاں لئی آسانیاں پیدا کراں گے تے سانوں وی اپنی حیاتی چ نواں پن لگے گا۔
پر اک دن حیاتی لنگ ای جانی ایں پر گل اے کہ کسطراح لنگانی ایں نگی بندھی روٹین نال یا کہ کجھ بدل بدل کے۔ حیاتی دا بدلائو ساڈے اپنے ہتھ چ اے۔ اپنی حیاتی نوں نویں پن نال جیوئو اپنے آپ نوں وی سکون دیو پاویں تھوڑی جئی تبدیلی لیائو کجھ وی… تھوڑا جیا نواں کر کے تے ایس گل دی عملی تصویر بنو کہ ہر دن کجھ نواں کریئے تے اپنی حیاتی ضائع نہ کر یئے۔ اپنی حیاتی نوں ہن تبدیل کریئے تے نویں نویں حیاتی دے پینڈے تے پیئے۔ بھرپور حیاتی دا مزا لیئے۔