کیہ جسٹس ٹروڈو اک ہور چیلنج لئی تیار نیں؟

لکھت:مطلوب وڑایچ

21اکتوبر 2019ء دیہاڑے کینیڈا وچ وفاقی پارلیمنٹ دے الیکشن ہوئے جہدے وچ ملک دیاں چارے سیاسی جماعتاں نے حصہ لیا تے اک کولیشن حکومت دی نینہہ رکھی گئی۔ کینیڈا دی کل آ بادی 3کروڑ 70 لکھ تے پارلیمنٹ دی 338 سیٹاں نیں جہناں وچوں 111 امیگرینٹس اقلیت والے گروپاں نے جتیاں تے ایہناں وچوں تن پاکستانی نژاد جد کہ کل 12 مسلمان پارلیمنٹ وچ اپنی تھاں بنان وچ کامیاب ہوئے۔ کینیڈا دے نظام حکومت وچ سینیٹراں دی گنتی 105 اے جہناں وچ اک پاکستانی نژاد سینیٹر وی اے۔ کینیڈا دی کل آبادی دا صرف 3.2 فیصد مسلماناں تے مشتمل اے جد کہ سب توں وڈے صوبے انٹاریو وچ ست فیصد رجسٹرڈ مسلمان ووٹر نیں۔ کینیڈا دے دس صوبے نیں جد کہ اوہدے زیرتسلط تن انتظامی علاقے وی نیں۔ پچھلے الیکشن وچ لبرل پارٹی نے 155 سیٹاں جتیاں جد کہ این ڈی پی پارٹی نے 24 سیٹاں جت کے لبرل پارٹی دے نال کولیشن گورنمنٹ بنائی۔ کینیڈا دی دوجی وڈی سیاسی جماعت کنزرویٹو پارٹی نے 119 سیٹاں جت کے اپوزیشن دی وڈی جماعت ہون دا اعزاز حاصل کیتا جد کہ کیوبک بلاک نامی سیاسی پارٹی نے 32 سیٹاں دے نال تریجی پوزیشن حاصل کیتی۔ 2سیٹاں گرین پارٹی تے پنج سیٹاں آزاد امیدواراں نے جتیاں۔
دوستو! لبرل پارٹی نوں ایس ویلے جسٹس ٹروڈو لیڈ کر رہے نیں تے اوہو وزیراعظم نیں جد کہ اوہناں دے آنجہانی باپ ٹروڈو سینئر وی وزیراعظم کینیڈا رہ چکے نیں جد کہ این ڈی پی پارٹی دے سربراہ جگمیت سنگھ نیں۔ یاد رہوے انڈین ہندو تے سکھاں دی اک چنگی بھلی وڈی گنتی پارلیمنٹ وچ موجود اے سکھاں تے ہندوئواں دی گنتی پارلیمنٹ وچ 16 اے جد کہ کیوبک بلاک پارٹی دے سربراہ مسٹر بلاشے نیں۔ کنزرویٹو پارٹی دے سربراہ آئرن ٹول نیں جد کہ دو پاکستانی نژاد عورتاں اقرا خالد تے سلمیٰ زید لبرل پارٹی دے پلیٹ فارم توں پارلیمنٹ دی رکن نیں۔ محترمہ سلمی عطا اللہ جان سینیٹ دی رکن نیں۔
دوستو: وزیراعظم ٹروڈو نے سیاسی بلیک میلنگ توں تنگ آ کے اپنے اتحادی این ڈی پی پارٹی توں جان چھڑان لئی وسط مدت الیکشن کران دا اعلان کرکے نارتھ امریکہ دی سیاسی فضاواں وچ ہلچل مچا دتی اے کیوں جے پچھلے الیکشن صرف بائی مہینے پہلاں ہوئے سن تے بظاہر جسٹس ٹروڈو دی لبرل پارٹی کافی مضبوط وکھائی دے رہی سی کیوں جے پچھلے اٹھاراں مہینے توں ودھ عرصے وچ کرونا نے پوری دنیا وچ معاشی تباہی پھیلائی ہوئی اے پر کینیڈا سرکار نے کرونا پاروں جہڑے لوکاں دی ملازمت ختم ہوئی اے یاں اوہناں دی انکم وچ کمی آئی اے اوہناں لوکاں نوں فی کس دو ہزار کینیڈین ڈالر ہر مہینے دتے گئے نیں جد کہ چھوٹے بزنس جیویں ریستوران‘ گروسری شاپس‘ باربرشاپس تے سمال انڈسٹریز نوں ہر رجسٹریشن تے تقریباً ڈیڑھ ڈیڑھ لکھ ڈالر کینیڈین حکومت ولوں بزنس سپورٹ پروگرام دے تحت دتے گئے نیں۔ اک محتاط اندازے موجب کرونا نال متاثر ہون والے بزنس تے اٹھ ملین توں ودھ بندیاں نوں تقریباً 90ارب ڈالر دی سپورٹ دتی گئی اے۔ ایہو وجہ اے کہ سیاسی تجزیہ نگاراں دے مطابق کینیڈین لوکاں دی ایس ویلے زیادہ تر ہمدردیاں جسٹن ٹروڈو دی لبرل پارٹی دے نال جڑیاں نظر آئوندیاں نیں تے ایہو وجہ اے کہ اوہناں نے یکدم پارلیمنٹ توڑ کے نویں الیکشن دا اعلان کر دتا جہڑا 20ستمبر نوں ہون جا رہیا اے۔
دوستاں دی دلچسپی لئی ایتھ یایہ گل میں دسدا جاواں کہ 31مئی 2000ء توں لے کے ہن تک کینیڈا وچ ہون والے سارے وفاقی‘ صوبائی تے بلدیاتی الیکشن ووٹنگ مشین راہیں کروائے گئے نیں۔ ایتھے ایہ گل ذکر جوگ اے کہ ہر پارٹی اپنے امیدوار نوں جہڑا کہ پرائمری سطح توں پارٹی دی حمایت حاصل کرکے اگے آئوندا اے تے امیدوار نامزد ہو جان دے بعد پارٹی فنڈز توں اوہدا الیکشن لڑیا جاندا اے تے ایس توں علاوہ امیدوار اپنی ذاتی کاوشاں نال فنڈ ریزنگ ڈنر آرگنائز کردے نیں تے ایہدے توں حاصل ہون والے چندے نوں اپنی الیکشن مہم وچ استعمال کردے نیں۔ یاد رہوے کہ اک عام کینیڈین جے کسے سیاسی پارٹی نوں چندا دیندا اے تے اپنے ٹیکس توں کٹوتی وی کر لیندا اے یعنی دوجے لفظاں وچ سیاسی چندے نوں اک مکمل قنونی حیثیت حاصل اے۔
مینوں اک واری میرے یورپین گورے استاد نے ایہ دسیا سی کہ تہانوں پتہ اے کہ اج اک امریکن ڈالر سو روپیاں دے برابر کیوں اے فیر اوہنے آپ ای جواب دتا کہ اک سو پاکستانی جناں اپنے نال پیار کرے نیں تے صرف اک امریکی اوناں اپنے ملک نال پیار کردا اے تے جس دن پاکستانیاں دا پیار امریکی لوکاں ورگا ہووے گا تے ڈالر تے روپیہ اک برابر ہو جان گے۔ الیکشن وچ اجے اک مہینہ باقی اے تے حالات کوئی وی رخ اختیار کر سکدے نیں پر حقیقی فتح کینیڈین لوکاں دی ای ہووے گی۔٭٭