تن ورھے دی کارکردگی پر…

لکھت: مظہر برلاس

اج کل تحریک انصاف اپنی تن ورھے دی کارکردگی دے سلسلے وچ تقریباں وچ مصروف اے ظاہر اے حکومتی وزیر تے ترجمان ایہنوں چنگی کارکردگی کہن گے پر جے حقیقت دی اکھ نال ویکھیا جاوے تے ایس شاندار کارکردگی وچ ہن وی کجھ پہلو توجہ طلب نیں۔ جے تحریک انصاف نے ایہناں پہلوئواں ول دھیان دتا تے اوہدے لئی اگلا الیکشن بڑا سوکھا ہو جاوے گا تے جے پی ٹی آئی حکومت عام بندے دی جھولی وچ خوشحالی تے اطمینان دے ثمرات نہ لیا سکی تے فیر یقینا اوہنوں ڈھیر اوکڑاں دا سامنا کرنا پوے گا۔ پی ٹی آئی حکومت دی کارکردگی پرکھن لئی سانوں تن چار زاویاں نال جائزہ لینا ہووے گا۔ سانوں ویکھنا پوے گا کہ اوہ سیاسی طور تے کتھے کھڑی اے۔ سماج وچ اوہدے بارے کیہ رائے اے‘ کارکردگی دا جائزہ لین والے اداریاں دیاں رپورٹاں کیہ کہہ رہیاں نیں۔ داخلی تے خارجی محاذ تے تحریک انصاف دی حکومت نے اجے تک کیہ کم وکھایا اے؟۔
سیاسی اعتبار نال پی ٹی آئی دا سفر کامیابی نال جاری اے پچھلے تن ورھیاں وچ سیاسی مخالفین کمزور ہوئے نیں آپس وچ الجھے نیں تے کسے وی سطح تے حکومت نوں ٹف ٹائم دین وچ بھیڑی طرح نکام رہے نیں۔ پی ٹی آئی دی خوش قسمتی اے کہ مخالف سیاسی جماعتاں دا سفر تنزلی ول جاری اے۔ ایہدیاں کجھ نشانیاں حالیہ انتخابی معرکیاں وچ نظر آئیاں نیں۔ تحریک انصاف جہڑے علاقیاں وچ کمزور سی اوتھوں اوہدا ووٹ بینک ودھیا اے۔ ہن تحریک انصاف سنٹرل پنجاب وچ مضبوط ہوندی نظر آ رہی اے۔ مخالفین دعوے تے بہت کردے نیں پر اوہ گلگت بلتستان دا الیکشن ہار جاندے نیں۔ آزادکشمیر وچ اوہناں نوں شکست دا سامنا کرنا پیندا اے۔ پی ٹی آئی دی سب توں وڈی مخالف پارٹی ن لیگ وسطی پنجاب دے اوہناں حلقیاں توں ہار رہی اے جتھے پچھلے چالھی ورھیاں توں اوہناں دا راج سی۔ ایہدے وچ کوئی شک نہیں کہ ہن سوائے صوبہ سندھ دے ہر تھاں عمران خان دی حکومت اے۔ ایہدے وچ وی کوئی شک نہیں کہ عمران خان نہ ایوب خان دے راہیں سیاست وچ آیا اے تے نہ ای ایہ ضیاء الحق دی سرپرستی وچ سگوں عمران خان نوں اپنی بائی سالہ جدوجہد وچ رکاوٹاں توں علاوہ مخالفتاں تے سازشاں دا وی مقابلہ کرنا پیا۔ لہور وچ اوہنوں گرایا جانا اک وڈی سازش سی ایہ اجہی سازش سی کہ عمران خان اٹھ ای نہ سکے قدرت نے اوہنوں ہمت دتی تے اوہ پہلے توں وی وڈا خطرہ بن کے مخالفین دے سامنے آیا۔ اوہنے پاکستان دے وڈے سیاسی بُتاں نوں توڑیا۔ کجھ تے بہانے بنا کے ملک چوں نس گئے جہڑے رہ گئے اوہ پریشان نیں کہ آخر کریئے تے کریئے کیہ؟ اوہ سوچدے نیں کہ اسیں تے اوہنوں اک ملک دتا سی جو دیوالیہ ہون دے نیڑے سی ایہ معیشت دی بیڑی نوں بھنور چوں کیویں کڈھ لیایا اے؟ خیر میں تے سیاست دی گل کر رہیا سی سیاست وچ مخالفین نوں پچھاڑ کے رکھ دین والے عمران خان دی اگلی منزل سندھ اے‘ جتھے پیپلزپارٹی دا راج اے پر پیپلزپارٹی نوں وی اوکڑاں دا سامنا اے۔ عمران خان نے وفاق دی سطح تے ای نہیں دوجیاں تھاواں تے وی سیاسی بُتاں نوں توڑیا اے اوہنے پنجاب‘ خیبرپختونخوا تے گلگت بلتستان وچ ماڑے علاقیاں توں وزرائے اعلیٰ سامنے لیا کے مخالفین توں علاوہ اپنی پارٹی دے لوکاں نوں وی حیران کر دتا ایہو رویہ آزادکشمیر وچ اپنایا۔
پی ٹی آئی بارے سماجی رویہ ویلے دے نال نال ٹھیک ہوندا جا رہیا اے لوکاں دا خیال اے کہ عمران خان ملک نوں ٹھیک کر لوے گا۔ لوکاں نوں اوہناں پالیسیاں نال وی اتفاق اے پر نال ای لوک مہنگائی دے قصے وی سناندے نیں۔ عمران خان جے ہور زیادہ مقبول ہونا چاہندے نیں تے اوہناں نوں مہنگائی دے جن تے قابو پانا ہووے گا۔داخلی محاذ تے ایہ گل ٹھیک اے کہ عمران خان دی حکمت عملی پاروں ملک دیوالیہ ہون توں بچ گیا۔ اج زرمبادلہ دے مناسب ذخیرے ساڈے کول نیں ساڈی برآمدات وچ وادھا ہویا اے ٹیکس اکٹھا کرن دی شرح ودھی اے۔ ساڈی جی ڈی پی دی شرح ودھی اے‘ پاکستان نے بہت ساریاں چیزاں بنانا شروع کر دتیاں نیں۔ ساڈی تباہ حال ٹیکسٹائل انڈسٹری چل پئی اے ہن اوہدے کول دنیا بھر توں آرڈر نیں مزدوراں لئی روزگار دے بوہے کھل گئے نیں۔ کسان پی ٹی آئی دی پالیسی نوں پسندیدگی دیاں نظراں نال ویکھ رہیا اے کسان خشحال ہویا اے ملک وچ زرعی انقلاب لیان لئی کئی منصوبیاں تے کم جاری اے۔ جیویں ای مڈل مین دا کردار ختم ہووے گا تے کھان پین والیاں لوکاں لئی سستیاں ہو جان گئیاں۔ ملک وچ نویں جنگلات لائے جا رہے نیں‘ ڈیمز بن رہے نیں‘ صحت کارڈ تقسیم ہو رہے نیں‘ یکساں نصاب اپنان دی پالیسی نوں لوک بڑا پسند کر رہے نیں۔
ایہدے وچ کوئی شک نہیں کہ عمران خان قومی لباس تے قومی زبان نوں رواج دین دی پالیسی تے گامزن نیں پر ملکی سسٹم وچ خرابیاں نوں دور کرن لئی اوہناں نوں ایس گلے سڑے نظام نوں بدلنا پوے گا اوہناں نوں جوڈیشل سروس وی بنانی پوے گی اوہناں نوں مقابلے دے امتحان وی اپنی زبان وچ کروانے ہون گے عام بندے دی عزت نوں بحال کرنا ہووے گا کرپشن بارے گلاں ہوندیاں نیں جو ایس دور وچ وی نہیں رک سکیاں‘ ایہناں نوں ختم کرنا ہووے گا عمران خان غلامی دے سنگل تروڑ کے قوم دی ترجمانی کر رہے نیں جدوں اوہدی حکومت آئی سی تے پاکستان خارجی سطح تے اکلاپے دا شکار سی پر اج عمران خان دی تن ورھے حکومت دے بعد پاکستان عالمی سطح تے بڑا اہم بن چکیا اے۔ افغانستان دی حالیہ صورتحال تے ساڈا دشمن دھول چٹ رہیا اے تے اسیں دنیا دے لوکاں نوں کابل چوں کڈھ رہے آں۔ دنیا دے کافی ملکاں دے سربراہ سانوں فون کر رہے نیں خارجی محاذ تے کامیابیاں ٹھیک‘ سیاحت‘ زراعت‘ صنعت‘ ثقافت تے تعمیرات ول دھیان تشفی آمیز پر بیروزگاراں نوں روزگار چاہیدا اے لوکاں نوں زندگیاں وچ آسانیاں چاہیدیاں نیں لوکاں نوں گھر تے گھردے آنگن وچ خوشحالی چاہیدی اے۔ بقول علامہ اقبال:
آئین نو سے ڈرنا، طرز کہن پہ اڑنا
منزل یہی کٹھن ہے قوموں کی زندگی میں