چلدا پھردا مرحوم

حمیداحمد سیٹھی

خدا دی بنائی ہوئی دنیا وچ اوہدے بندے ننگے پیریں‘ ننگے پنڈے‘ موسمی سختیاں چوں گزردے کھلے اسمان دے تھلے رہندے تے سوندے‘ اوہدی دتی ہوئی فہم تے عقل استعمال کرکے اج کل اعلیٰ تے شاندار ترقی یافتہ حیاتی گزار رہے نیں۔ اج دی ای گل اے میں پرانے‘ بھولے بسرے غیرضروری لوکاں دے ناں اپنے موبائل فون توں ڈیلیٹ کر رہیا سی اچانک اک دوست دا ناں جہدے نال پہلی ملاقات 48 ورھے پہلاں ہوئی سی موبائل فون دی سکرین تے نظر آیا۔ پہلے سوچیا ایہنوں ڈیلیٹ ای کر دیواں کیوں جے رابطے وچ تسلسل نہیں رہیا فیر اک دلچسپ واقعہ یاد آن تے ارادہ بدل دتا۔ فیر خلاف توقع اوہنے میرے فون دی پہلی رنگ تے کال لے لئی تے ماضی دی یاد نے بوہا کھول دتا۔
میری کوہ مری وچ تعیناتی سی جدوں میری ملاقات سندھ دے اک سابق مرحوم وزیراعلیٰ دے پُتر نال ہوئی۔ میرے دوست شیخ لطف الرحمن وی کراچی توں آ کے میرے کول ٹھہرے ہوئے سن۔ اوہنوں دوستیاں نبھان وچ کمال حاصل سی۔ اوتھے شیخ لطفی دی ملاقات سابق مرحوم وزیراعلیٰ دے پُتر نال ہوئی سی جو کجھ دیہاڑیاں وچ ای گہری دوستی وچ ڈھل گئی۔ سندھ دے ایس وڈیرے نوں ریوالور تے پسٹل جمع کرن دا بڑا شوق سی۔ مری وچ قیام دوران اوہنے دس باراں پسٹل ریوالور ملاقاتیاں توں لے کے اپنا باکس بھر لیا اے تے فیر باکس اپنے ملازم دے حوالے کرکے اوہنوں ٹرین توں کراچی ٹور دتا۔ دوجے دن لطفی نے فلائٹ پھڑی تے کراچی ٹر گئے۔ ایہ دوویں ایئرپورٹ تے مقررہ وقت تے ریل آن تے باکس والے ملازم نوں لبھدے رہے اوہ نہ ملیا تے پریشان ہوئے۔ تن دیہاڑ بعد مینوں سٹی مجسٹریٹ جہلم دا فون آیا کہ گرفتار بندے نے بمشکل تہاڈا ناں دسیا اے۔
واقعہ ایہ ہویا اے کہ ریلوے پولیس نے اک عام جہے مسافر دے کول بڑا قیمتی باکس ویکھ کے تلاشی لئی تے باکس وچوں اک توں اک قیمتی ریوالور تے پسٹل ن کلیا۔ پچھ گچھ تے اوہنے صرف ایناں دسیا کہ ایس بارے وچ سیٹھی صاحب ای کجھ جاندے ہون گے۔ اوہ ملزم ایس ویلے گرفتار تے جیل وچ اے۔ میں شیخ لطفی نال فون تے گل بات کیتی تے اوہنے آکھیا اوہ سندھی وڈیرا وی پریشان اے اک گھنٹے دے بعد مینوں شیخ لطفی نے کہیا اوہ اگلی صبح پہلی فلائٹ توں راولپنڈی اپڑے گا۔ میں اوہنوں ایئرپورٹ تے ملاں‘ جتھوں اسیں جہلم جاواں گے تاں جے ملازم دی ضمانت کرائی جاوے۔ ملازم دی ضمانت میں ای کرائی تے اوہنوں ٹرین توں کراچی ٹوریا۔ میرے لئی بہرحال ایہ ناپسندیدہ کم سی پر مجبوری سی کہ وزیراعلیٰ دے پُتر دے ملازم دی گرفتاری دی سٹوری اوہناں دے مخالفین نوں پتہ چلدی تے تماشا وکھرا لگدا۔ ہن اک ہور مشکل ایہ آن پئی کہ ضمانت تے چھڈے گئے تے ملزم نوں ہر پیشی تے کراچی توں آ کے جہلم دی عدالت وچ پیش ہونا سی تے بھاویں معاملے دا میرے نال کوئی تعلق نہیں سی پر ملزم دی رہائی دی ضمانت میں دتی ہوئی سی۔ ایس طرح میرا تعلق ملزم دی ضمانت دین دی حد تک تے ہے سی۔ کجھ مہینے بعد پتہ لگا کہ ملزم دی ضمانت منسوخ ہو کے اوہدے وارنٹ گرفتاری جاری ہو چکے نیں۔
جناب صاحبزادے نے پوری گل دس کے سپرنٹنڈنٹ پولیس توں مدد چاہی۔ اوہنے دو دن دی مہلت منگی تے تریجے دن اک ایف آئی آر وڈیرے نوں پیش کیتی جہدے مطابق ملزم اک روڈ ایکسیڈنٹ وچ ماریا گیا سی تے نال اک میڈیکل رپورٹ جہدے مطابق اوس ملزم دی موت Confirm ہو گئی اوہنے دوویں رپورٹاں جہلم گھل دتیاں تے ایس طرح قصہ ختم۔ ایہ اکلوتی کہانی نہیں ایہدے نال ملدیاں جلدیاں کہانیاں ساڈے ہر شہر وچ اینیاں نیں کہ ایہناں تے کتاباں لکھیاں جا سکدیاں نیں۔٭٭

اپنا تبصرہ گھلو