کاغذی ہمسفر بمقابلہ حقیقی شریکِ حیات

منحرف رہنما پی ٹی آئی تے رکن قومی اسمبلی ڈاکٹر عامر لیاقت مرحوم دی حیاتی ہمیشہ سرپرائز نال معمو رہی۔ آئے دن سوشل میڈیا اتے اوہناں دی خبراں گردش کردی رہندیاں سن۔ حتیٰ کہ اوہناں دی ناگہانی موت وی کسے سرپرائز توں گھٹ نہیں سی۔ ساریاں نوں پتہ اے کہ ڈاکٹر عامر لیاقت دی سیاسی’ سماجی’ نجی زندگی تنازعات نال بھرپور رہی۔ عامر لیاقت دی تیجی اہلیہ نے گھریلو ناچاقی تے انتہائی سرعت دے نال تنسیخ نکاح دا دعویٰ بمعہ حق مہر’ نان و نفقہ دائر کردتا۔ بس فیر کیہ ہویا یوٹیوبراں دی وڈی تعداد نے عامر لیاقت دی تیجی اہلیہ دے گھر دا رخ کر لیتا۔ اوہناں انٹرویو وچ محترمہ نے بڑے بے باک تے بولڈ قسم دے انکشافات کیتے۔ ایہہ وی بیان ریکارڈ کروایا کہ میرے کول بہت سارے ایسے ثبوت نیں جہناں وچ عامر لیاقت دی حقیقت عیاں ہو جاوے گی۔ ”ایہہ جیسے نظر آندے نیں ویسے نہیں نیں” تماش بین’ سفلہ مزاج یوٹیوبراں دے ہتھ اک گل آ گئی کہ جہدے توں اوہ ریٹنگ دے چکراں وچ اخلاقی حدودو قیود نوں پار کر گئے۔ عامر لیاقت دی ایسی ویڈیوز وائرل کر دتی گئیاں جہڑی براہ راست اوہناں دے ستر دے زمرے وچ آندیاں سن۔ایہہ اٹل حقیقت اے کہ جہڑے انسان نے اپنی عمر عزت’ مشہور و
معروف ہون وچ صرف کردتی ہووے جے اوہدی عزت دی دھجیاں اڈا دتیاں جان تے اوہدی زندگی دے دن بہت تھوڑے رہ جاندے نیں۔ عامر لیاقت دی تیجی اہلیہ دی ایس احمقانہ حرکت نے پاکستانی معاشرے وچ سو سوال کھڑے کردتے نیں۔ عالم خلوت وچ ویڈیوز بنان دا جواز کیہ بندا اے؟ اج کل طلاق دے کیساں وچ ریکارڈ وادھا ہو رہیا اے۔ جہناں جوڑیاں دا آپس وچ نباہ نہیں ہوندا تے کیہ اوہ اک دوجے دی خلوت وچ بنائی گئی تصویراں یا ویڈیو سوشل میڈیا اتے اپلوڈ کر دین تاں جے اوہ شرم نال مر جاوے تے کسے قابل نہ رہوے۔ ایس طرح تے بدی دا بوہا کھل
جاوے گا ۔ لوک نکاح جئے مقدس رشتے دی قدر کرنا چھڈ دین گے کہ ایہہ بندھن وی محفوظ نہیں اے تے کیوں نہ فیر بے راہ روی نوں ای ترجیح دے دتی جاوے۔ جے سائبر کرائم ونگ نے ایس واقعہ دا سختی نال نوٹس نہ لیتا تے بلیک میلراں دی چاندی ہو جاوے گی فیر خاص مقصد دے تحت راہ چلدی زنانی یا مرد دی کوشش ہوے گی کہ اوہ نکاح کرے تے ننگی ویڈیوز بناوے تے بلیک میل کردے ہوئے بھاری رقم دا تقاضا کرے۔ بالآخر وفا’ اعتماد’ محبت دا جنازہ نکل جاوے گا جہڑے رشتے دی بنیاد انتہائی پائیدار ہونی چاہیدی اے۔
روایتوں کو نبھانے کا تھا سلیقہ اسے
وہ بے وفائی بھی کرتا رہا وفا کے ساتھ
حضرت واصف علی واصف زوجین دے تعلق اتے زوردیندے ہوئے فرماندے نیں کہ ”میاں بیوی نوں باغ و بہار وانگوں ہونا چاہیدا اے۔ اوہ باغ ای کیہ جہڑا بہار توں بیگانہ ہووے تے اوہ بہار ای کیہ جہڑی باغ توں نہ گزرے۔ ایہہ اوہدے دم نال اوہ اوہدی وجہ نال”۔
قارئین اپنے وڈے’ بزرگاں توں سندے آئے آں کہ جوڑے اسماناں اتے بندے نیں لہٰذا میاں بیوی دا ملنا نصیب نال اے۔ دونواں دا وسنا برداشت تے قربانی نال اے تے جنا مرضی برادشت کر لوو’ گھر نہیں چل سکدا۔ گھر اوسے ویلے چلدا اے جدوں دونویں اپنے اپنے حصے دا برداشت کرن۔ میاں بیوی دا رشتہ ”مرکزی رشتہ” کہلاندا اے جہدے توں طفیلی رشتے جنم لیندے نیں۔ سب توں ودھ قریب ہون دے کارن ایہہ رشتہ بہت نازک ہوندا اے۔ ایہنوں ٹٹن وچ وی ذرا دیر نہیں لگدی۔ اسلام نے ایسا نظام معاشرت عطا فرمایا اے جہدے وچ انسانی زندگی تے ہر طبقے دے افراد دے حقوق و فرائض متعین کر دتے گئے نیں۔ قرآن نے ایس محبت بھرے رشتے نوں
”اک دوجے دے لباس” نال تشبیہہ دتی۔ لباس نہ صرف انسان دے جسمانی عیب نوں لکا کے پردہ پوشی کردا اے بلکہ اوہدے حسن تے خوبصورتی وچ وادھے دا کارن بندا اے۔ مطلب ا یہہ کہ دونواں دی عزت سانجھی اے۔ دونویں اک دوجے دی عزت دے محافظ نیں۔ اک دوجے دے عیب تے رازاں دی حفاظت دے امین نیں۔ عصر حاضروچ زنانی تے مرد اک دوجے دا اعلیٰ لباس ہوندے نیں جدوں اک سماج’ خاندان’ تعلیم’ صحت’ معاش’ سیاست تے دین داری’ الغرضیکہ ہر شعبہ زندگی وچ اک دوجے نوں سپورٹ کر رہے ہوں’ اک دوجے دی ترقی دا کارن بن رہے ہون نہ کہ ”لباس” دے بخیے ادھیڑ رہے ہون۔ میاں بیوی دے رشتے وچ کوئی ”فاصلہ یا پردہ” نہیں ہوندا۔ بس اک اعتماد’ بھروسہ ہوندا اے۔ وفادار تے پاکیزہ زنانی مرد دا غرور ہوندی اے۔ زنانی دی فرمانبرداری اک ایسی عادت اے جے کسی زنانی وچ پائی جاوی تے اوہنوں گھر دی ملکہ بنا دیندی اے۔ کائنات وچ رنگ ورونق زنانی دے دم نال اے۔ زنانی چاہوے تے اک حیوان صفت بندے نوں انسان بنا دیندی اے تے اپنی درشت مزاجی نال چنگے انسان نوں حیوان بنا دیندی اے۔ زنانی گھر نوں جنت اپنے رویاں نال بناندی اے۔ بدقسمتی نال ساڈے معاشرے وچ ایسا وی
ہوندا اے کہ جیویں شوہر گھر دی دہلیز پار کردا اے تے کجھ زنانیاں دانستہ طور تے بیمار پے جاندیاں نیں’ سر پھڑ کے بیٹھ جاندیاں نیں یا رونا شروع کر دیندیاں نیں یا دن بھر دی شکایتاں دے انبار لا دیندیاں نیں۔ ایسی زنانیاں توں التماس اے کہ اوہ رشتے دی اہمیت تے نزاکت دا خیال رکھن۔مرد دی وفا دا پتہ زنانی دی بیماری وچ چلدا اے جد کہ زنانی دی وفاداری مرد دی بیروزگاری ویلے پتہ چلدی اے کہ اوہ کاغذی ہمسفر اے یا حقیقی شریک حیات۔بلاشبہ حیاتی دی تلخیاں وچ خوش مزاج بیوی دا ساتھ اللہ رب العزت دی وڈی نعمت اے لہٰذا اپنی وفادار شریک حیات دی قدر کرو۔