بدنام سیاسی قیادت

عوام نوں شریک اقتدار کرنا ای جمہوریت اے تے اصل جمہوریت ایہہ اے کہ عوامی مسائل وچ کمی آوے لیکن رائج جمہوریت کولوں عوام دا بھلا تے نہیں ہویا مگر مالی بدعنوانی نوں فروغ ملیا اے۔ پرویز مشرف مگروں ملک وچ آکھن نوں تے جمہوریت دا تسلسل اے لیکن کسے کولوں وی ایہہ پچھ لیتا جاوے کہ کیہ عوامی مسائل وچ کمی آئی اے؟ تے جواب مکمل طور تے نفی وچ ہووے گا۔ زرعی ملک دے عوام نوں آٹے سنے روزمرہ دی شیواں وچ کمی دا سامنا اے۔ مہنگائی 30فیصد تک پہنچ چکی اے۔ روزگار دے موقعے مسلسل گھٹ ہو رہے نیں۔خام مال مہنگا ہون نال صنعتی پیداوار متاثر ہون نال برآمدات وچ کمی ہون لگی اے۔ قرضیاں وچ بے تحاشا وادھے نال تریخ وچ پہلی واری وطن عزیز اتے دیوالیہ دے بدل منڈلا رہے نیں لیکن مذکورہ مسائل دا حل تلاش کرن دے بجائے سیاسی قیادت بے نیاز نظر آندی اے البتہ اقتدار دی جنگ وچ سارے چوکس نیں۔ ایسے طرز عمل نال اوہدی ساکھ متاثر ہو رہی اے تے عوام دے ذہناں وچ ایہہ خیال تقویت پھڑ رہیا اے کہ موجودہ سیاسی قیادت نوں ملک وقوم توں ودھ اقتدار نال دلچسپی اے مگر لگدا اے کہ سیاسی قیادت نوں لاحق خطرات دا احساس تک نہیں ‘ایس لئی بدنامیاں سمیٹن تے حریف سیاسی قوتاں نوں دے مقابلے توں دستبرداری اتے تیار نہیں۔ سیاسی ماحول اینا پراگندہ ہو چکیا اے کہ اج ملک دے سیاسی منظر نامے اتے نظر پانے آں تے کوئی اک وی چہرہ نیک نام نظر نہیں آندا۔
سیاسی قیادت نوں بدنام کرن وچ کارفرما ہتھ بارے جانن دی جے کوشش کریے تے ایہدے وچ کوئی شائبہ نہیں کہ کلیدی کردار کسی ہور دا نہیں سیاسی قیادت دا اپنا ای اے۔ اجے کل تک پی پی تے ن لیگ دی قیادت اک دوجے نوں نااہل’ اغیار دے ہمدرد تے وطن دشمن آکھن وچ مصروف سن لیکن نواز شریف تے بے نظیر بھٹو وچ طے پان والے میثاق جمہوریت دے نتیجے وچ ہن بائیں بازو دی سیاست کرن والی پی پی تے دائیں بازو دی علمبردار ن لیگ جئی متحارب قوتاں اتحاد کر چکیاں نیں۔ ایہہ صورتحال بنان تے معاملات نوں ایس نہج تک لیان وچ پی ٹی آئی دا اہم کردار اے جہنے کسی ہور جماعت نوں شریک اقتدار کرن توں گریز کیتا تے بے لچک سیاست کیتی۔ جے تحمل’ مذاکرات تے افہام و تفہیم نال کم لیتا جاندا تے اج نفرت وچ درجن بھرجماعتاں اک ہو کے تبدیلی دی راہ ہموار نہ کر پاندیاں مگر گل فیر اوہو اے کہ اقتدارلئی جنونی ہو کے غیر جمہوری تے بے اصولی دی ایسی سیاست نے ای سیاسی جماعتاں اتے عوام دی بے اعتباری وچ وادھا کیتا اے تے ایسے وجہ نال عوام تے ملک نوں بے پناہ مسئلیاں دا سامنا اے لیکن سیاسی قیادت مسئلیاں توں بے نیاز اک دوجے اتے ودھ چڑھ کے الزام تراشی وچ مصروف اے جہدی بنا اتے ساکھ توں محرومی دا سلسلہ درپیش اے۔ ہور کجھ عرصہ انج دے ای حالات رہے تے جیویں پی پی تے ن لیگ دی اک دوجے نوں دبنام کرن دی مہم دے نتیجے وچ پی ٹی آئی نوں اگے ان دا موقع ملیا ممکن اے چھیتی ای حالات ایسا رخ اختیار کر جان کہ تناں جماعتاں نوں پچھاڑ کر نویں سیاسی قیادت سامنے آ جاوے تے پچھلی حکمران جماعتاں اک دوجے نوں بدنام کردے کردے عوام دی تائید و حمایت توں محروم ہو جان۔ موجودہ سیاسی قیادت توں رائے دہندگان بدظن ہوندے جا رہے نیں جہدا ثبوت ایہہ اے کہ عام انتخابات ہون یا ضمنی’ ووٹ کاسٹ کرن دی شرح وچ مسلسل کمی واقع ہون لگی اے مگر سیاسی قیادت نوں ایہدا احساس اے ایسے آثار نظر نہیں آندے کیوں جے بدستور اک دوجے نوں بدنام کرن وچ مصروف اے۔ جے طرزعمل اتے چھیتی نظرثانی نہ کیتی گئی جہدا بظاہر امکان گھٹ اے تے ایہدے توں موجودہ سیاسی قیادت دا مستقبل مخدوش ہونا یقینی اے۔
ملک دے سیاسی حالات ایس حد تک خراب ہو چکے نیں کہ حکمران اتحاد وچ شامل کوئی اک چہرہ وی نیک نام نہیں۔ ایسے طرح اپوزیشن بدعنوانی دے سنگین الزاماں دی زد وچ اے۔ وزیراعظم تے وزیراعلیٰ نوں منی لانڈرنگ دے مقدمات دا سامنا اے۔ مولانا فضل الرحمن تے آصف زرداری دے حوالے نال وی نہ صرف لما مال بنان دی کہانیاں گردش کر رہیاں نیں بلکہ مقدمات دی مختلف ادارے انکوائریاں وچ مصروف نیںجہناں دے چانن وچ عدالتی کارروائیاں وی جاری نیں لیکن صورتحال وچ ہن جہڑی ڈرامائی تبدیلی آئی اے اوہ ایہہ اے کہ عمران خان دی نیک نامی’ پارسائی تے اجلا پن وی داغدار ہو چکیا اے ۔ توشہ خانہ دے علاوہ وی اوہ مختلف نوعیت دے کئی الزامات دی زد وچ نیں تے کجھ ایسے سیاسی کرداراں یا شخصیات اتے انگلیاں اُٹھن لگیاں نیں جہڑے ماضی وچ کسی نہ کسی حوالے نال جماعت یا براہ راست اوہناں نال جڑے نیں۔ مستقبل وچ ہور الزاماں دا امکان اے جہدے توں نیک نامی’ پارسائی تے کردار دا اجلا پن بدنامی دا پیراہن پا لووے گا تے اوہ وی دوجی سیاسی قیادت وانگوں بدنام ہو کے رہ جان گے لہٰذا بہتر ایہو اے کہ سیاسی قیادت اک دوجے اتے الزام تراشی دے بجائے کارکردگی وَل دھیان دیوے وگرنہ حالات ایس حد تک ناہموار ہو سکدے نیں کہ سیاسی طور تے زندہ رہنا ای دشوار ہو کے رہ جاوے۔
ملک دی ساری سیاسی قیادت بدعنوان نہیں ہو سکدی مگر ذرائع ابلاغ توں انج ای تاثر ملدا اے حالانکہ بے سروپا الزام تراشی دے بجائے اداریاں نوں جے بدعنوانی دے ثبوت فراہم کیتے جان تے کارروائی ممکن اے انج سیاست وچ دولت جمع کرن یا اقتدار حاصل کرن لئی خرچ کرن دے عمل دی حوصلہ شکنی ہو سکدی اے۔ نیز سیاسی قیادت لب کشائی کردے ہوئے قومی مفاد دے منافی گل کرن توں گریز کرے کیوں جے اک دوجے نوں غدار تے ملک دشمن آکھن دا نقصان کسے ہور نوں نہیں موجودہ سیاسی قیادت نوں ای ہو رہیا اے۔ موجودہ حکمران اتحاد چاہندا اے کہ کسے طرح مشرقی ہمسائے نال تعلقات بہتر تے تجارت بحال ہووے اج کہ عمران خان نے اقتدار توں بے دخلی نوں عالمی طاقت دی سفارتی مہم جوئی قرار دتا اے۔ بھارت نال تعلقات دی بہتری تے تجارت دی بحالی دی منزل تے حاصل نہیں ہو سکی مگر چین خفا ضرور ہو گیا اے۔ ایسے طرح امریکی انتظامیہ وی پاکستان کولوں ناخوش اے جہدے توں ملک دی مالی مشکلات وچ وادھا ہوندا جا رہیا اے۔ محض اپنی سیاست چمکان لئی ریاستی مفاد نال کھلواڑ حب الوطنی نہیں ۔ کیہ ای بہتر ہوندا کہ عمران خان اپنے دور حکومت وچ کوئی ایسا بااختیار عدالتی کمیشن بنا دیندے جہڑا مالی بدعنوانی دے مقدمات ثابت کرن لئی ثبوت تلاش کرن اتے مامورہوندا تے ایہناں ثبوتاں دی بنا اتے بدعنوانی وچ ملوث سیاسی افراد نوں کیفر کردار تک پہنچان دی کوشش کردے مگر ایسا کجھ کرن دے بجائے اوہناں نے ساری توجہ حریف سیاستداناں نوں بدنام کرن اتے مرکوز رکھی۔ حیران کن امر ایہہ اے کہ موجودہ حکمران وی الزام تراشی توں اگے کارروائی ول نہیں ودھ رہے۔ ذرائع ابلاغ وچ توشہ خانہ توں لے کے تبادلیاں دے ذریعے مال بنان’ زمینان اتے قبضے سنے مختلف الزاماں دی بازگشت تے سنائی دیندی اے مگر ثبوت تلاش کرن داکم نہیں ہو رہیا ایسے لئی الزام تراشی نوں وی بدنام کرن دا حصہ سمجھیا جا رہیا اے۔ گل ایہہ اے کہ جے متعلقہ طاقت تے عدالت دے مراکزنوں کارروائی لئی مناسب ثبوت فراہم کیتے جان تے نہ صرف ملک توں بدعنوانی دا خاتمہ ممکن اے بلکہ سیاست وچ زر تے زمین دے استعمال دا سلسلہ وی ختم ہو سکدا اے مگر ایہدے بجائے ازسرے نو آڈیو تے ویڈیو لیک کرن دا غلیظ دھندہ شروع اے جہدا کسی نوں فیدہ نہیں ہو سکدا صرف سیاسی قیادت نوں نقصان ہو سکدا اے۔ آڈیو تے ویڈیو صبح اے یا غلط’ جے ذمہ داران کارروائی نہیں کردے تے ایہدا اک ای مطلب اے کہ سیاسی قیادت نوں بدنام کرنامطلوب اے ۔ ایسی حرکتاں نال ای غیر جمہوری قوتاں نوں اگے آن تے جمہوریت نوں کمزور کرن دا بہانہ ملدااے۔