مقبول ترین لیڈر

مظہر برلاس

ایہ ساجد تارڑ دے بیٹے فاتح تارڑ دے ولیمے دا قصہ اے۔ استقبالیے تے ساجد تارڑ دے نال سپریم کورٹ بار دے صدر احسن بھون تے مسعود وڑائچ کھڑے سن۔ احسن بھون دے نال ای اعظم نذیر تارڑ وی کھڑے سن ایس تقریب وچ فواد چوہدری’ حنیف عباسی’ طارق تارڑ تے خضرالیاس ورک نال ملاقات ہوئی۔ استقبالیے تے ای میں اپنے اک دوست توں پچھیا کہ سردار جسدیپ سنگھ المعروف جسی کدھر اے؟ اوہ مینوں جسی نوں ملوانے فنکشن دے اندر لے گیا پر جسی پتہ نہیں کتھے سی جسی تے نہ ملیا پر اوتھے موجود اک پاکستانی دوست مینوں اک کونے وچ لے گیا۔ کونے وچ جا کے اوہنے میرے نال وکھووکھ سوال کرنے شروع کر دتے۔ میں اوہنوں کہیا کہ مینوں کیہ پتہ کہ کنہے سوئمنگ پول لئی اٹھ کروڑ روپیے خرچ کر دتے نیں مینوں کیہ پتہ کہ کون کس شہر وچ گالف کلب وچ 20/25 کروڑ وچ گھاہ تبدیل کروانا چاہندا اے؟ مینوں تے ایہ وی نہیں پتہ کہ کہڑے وزیر نے چھ کروڑ دی گڈی منگوائی اے؟ مینوں ایس گل دا وی نہیں پتہ کہ اوہ کہڑا وزیر اے جو طے کیتے بناں پراجیکٹ منظور ای نہیں کردا۔ ایہناں جواباں دے بعد اوہنے کجھ ہور سوال داغے تے میں عرض کیتا کہ حضور! مینوں کیہ پتہ کہ موجودہ حکومت کیوں پٹرول مہنگا کردی جا رہی اے حالاں کہ عالمی منڈی وچ تیل سستا ہو گیا اے۔ عجیب اتفاق اے کہ جدوں عالمی منڈی وچ تیل مہنگا سی تے پاکستان وچ پچھلی یعنی عمران حکومت لوکاں نوں ڈیڑھ سو روپیے فی لٹر دے رہی سی ہن جدوں عالمی منڈی وچ تیل سستا ہو چکیا اے تے پتہ نہیں موجودہ حکومت کیوں ڈھائی سو روپیے فی لٹر پٹرول دے رہی اے۔ ایہہ تن سو یاں پونے تن سو وچ اک لیٹر پٹرول ملیا کرے گا۔ مینوں ایہ وی نہیں پتہ کہ پچھلے ساڑھے تن ورھے لوڈشیڈنگ کیوں نہیں ہوئی ایس دوران حکومت بجلی سستی وی دے رہی سی ہن پتہ نہیں بجلی پیدا نہیں ہو رہی یاں کیہ ہو گیا اے کیوں جے پاکستانیاں نوں پچھلے ساڑھے تن ورھے لوڈشیڈنگ دا سامنا نہیں کرنا پیا۔ ہو سکدا اے بجلی نوں نظر لگ گئی یاں بجلی جن بھوت پیدا نہ ہون دے رہے ہون۔ مینوں تے ایہ وی نہیں پتہ کہ بجلی اینی مہنگی کیوں کر دتی گئی اے۔ مینوں تے ایہ وی نہیں پتہ کہ گیس ایس موسم وچ کیوں مہنگی کر دتی گئی اے؟ میں سادہ جیہا بندہ واں مینوں کیہ پتہ کہ پٹرول’ بجلی تے گیس مہنگی ہون دے بعد دوجیاں چیزاں دیاں قیمتاں کیوں ودھ جاندیاں نیں؟
میرے ایہ جواب سن کے اوہنے رجیم چینج بارے سوال شروع کر دتے تے میں عرض کیتا کہ جناب مینوں کیہ پتہ کہ حکومت تبدیل کیوں ہوئی۔ مینوں تے نہیں پتہ کہ کون کنے وچ وِکیا’ ایہ وی نہیں پتہ کہ کنہے پیسے ونڈے تے ایس گل دا وی نہیں پتہ کہ پیسیاں دے نال ٹکٹ دا وعدہ وی کیتا گیا سی مینوں تے ایہ وی نہیں پتہ کہ وکن والی اک خاتون دے دادا نے مبینہ طور تے پاکستان نال غداری کیتی سی ایسے وجہ نال گورداس پور ساڈا حصہ نہ بن سکیا تے ایسے غداری پاروں بھارت نوں کشمیر جان لئی زمینی راہ مل گیا۔ مینوں ایہناں گلاں دا وی نہیں پتہ کہ نیب توں کہدے کہدے مقدمے ختم ہوئے’ ایہ وی نہیں پتہ کہ کس کس سزا یافتہ نوں سرکاری حفاظتی دستے دتے گئے نیں مینوں تے ایہ وی نہیں پتہ کہ حکومت دی تبدیلی دا اپریشن اسلام آباد دے آل دوالے کس جنگل وچ فائنل ہویا سی مینوں ایس گل دا وی نہیں پتہ کہ کہڑے وڈے شہر وچ کون لیٹ کے اک وڈی سفیدگڈی وچ کنہوں چھ گھنٹے لئی ملن گیا سی مینوں نہیں پتہ کہ اوس سفیدگڈی وچ ڈرائیور دے نال اگلی سیٹ تے بیٹھن والا ایم پی اے کہڑے سرحدی علاقے دا رہن والا اے۔ مینوں کیہ پتہ کہ عدالتاں کدوں کھلدیاں نیں تے کدوں بند ہوندیاں نیں۔ مینوں ایہ وی کتھے پتہ اے کہ اسلام آباد دے کس ہوٹل دے کس فلورتے منحرفین نوں رکھیا گیا اوتھے کیہ سرگرمیاں جاری سن فیر وی ایہ نہیں پتہ کہ 20 بندے کس ہائوس وچ رکھے گئے۔ مینوں ایہ وی نہیں پتہ کہ ایہناں بندیاں دی گنتی ایس طرح کون کردا سی جیویں آلیاں چوں چوزے برآمد ہون تے کیتی جاندی اے۔ میں اوہنوں کہیا کہ مینوں نہیں پتہ کہ پنجاب اسمبلی وچ پولیس کیوں وڑی’ مینوں ایہ وی نہیں پتہ کہ ہوٹلاں تے گیلریاں وچ وزیراعلیٰ کس طرح بنیا جاندا اے اوہ کون سی دا رولا سن دے نیں پر مینوں ایہدا پتہ نہیں۔
آخر وچ مینوں کہن لگا کہ عمران خان دی مقبولیت وچ بہت وادھا ہو گیا اے اوہ مقبول ترین لیڈر اے۔ میں اوہنوں کہیا کہ اک تے ساجدتارڑ دا ایہ کہنا اے کہ خان صاحب دے دل وچ جو آندا اے اوہ کہندے نیں تے لوگ شوق نال سن دے نیں۔ دوجی گل جہدے تے مینوں حیرت اے کہ عرب نوجوان سوشل میڈیا تے عمران خان دے دیوانے بنے ہوئے نیں۔ پورا عرب میڈیا خان صاحب نوں مسلمان ہیرو دے طور تے پیش کر ریہا اے پر مینوں نہیں پتہ کہ انج کیوں اے میں سادہ جیہا بندہ واں مینوں کیہ پتہ کہ خفیہ سروے وچ پنجاب دے ضمنی الیکشناں وچ پی ٹی آئی پہلے’ تحریک لبیک دوجے تے مسلم لیگ ن تریجے نمبر تے کیوں اے؟ چلو میں اک سینئر تے تجربہ کار سیاستدان دی گل سنانا واں کئی زمانے ویکھن والے راجہ منوراحمد کہندے نیں عمران خان مقبولیت وچ بھٹو توں وی اگے نکل گیا اے بھٹو نوں مشرقی پاکستان وچ کوئی سیٹ نہیں سی ملی خیبرپختونخوا توں صرف عبدالخالق خان دی صورت وچ اک سیٹ ملی سی بلوچستان توں کوئی سیٹ نہیں سی ملی بھٹو تے پنجاب تے سندھ توں سیٹاں لے سکیا سی پر عمران خان ہر صوبے توں سیٹاں لے سکدا اے۔ اوہنے لئیاں وی نیں تے ہن اوہ مقبول ترین لیڈر اے ایہ ساریاں جماعتاں رَل کے وی اوہنوں نہیں ہرا سکدیاں اوہ اکلا ایہناں ساریاں توں ودھ مقبول اے تے ایہناں توں ڈھیر اگے اے۔٭٭