بکریاںدا تحفہ

پروفیسر محمد عبداللہ بھٹی

امجد جٹ خوشی نال پھلیا نہیں سما رہیا سی ۔ کامیابی فتح دے گھوڑے اتے سوار‘ اپنے علاقے دی مشہور کھوئے والی برفی دے نال اپنی خوشی کامیابی ایس فقیر نال شیئر کرن میرے گھر آیا ہویا سی۔ اوہدے انگ انگ توں خوشی دے چشمے پھٹ رہے سن۔ خوشی نال اوہدا چہرہ گلنار تے گل گل اتے جمپ مار رہیا سی۔ میںوی اوہنوں خوش ویکھ کے خوش ہو رہیا سی۔ آخر میں حقیقت جانن لئی اوہنوں پچھیا جٹ صاحب خیر اے نا کوئی بانڈ لگ گیا اے‘ پرموشن ہو گئی اے‘ کوئی مقدمہ جت گئے او یا فیر سالاں توں پھسیا مسئلہ ٹرانسفر ہوگیا اے۔جٹ پچھلے دو سالاں توں اپنے گھر توں سینکڑاں کلومیٹر دور نوکری کر رہیا سی جدوں اوہ ایدھر آندا تے ریگولر میرے کول چھوٹے موٹے مسئلیاں لئی حاضر ہوندا سی۔ میرا تعلق بہت پرانا سی۔ جدوں ایہہ بے روزگار سی ‘ نوکری دی تلاش وچ سی تے دے آکھن تے میرے کول آیا کردا سی۔ دیہاتی پس منظر ہون دی وجہ نال چھیتی اے میرے کول ہو گیا کیوں جے میری شروع دی زندگی وی تے پنڈ وچ ای گزری سی۔ پیارا مٹھا جوان سی اولیاء اللہ نال عقیدت و عشق رکھدا سی۔ مینوں سیاہ کار نوں وی کوئی نیک انسان سمجھ کے آندا سی جد کہ میں اپنی حماقتاں‘ کوتاہیاں‘ سیاہ کاریاں توں بخوبی واقف آں۔ پڑھیا شخص سی۔ میں دنیاوی تے روحانی رہنمائی کیتی کجھ مہینیاں مگروں ای نوکری مل گئی تے ایہہ میرے ہور وی کول ہو گیا ۔فیر ویاہ ہو گیا۔ ہن اک کامیاب شادی شدہ زندگی تے نوکری دے نال قافلہ زندگی نوں چلا رہیا سی۔میرے نال عقیدت دے نال دوستی وی سی۔ ہر ٹاپک اتے گل کردا ‘ ہر مشورہ کردا‘ایہنوں میری قربت صحبت دی عادت جئی ہو گئی سی۔ بوہتے دن نہ گزر سکدے کہ مینوں ملن آجایا کردا۔ پیو انتقال کر گیا سی ایس لئی ہر گل میرے نال آ کے شیئر کردا۔ میں وی محبت پیار نال پیش آندا۔ فیراوہدی پرسکون زندگی وچ طوفان جیا آ گیا۔ جدوں دو سال پہلاں اوہدی ٹرانسفر ایتھوں دو سو کلومیٹر دور کردتی گئی۔ ٹرانسفر نوکری دا لازمی جزو اے لیکن اینی دور کہ بیوی بچیاں‘ماں تے میرے توں دور اوہدے لئی سوہان روح بن گئی۔ ایہہ تڑپ تڑپ گیا بلکہ اک واری تے میرے گلے لگ کے خوب رویا کہ سرجی مینوں تہانوں ویکھن‘ تہاڈی صحت دی عادت جئی ہو گئی
اے۔ ہن میں جے کجھ دن تہانوں نہ ملاں تے کسی شدید کمی دا احساس ہوندا اے۔ میرا اوتھے بالکل وی دل نہیں لگدا۔ ہن جٹ نے دن رات کوششاں شروع کر دتیاں کہ کسی طرح واپس ٹرانسفر ہو جاوے۔ مینوں بار بار دعا کرن دا آکھدا۔ مختلف وظائف وی کردا۔ اپنے علاقے دے سیاسی لیڈران دے ڈیریاں اتے بار بار جا کے اوہناں دی منتاں ترلے کردا۔ محلے دے کونسلراں تے چوہدریاں دے گھراں دا وی مسلسل طواف کر رہیا سی لیکن وظائف تے پج نس دا کوئی نتیجہ نہیں نکل رہیا سی۔ نوکری لئی سینکڑاں کلومیٹر دا سفر کردا ٹرانسفر لئی واپس آندا جہڑی سالانہ چھٹیاں سن اوہ ایس پج نس وچ ختم ہو گئیاں تے مجبور ہو کے اوتھے بیٹھ گیا۔ ہن خود تے نہیں آ سکدا سی اپنے گھر والیاں‘ دوستاں‘ رشتہ داراں نوں فون کردا۔اوہناں دی خوشامداں کردا۔ بیچارے دی جان سولی اتے اٹکی ہوندی سی۔ مینوں جدوں وی فون کردا تے غم کرب اوہدی آواز توں چھلکدا۔ شریف بندا مصیبت وچ پھسیا ہویا سی۔ میں وی دعا کر رہیا سی کہ کسی طرح ایہدی ٹرانسفر
ہو جاوے۔ ایہہ اپنے بیوی بچیاں‘ ماں دے کول آ جاوے۔ ایس پس منظر دے نال اج ایہہ چھلانگاں ماردا ہویا آیا تے دسیا سر مینوں تہاڈی دعا لگ گئی اے۔ میری ٹرناسفر ہو گئی۔ میں جہڑا ماہی بے آب وانگوں تڑپ رہیا سی ہن اوکھا ویلا ختم ہو گیا سر تہاڈی دعاواں نے آخرکار رنگ وکھا ای دتا۔ جدوں جٹ نے خوشخبری سنائی تے میں وی بہت زیادہ خوش ہویا کہ آخرکار بیچارے دی سنی گئی۔ ہن میں پچھیا ایہہ کرشمہ کیویں ہویا تے جٹ قہقہے ماردا بولیا سر میں تے مایوس ہو کے بیٹھیا سی پچھلی واری جدوں لہور آیا تے فیر اپنے کول دے دفتر وچ گیا تے اوہو درخواست کیتی۔ سر ہن تے مینوں دو سال گھر توں دور ہو گئے نیں ہن مینوں واپس لے آئو تے باس نے سرسری انداز وچ پچھیا ‘ توں کہڑے علاقے وچ کم کرنا ایں۔کتھوں واپس آنا چاہنا ایں۔ میں پنجاب دے دوردراز علاقے دا نام دسیا تے باسک اک دم چونک پئے تے بولے یار اوتھے دے تے بکرے بہت مشہور
نیں۔ سنیا اے قربانی لئی بہت خوبصورت صحت مند بکرے اوتھوں ملدے نیں تے میں مسکرا کے ملتجانہ لہجے وچ بولیا بس جناب بالکل تسیں صحیح سنیا اے۔ تسیں حکم کرو میں تہاڈی کیہ خدمت کر سکنا واں تے صاحب بولے تیری ٹرانسفر ہو جاوے گی۔ توں بکریاں دی تصویراں میرے پی اے نوں سینڈ کری جہڑاسانوں پسند آوے گا اوہ لے کے آ جانا۔ میں ڈبیا ہویا شخص خوشی نال پی اے صاحب دے کول آیا تے اکھیا صاحب نے ایہہ حکم دتا اے تے پی اے صاحب نے وی مینوں ایہو آکھیا جے توں واپس آنا چاہنا تے ایہہ موقع اے جا کے سب توں چنگے صحت مند دو بکریاں دا انتظام کراوہ لے کے آ صاحب دا دل راضی ہووے گا تے تیری ٹرانسفر کر دین گے۔میں بہت خوش ہویا فیر دبے لفظاں وچ آکھیا پیسے ملن گے یا جدوں میں بکرے لے کے آواں گا تے پی اے صاحب نے غصے نال ویکھیا تے بولیا جے پیسیاں دے بکرے لینے نیں تے اسیں خود نہیں لے سکدے۔ ایہہ توں تحفہ دے ریا ویں۔ توں بہت خوش قسمت ایں جہڑا صاحب نے تیرے کولوں تحفہ منگیا اے ورنہ صاحب نوں بکرے دین والے بہت نیں۔ جا تے جا کے مفت دو صحت مند وڈے بکریاں دا انتظام کر۔ ہن اجے توں انکار کرے گا تے ٹرانسفرتے بعد دی گل اے تیری نوکری وی مسئلیاں دا شکار ہو سکدی اے۔ جٹ دے غبارے دی ہوا نکل چکی سی۔ بہت پریشان گھر آیا۔ بیگم نوں دسیا تے بیگم نے زیورات دتے کہ ایہہ ویچ کے صاحب نوں بکریاں دا تحفہ دے دیو نہیں تے ایہہ نوکری لگی اے ایہہ وی جا سکدی اے۔ ہن جٹ بیچارے نے اپنی بیگم دے ویاہ
دے زیورات ویچ کے صاحب لئی بکریاں دا تحفہ صاحب نوں پیش کیتا۔ صاحب نے کمال مہربانی فرماندے ہوئے جٹ دی ٹرانسفر کردتی۔ ایہہ بیچارہ ٹرانسفر نوں میری دعاواں وظیفیاں دا ثمر قرار دے رہیا سی جد کہ حقیقت وچ تے جنوبی پنجاب دے بکریاں نے ایہہ کرشمہ وکھایا سی۔ جٹ بیچارہ برفی دے کے خوش ہو کے چلا گیا لیکن میرے دماغ نوں دھواں دھواں کر گیا کہ ساڈی افسر شاہی کتھوں کتھوں ہتھ صاف کردی اے۔ کوئی موقعے ہتھوں نہیںجان دیندی۔ بااثر سیٹاں اتے بیٹھ کے ایہہ جلاد بن کے لٹ مار دے نال لوکاں نوں ذبح کرن اتے تلے ہوئے نیں۔ قربانی جئے مذہبی فریضے نوں وی رشوت دا لبادہ پہنا کے اپنی دنیا تے آخرت خراب کر رہے نیں۔بکریاں دے تحفے والی کہانی اکثر دفتراں وچ دہرائی جا رہی اے۔ ماتحت بیچارے افسران بالا دی اکھ دا تارا بنن تے قائم رہن لئی اج کل بکریاں دے تحفے پیش کر رہے نیں۔ افسران بالا ایہہ بھل بیٹھے نیں کہ ایسی قربانی قبول نہیں بلکہ واپس منہ تے مار دتی جاندی اے۔