پروفیسر آف پنجابی دے عہدے تے ترقی پان والے استاداں دا دیال سنگھ ریسرچ اینڈ کلچرل فورم دا دورا

پنجابیاں تے پنجابی پیاریاں لئی ایہ گل مان جوگ ہے پئی پنجاب دے مختلف کالجاں توں تعلق رکھن والے پنجابی زبان و ادب دے استاداں نوں پچھلے دنیں PBS/20وچ بطور ”پروفیسر آف پنجابی” ترقی ملی تے سارے ساتھی اپنے اپنے کالجاں وچ ای اپ گریڈڈ یا سیٹ شفٹنگ راہیں ، ایڈ جسٹ ہو گئے، جیہڑی ایہناں دوستاں لئی دوہری خوشی دی گل ہے۔ ایہناں دوستاں و چ ڈاکٹر عاصم چودھری،ڈاکٹر حمید محسن ،ڈاکٹر مرزا معین الدین،ڈاکٹر ارشد اقبال ارشد، ڈاکٹر عباد نبیل شادتے ڈاکٹر محمد سلیم چودھری شامل نیں۔ ایہناں سجناں کجھ دن پہلاں ”دیال سنگھ ریسرچ اینڈ کلچرل فورم” لاہور دا دورا کیتا۔ایس دورے دی دعوت ایہناں نوں ڈائریکٹر ہوراں دتی سی۔ ایہناں سجناں دے اؤن تے راقم ( ڈاکٹر رزاق شاہد) نے بطور ڈائریکٹر دیال سنگھ ریسرچ فورم پروہنیاں نوں جی آئیاں نوں آکھیا تے نال اوہناں نوں پھلاں دے گل دستے پیش کر کے اوہناں دا سواگت کیتا۔
پروہنیاں نوں دیال سنگھ ریسرچ فورم دے عملے نال وی ملنی کروائی گئی۔ایس موقعے تے ڈپٹی ڈائریکٹر سرشار چیمہ تے سینئر ریسرچ سکالر فیصل بٹ نے پروہنیاں نوں فورم دے کماں کاراں بارے جانکاری دتی ۔پروہنیاں فورم دے مختلف حصے ویکھے، جیہناں وچ ”دیال سنگھ سیمینار ہال” دیال سنگھ لائبریری ، تے خا ص کرلائبریری دے” پنجابی شاہ مکھی،گرمکھی تے ہندی سیکشن نوں بڑی نیجھ نال ویکھیا۔ اوہناں ریسرچ سکالر زلئی بنائے کیبن وی دیکھے جتھے وکھریاںبہ کے ریسرچ سکالرز اپنا کم کر سکدے نیں،کیوں جے اوتھے کمپیوٹرتے نیٹ دی سہولت وی مہیا کیتی گئی اے۔ پروفیسر صاحبان نے دیال سنگھ فورم دے کماں دی صلاحتا کیتی تے ایہدے لئی نیک جذبیاں دا اظہار کر دیاں اپنے قلمی تے عملی تعاون داپک کروایا۔اوہناں ایس خاہش دا وی اظہار کیتا پئی ادارا اپنے نویں ڈائریکٹر دی چھتر چھاویں اپنے کماں نوں ودھا دیوے گا تے ملکی تے باہر دے دیساں وچ وی مانتا کھٹے گا۔
آخیر تے ڈائریکٹر ہوراں ولوں سارے پروہنیاں نوں یاد گاری شیلڈاں ، ادارے ولوں چھپیاں کتاباں تے میگزین ”پنجاب دے رنگ” دا تحفا پیش کیتا گیا۔
ایس رپورٹ نوں دو اک کیپشن نال مزید سنگاریاں جا سکدا اے
١۔فورم دے ڈائریکٹر ہوراں پروہنیاں نوں ”جی آئیاں نوں” آکھیا
٢۔ رنگ برنگے پھلاں دے گلدستیاں نال پروہنیاں دا سواگت کیتا گیا
٣۔پروہنیاں ” دیال سنگھ سیمینار ہال” سنے فورم دے مختلف حصے ویکھے تے اوہناں نوں سراہیا
٤۔ ایس موقعے تے پروہنیاں نوں یارد گاری شیلڈاں، ادارے ولوں چپھیاں لکھتا تے میگزین ”پنجاب دے رنگ”دا تحفا پیش کیتا گیا