منی پرمنی اداکارہ تے ماہر تعلیم ڈاکٹر دردانہ بٹ

دردانہ بٹ 9مئی 1938نوں لہور وچ پیدا ہوئیاں سن۔ اوہناں نے کنیئرڈ کالج توں تعلیم حاصل کیتی۔ مگروں اوہ یونیورسٹی آف ٹولیڈو چلی گئیاں جتھے اوہناں نے اوہائیوایجوکیشنل ایڈمنسٹریشن وچ پی ایچ ڈی کیتی۔ تعلیم پوری کرن مگروں اوہناں نے اداکاری دا آغاز کیتا۔ جتھے اوہ کمرشل تے ماڈلنگ کرن لگیاں۔ اوہناں نے تھیٹر وچ وی کم کیتا جتھے اوہناں نوں ٹی وی لئی مزاحیہ ڈرامے وچ اک کردار دی پیشکش ہوئی۔ انج اوہناں نے ٹی وی دا رخ کیتا تے بڑی چھیتی اوہ پی ٹی وی اتے چھا گئیاں تے بہت سارے ڈرامیاں وچ اپنی کمال داکاری دے جوہر وکھانا شروع کر دتے۔
دردانہ بٹ دی پہچان سلور سکرین سی لیکن پس منظر وچ اوہ اک استاد سن۔ اوہناں نے ہوابازی وی کیتی تے اوہناں نوں پلس وچ بھرتی ہون دی پیشکش وی ہوئی۔ موٹرسائیکل وی چلاندیاں سن۔ لندن وچ بچپن گزریا۔ دردانہ بٹ دے والد برطانیہ وچ پاکستان دے سفارتخانے وچ ایجوکیشنل اتاشی سن۔ اوہناں دے والد دا تبادلہ ہو گیا تے اوہ واپس پاکستان آ گئے۔ اوہ اپنے والدین دی منجلی اولاد سن۔
اوہناں دی بے مثال فطری اداکاری پاروں اوہناں دے فن دی خوب تعریف کیتی گئی۔ 1979 وچ اوہناں نے معین اختر دے نال مزاحیہ پروگرام ”ففٹی ففٹی” وچ اک اہم کردار کیتا سی۔ ایہہ پروگرام 1984 وچ ختم ہویا۔ اوہناں نوں ناظرین ولوں بہت زیادہ پذیرائی ملی تے اوہ ایس توں سامعین وچ خوب مشہور ہو گئیاں۔ فیر 1980 وچ اوہناں نے ڈرامہ آنگن ٹیڑھا وچ سلطانہ صاحبہ دا جذباتی کردار ادا کیتا جہدی وجہ نال وی اوہناں نوں بہت داد ملی۔
اوہناں نے معین اختر دے نال دوبارہ 1982 وچ مزاحیہ ڈرامہ ”نوکر کے آگے چاکر” وچ کم کیتا سی۔ 1985 وچ اوہناں نے ڈرامہ ”تنہائیاں” وچ مرینہ خان’ شہناز شیخ تے بدر خلیل دے نال بی بی دا مشہور کردار ادا کیتا۔ ایس دے علاوہ پرائیویٹ ٹی وی چینلاں دے متعدد ڈرامیاں وچ وی اوہناں نے کئی یادگار کردار نبھائے جہناں نوں عوام نے بہت سراہیا سی۔ دردانہ بٹ آرٹس کونسل آف پاکستان کراچی دی معزز ممبر وی سن۔ دردانہ بٹ دا1967 وچ سعید احمد خان نال ویاہ ہویا جو اوہناں دی والدہ دے قریبی رشتے دار سن۔ ویاہ دے ڈیڑھ سال مگروں اوہناں دے شوہر دا انتقال ہو گیا سی۔
اوہناں دی والدہ دی خواہش سی کہ اوہ دوبارہ ویاہ کرن لیکن اوہناں نے والد نوں دسیا کہ اوہ پڑھنا چاہندیاں نیں۔ دردرانہ بٹ نے اداکاری دا آغاز 70 دی دہائی وچ پاکستان ٹیلی ویژن توں کیتا سی۔
دردانہ بٹ نے درس و تدریس دے علاوہ اپنے فنی کیرئیر دے دوران لاتعداد ڈرامیاں تے فلماں وچ اداکاری کیتی۔ اوہ بچپن توں ای انتہائی شرارتی سن جہدی وجہ نال اوہناں نوں رون دھون والے کردار ہرگز پسند نہیں سن کیوں جے موڈ دے اعتبار نال مرحومہ وچ طنز تے مزاح دی حس بوہتی سی۔ 70 دی دہائی وچ کراچی منتقل ہو گئیاں سن۔
فلم تے ٹیلی ویژن دی سینئر اداکارہ دردانہ بٹ دے یادگار ڈرامیاں وچ ”تنہائیاں”،”آنگن ٹیڑھا”،”نوکر کے آگے چاکر”،”رانی”،”چھوٹی سی کہانی”،”ڈگڈگی”،”میرا نصیب”،”محبت روٹھ جائے تو”،”پھر چاند پر دستک”،”نئے سلسلے”،”مذاق رات”،”انتظار”،”میرے چھوٹے میاں”،”تھوڑی سی وفا”،”بیگانگی”،”رانی نوکرانی”تے ”رسوائی”شامل نیں۔
پاکستان ٹیلی ویژن دے شہرہ آفاق مزاحیہ خاکیاں اتے مبنی پروگرام ”ففٹی ففٹی” وچ وی اوہناں دے کئی خاکے عوام وچ بے حد پسند کیتے گئے۔ اوہناں نے اپنے کیرئیر وچ جہناں فلماں وچ اپنی کمال اداکاری دے جوہر وکھائے اوہناں وچ ”ہجرت”،”عشق پوزیٹو”،”بالو ماہی”،”دل دیاں گلاں”،”ڈرائی لیوز”تے ”پرے ہٹ لو”شامل نیں۔ ایس دے علاوہ ”دی شریف شو مبارک ہو” دا وی حصہ رہیاں۔ چیتا رہوے کہ دردانہ بٹ ڈرامیاں تے فلماں وچ اپنے منفرد کرداراں دے حوالے نال خاصی مقبول اداکارہ سن۔
دردانہ بٹ جدوں مڈل کلاس وچ سن تے اوس ویلے ای اوہناں نے ہر اک دے نال شرارتاں دا سلسلہ شروع کردتا سی۔ مگروں جدوں کنیئرڈ کالج گئیاں تے اوتھے ڈرامیاں وچ کم دا آغاز کیتا۔ دردانہ بٹ نے شوبز دی دنیا وچ آن مگروں ابتدا وچ چھوٹے چھوٹے کردار ادا کیتے تے ساریاںنوں اپنے فن دا گرویدہ بنا لیتا۔ اوہناں نوں رون دھون والے کردار ہرگز پسند نہیں سن۔اردو ادب دے منے پرمنے ڈرامہ نگار اشفاق احمد نے اوہناں نال وعدہ کیتا سی کہ اوہ اوہناں لئی کوئی مرکزی کردار لکھن گے لیکن اوہ کردار اوہناں دی قسمت وچ نہیں سی۔
دردانہ بٹ نے پی ایچ ڈی کیتی ہوئی سی تے اک تعلیمی ادارے وچ بطور پرنسپل وی فرائض انجام دیندیاں رہیاں۔ مگر اداکاری دا جنون اوہناں نوں درس و تدریس دے شعبے توں دور لے گیا۔ دردانہ بٹ اج کل دے نویں ٹیلنٹ توں بڑی متاثر سن۔ اوہناں نوں یقین سی کہ آن والے وقتاں وچ ساڈی نوجوان نسل ملک نوں بہترین طریقے نال چلاوے گی۔ معین اختر مرحوم اوہناں دے آل ٹائم فیورٹ سن جد کہ اداکارہ حنا دلپذیر دی اداکاری توں بڑی متاثر سن کیوں جے اوہناں دا آکھنا سی کہ حنا دلپذیر دے کول فن دی بڑی ورائٹی اے۔
کجھ عرصے توں اوہناں نوں کینسر جئی موذی مرض نے آ لیتا سی جہدا علاج چل رہیا سی مگر وں کوویڈ دا شکار ہو گئیاں۔ اوہناں نوں ساہ دی تکلیف کارن وینٹی لیٹر اتے منتقل کیتا گیا سی مگر افسوس کہ اوہ پچھلے سال 12اگست بروز جمعرات کراچی دے نجی ہسپتال وچ اپنے خالق حقیقی نال جا ملیاں۔
دردانہ بٹ کینسر دے عارضے وچ مبتلا سن تے اوہناں وچ کورونا دی وی تشخیص ہوئی سی۔ کورونا وائرس توں متاثر ہون توں پہلاں ای اوہناں دی طبیعت ناساز سی۔ ماضی دے یادگار مزاحیہ ڈرامیاں وچ اداکاری دے جوہر وکھان والی منی پرمنی اداکارہ دردانہ بٹ 83 سال دی عمر وچ انتقال کر گئیاں سن۔
ڈاکٹر دردانہ بٹ دے انتقال اتے مداحواں ولوں گہرے دکھ تے افسوس دا اظہار کیتا گیا۔ شوبز نال جڑے فنکاراں ولوں وی اظہار تعزیت کردے ہوئے اوہناں دی موت نوں تفریحی صنعت لئی وڈا نقصان قرار دتا گیا۔ ڈاکٹر دردانہ بٹ بلا دی ذہین زنانی’ مزاحیہ’ ہاسے بکھیردی ہوئی بصیرت والی اک خاص روح سی جہڑی ہن ایس دنیا وچ نہیں رہی۔ اوہناں نوں مداحواں کولوں وچھڑے ہوئے اک سال ہو گیا اے۔ اللہ اوہناں دی مغفرت فرماوے تے درجات بلند کرے۔ آمین۔