پردہ پوشی۔۔۔فضیلت تے اہمیت

موجودہ دور وچ ساڈی اخلاقی برائیاں وچوں اک برائی ایہہ وی اے کہ اسیں لوک ہر ویلے دوجیاں دے عیب تے نقص تے اوہناں دی کمیاں تے کوتاہیاں دے ٹٹولن دے درپے رہنے آں تے فیر جیویں کسے دی کوئی برائی یا عیب ساڈے ہتھ لگدا اے اسیں اوہنوں کاں بنا کے ہوا وچ اُڈا دینے آں تے دوجے دی تضحیک نال اپنے نفس نوں سکون مہیا کرنے آں’ ایہہ انتہائی گھٹیا صفت اے جہڑی ساڈے معاشرے وچ بڑی تیزی نال سرایت کردی جا رہی اے۔ حالاں جے اسلام نے مسلمان بھرا دے عیب تے نقص تے اوہدی کمی تے کوتاہی نوں لکان تے اوہدے توں چشم پوشی کرن دا حکم دتا اے تے اوہنوں ظاہر کرن تے اوہدی پردہ داری توں شدید نفرت تے سخت ناراضی دا اظہار کیتا اے۔ چنانچہ حضور نبی اکرمۖ دا ارشاد اے کہ جہڑا شخص کسے مسلمان دی پردہ پوشی کردا اے تے قیامت دے دن اللہ تعالیٰ اوہدی پردہ پوشی فرماوے گا تے جہڑا شخص کسے مسلمان دی پردہ داری نہیں کردا اللہ گھر بیٹھے اوہنوں ذلیل تے رسوا کر دیندا اے (سنن ابن ماجہ:2546)
حضرت شعبی رحم اللہ علیہ فرماندے نیںکہ اک بندے نے حضرت عمر بن خطاب دی خدمت وچ آ کے عرض کیتا کہ میری اک دھی سی جہنوں میں زمانہ جاہلیت وچ اک واری تے زندہ قبر وچ دفن کر دتا سی لیکن فیر مرن توں پہلاں اوہنوں باہر کڈ لیتا سی۔ فیر اوہنے ساڈے نال اسلام دا زمانہ پایا تے مسلمان ہو گئی۔ فیر اوہدے کولوں ایسا گناہ سرزد ہو گیا جہدے اتے شرعی سزا لازم آندی اے۔ایہدے تے اوہنے وڈی چھری نال خود نوں ذبح کرن دی کوشش کیتی۔ اسیں لوک موقعے تے پہنچ گئے تے اوہنوں بچا لیتا لیکن اوہدے گلے دی کجھ رگاں کٹ گئیاں سن۔ فیر اسیں اوہدا علاج کیتا تے اوہ ٹھیک ہو گئی۔ اوہدے مگروں اوہنے توبہ کیتی تے اوہدی دینی حالت بہت چنگی ہو گئی۔ ہن اک قوم دے لوک اوہدے ویاہ دا پیغام دے رہے نیں’ میں اوہناں نوں اوہدی ساری گل سنا دیواں؟ حضرت عمر نے فرمایا کہ اللہ نے تے اوہدا عیب لکایا سی تسیں اوہنوں ظاہر کرنا چاہندے او۔ اللہ دی قسم!جے تسیں کسے نوں اوس کڑی دی کوئی گل دسی تے میں تہانوں ایسی سزا دواں گا جہدے توں سارے شہریاں نوں عبرت ہووے گی بلکہ اوہدا ویاہ ایس طرح کرو جیویں اک پاک دامن مسلمان زنانی دی کیتی جاندی اے۔ (کنز الاعمال:8605)
حضرت شعبی فرماتے نیں کہ اک کڑی کولوں برا کم ہو گیا جہدی اوہنوں شرعی سزا مل گئی۔ فیر اوہدی قوم والے ہجرت کر کے آئے تے اوس کڑی نے توبہ کر لیتی تے اوہدی دینی حالت چنگی ہوگئی اے۔ اوس کڑی دا ویاہ دا پیام اوہدے چاچے دے کول آیا تے اوہنوں سمجھ نہیں آیا کہ اوہ کیہ کرے؟ اوہدی گل دسے بغیر ویاہ کر دیوے تے ایہہ وی ٹھیک نہیں۔ امانت داری دے خلاف اے تے جے دسیے تے ایہہ وی ٹھیک نہیں کہ ایہہ ستر مسلم (مسلمان دی پردہ پوشی) دے خلاف اے۔ اوہدے چاچے نے ایہہ گل حضرت عمر بن خطاب نوں دسی تے حضرت عمر نے فرمایا کہ بالکل نہ دسو تے اوہدا ویاہ کرو جیویں تسی اپنی نیک بھلی کڑیاں دا کردے او۔ (کنزالعمال 45757)
حضرت شعبی فرماندے نیں کہ اک عورت نے حضرت عمر بن خطابدی خدمت وچ آ کے عرض کیتا کہ اے امیر المومنین! مینوں اک بچہ ملیا تے اوہدے نال اک مصری چٹا کپڑا ملیا جہدے وچ سو دینار سن۔ میں دونواں نوں چک لیتا تے گھر لے آئی تے اوس بچے لئی ددھ پلان والی زنانی دا اجرت اتے انتظام کیتا’ ہن اوہدے کول چار زنانیاں آندیاں نیں تے اوہ چاروں اوہنوں چمدیاں نیں’ مینوں پتہ نہیں چلدا کہ اوہناں چاراں وچوں کہڑی اوس بچے دی ماں اے؟ حضرت عمر نے فرمایا کہ ہن جدوں اوہ زنانیاں آن تے مینوں اطلاع کر دینا (اوہ زنانیاں آئیاں تے )اوس عورت نے حضرت عمر نوں اطلاع کر دتی۔ حضرت عمر اوس عورت دے گھر گئے تے اوہناں وچوں اک عورت نوں حضرت عمر نے آکھیا تہاڈے وچوں کہڑی ایس بچے دی ماں اے؟اوس عورت نے آکھیا اللہ دی قسم! آپ نے (پتہ کرن دا) چنگا انداز اختیار نہیں کیتا۔ اللہ تعالیٰ نے اک عورت دے عیب اتے پردہ پایا اے۔ آپ اوہدی پردہ داری ختم کرنا چاہندے او۔ حضرت عمر نے فرمایا: تسیں ٹھیک آکھیا اے فیر اوس پہلی عورت نوں آکھیا کہ آئندہ جدوں ایہہ عورتاں تہاڈے کول آن تے اوہناں نوں کجھ نہ پچھنا تے اوہناں دے بچے دے نال چنگا سلوک کردے رہنا تے فیر حضرت عمر واپس تشریف لے گئے (کنزالعمال 40567)
حضرت صالح بن کرز فرماندے نیں کہ میری اک باندی کولوں گناہ ہو گیا۔ میں اوہنوں لے کے حضرت حکیم بن ایوب دے کول گیا۔ میں اوتھے بیٹھیا ہویا سی کہ اینے وچ حضرت انس بن مالک تشریف لے آئے تے بیٹھ گئے تے فرمایا:اے صالح! ایہہ تہاڈے نال باندی کیوں اے؟ میں آکھیا میری باندی کولوں ایہہ گناہ صادرہو گیا اے۔ ہن ایہدا معاملہ امام دے سامنے لے جانا چاہنا واں تاں جے اوہ ایہنوں شرعی سزا دین۔ حضرت انس نے فرمایا انج نہ کرو اپنی باندی نوں واپس لے جائو تے اللہ کولوں ڈرو تے اوہدے عیب اتے پردہ پائو! میں آکھیا نہیں میں انج نہیں کراں گا۔ حضرت انس نے فرمایا انج نہ کرو تے میری گل منو۔ اوہ بار بار میرے اتے اصرار فرماندے رہے ایتھوں تک کہ میں باندی نوں اوس گھر لے گیا۔ )کنزالعمال 40567)
حضرت عقبہ بن عامر دے منشی حضرت دخین ابوالہیثم رحم اللہ علیہ آکھدے نیں’ میں حضرت عقبہ بن عامر نوں آکھیا ساڈے کجھ پڑوسی شراب پیندے نیں’ اوہناں نوں پھڑوانا چاہنا واں۔ حضرت عقبہ نے آکھیا انج نہ کرو بلکہ اوہناں نوں وعظ نصیحت کرو تے اوہناں نوں ڈرائو! میں آکھیا میں اوہناں نوں روکیا سی لیکن اوہ رکے نہیں’ ایس لئی تے ہن اوہناں لئی پلس نوں بلانا چاہنا واں تاں جے اوہ اوہناں نوں پھڑ لین۔ حضرت عقبہ نے آکھیا تہاڈا ناس ہووے! انج نہ کرو! کیوں جے میں حضور اکرمۖ نوں ایہہ فرماندے ہوئے سنیا اے کہ جہنے کسے (مسلمان دے) عیب نوں لکایا تے گویا اوہنے زندہ درگور کڑی نوں زندہ کیتا (سنن ابی دائود 4892)
حضرت بلال بن سعد اشعری آکھدے نیں کہ حضرت معاویہ نے حضرت ابو دردا نوں خط وچ لکھیا کہ دمشق دے بدقماشاں دے نام لکھ کے میرے کول بھیجو تے حضرت ابو دردا نے فرمایا کہ میرا دمشق دے بدقماشاں نال کیہ تعلق؟ تے مینوں اوہناں دا پتہ کتھوں چلے گا؟ ایہدے تے اوہناں دے پتر بلال نے آکھیا کہ میں اوہناں دے نام لکھ دینا واں تے اوہناں دے نام لکھ کے دے دِتے۔ حضرت ابو دردا نے فرمایا کہ تہانوں اوہدا پتہ کتھوں چلیا اے؟ تہانوں اوہدا پتہ ایس وجہ نال چلیا اے کہ تسیں وی اوہناں وچوں او! ایس لئی اوہناں دے ناماں دی فہرست اپنے نام توں شروع کرو! تے اوہناںدے نام حضرت معاویہ نوں نہ بھیجے! (الادب المفرد 1290)
حضرت شعبی آکھدے نیں کہ حضرت عمر بن خطاب اک گھر وچ سن۔ اوہناں دے نال حضرت جریر بن عبداللہ وی سن۔ اینے وچ کسے دی ہوا خارج ہو گئی جہدی بو حضرت عمر نے محسوس کیتی تے فرمایا کہ میں تاکید کرنا واں کہ جہڑے بندے دی ہوا خارج ہوئی اے اوہ کھڑا ہو جاوے تے جا کے وضو کرے۔ اوہدے اتے حضرت جریر نے عرض کیتا کہ اے امیر المومنین! کیہ سارے لوک وضو نہ کر لین؟ ایہدے توں مقصد وی حاصل ہو جاوے گا تے جہدی ہوا خارج ہوئی اے۔ ایہدے عیب اتے پردہ وی پیا رہوے گا۔ حضرت عمر نے فرمایا اللہ تہاڈے اتے رحم فرماوے! آپ جاہلیت وچ وی بہت چنگے سردار سن تے اسلام وچ وی بہت چنگے سردار نیں کہ پردہ پوشی دی کیسی چنگی تے عمدہ ترکیب تسیں دسی اے (کنزالعمال 8608)
یقینا بندہ مومن دا ایمانی تے اخلاقی ایہو وصف ہونا چاہیدا اے کہ اوہ دوجیاں دے عیب تے نقص نوں نہ ٹٹولے تے اوہناں دی کمی تے کوتاہی نوں آشکارا کرن دی بجائے اپنے عیب تے نقص نوں ٹٹولے تے اوہناں دی اصلاح تے ہدایت دی کوشش تے فکر کرے تے دوجے لوکاں دے عیب تے نقص اتے پردہ پاوے تے چشم پوشی وردے کہ ایہدے توں جتھے دوجے مسلماناں دی پردہ پوشی ہووے گی تے اوہناں دی عزت نفس دا سامان ہووے گا تے اوتے اوس عمدہ تے نیک صفت پاروں اللہ تعالیٰ اوس شخص دی وی دنیا تے آخرت وچ پردہ پوشی فرمان گے تے اوہدی وی عزت نفس دی حفاطت فرمان گے۔
امام طبرانی نے صحیح سند دے نال حضرت ابو سعید خدری دی روایت نقل فرمائی اے کہ رسول اللہۖ نے ارشاد فرمایا: جہڑا شخص اپنے مومن بھرا دے عیب نوں ویکھ کے لکا لیندا اے تے اللہ اوہنوں بدلے وچ جنت عطا فرمان گے۔
احادیث مبارکہ دے چانن وچ ایہہ گل سانوں پتہ ہوندی اے کہ سانوں اپنامزاج ایسا بنانا چاہیدا اے کہ اسیں دوجیاں دے عیب نوں جگہ جگہ نہ دسدے پھرئیے۔ سانوں عیب گوئی توں وی شریعت منع کردی اے تے عیب جوئی توں وی۔ سنن ابن ماجہ وچ حضرت عبداللہ بن عباس نبی کریمۖ دا ارشاد نقل فرماندے نیں :جہڑا کسے دوجے دی پردہ پوشی کردا اے اللہ قیامت والے دن اوہدے عیب تے گناہواں نوں لکا لین گے تے جہڑا شخص لوکاں دی پردہ داری نہیں کردا اے اللہ تعالیٰ اوہنوں گھر بیٹھے ذلیل تے رسوا کر دیندا اے۔
دوجے پاسے ایہہ وی حقیقت اے کہ جیوں جیویں اسیں ڈیجیٹل دور وچ داخل ہوندے جا رہے آں ایس دوڑ وچ ہمدردی احساس’ مروت تے لحاظ سب کدھرے پچھے چھڈ آئے آں۔ پہلے کدی جے کدھرے دو لوکاں وچ لڑائی جھگڑا ہوندا تے تیجا فریق اوہناں وچ صلح کرواندا سی مگر اج کدھرے لڑائی ہوندی اے تے تیجا فریق دونواں دی ویڈیو بنا رہیا ہوندا اے۔ لوک کسی مردے ہوئے انسان نوں بچان دی کوشش کرن دے بجائے اوہنوں وائرل کرن لئی تے جعلی شہرت حاصل کرن لئی ویڈیو بنان تے اپ لوڈ کرن وچ لگ جاندے نیں۔ ایس حوالے نال اج سانوں ساریاں نوں اپنی حالت ویکھ لینی چاہیدی اے۔ کیہ اسیں اوہ کم کر رہے آں جہدے توں قیامت والے دن اللہ تعالیٰ ساڈے عیب تے گناہواں نوں لکا لین گے یا فیر اسیں اوہ کم کررہے آں جہدے توں انسان اپنے گھر بیٹھے رسوا ہو جاندا اے۔ ایہہ گل ساڈے ساریاں لئی لمحہ فکر اے۔