ٹرمپ دا دورئہ بھارت تے ساڈی خوش فہمی

لکھت:حمیداللہ بھٹی

ڈونلڈ ٹرمپ روایتی صدر نہیں سگوں کافی منہ پھٹ نیں تے اوہناں نوں جو کہنا ہوندا اے اوہ موقع محل نوں خاطر وچ لیائے بغیر کہہ جاندے نیں جہنوں کجھ لوک صاف گوئی قرار دیندے نیں پر کجھ اصحاب دانقطہ نظر ایہ اے کہ ٹرمپ نوں دنیا دی واحد سپر طاقت دے صدر ہون دا احساس اے ایسے وجہ توں کسے نوں خاطر وچ نہیں لیاندے کیوں جے اوہ جاندے نیں امریکہ دنیا لئی اہم اے تے کوئی ملک نظر انداز نہیں کر سکدا پر قیافے تے اندازے لاندیاں ہوئیاں ذہن وچ رکھن والی گل ایہ اے کہ بطور صدارتی امیدوار وی اوہناں نے مسلم دنیا دے خلاف متنازعہ گلاں کیتیاں تے فیر منتخب ہو کے متنازعہ گلاںنوںعملی جامہ وی پوایا جہدے توں ایہ تاثر پیدا ہویا کہ خاص طور تے اسلام اوہناں دے نشانے اُتے اے، بھارت دے پہلے دورے تے وی اوہناں نے کئی متنازعہ گلاں کیتیاں نیں پر ہن انج محسوس ہوندا اے کہ ٹرمپ اینے وی سادہ نہیں جنے نظر آن دی کوشش کردے نیں اوہ منہ پٹ ای سہی پر جہڑی گل توں امریکی مفادات تے زک دا اندیشہ ہووے بولدیاں ہوئیاں یاں تے چپ رہندے نیں یاں فیر متوازن لہجہ اپنا لیندے نیں۔چار سالہ صدارتی مدت دے دوران ٹرمپ پہلی واری بھارت دے دورے تے آئے تے نریندر مودی دی مہمان نوازی توں لطف اندوز ہوئے میزبان نے اپنے پروہنے نوں خوش کرن لئی کیہ جتن نہیں کیتے غربت لُکان لئی راہواں دے آلے دوالے کندھاں تک بنا دتیاں تاں جے پروہنے چنگا تاثر لے کے جاوے حالاں جے متنازعہ شہریت دا قنون بنان دی وجہ توں بھارت دے طول عرض وچ انتشار و افراتفری اے مظاہرے و احتجاج روز دا معمول نیں کشمیر دی خصوصی حیثیت دا خاتمہ اقوام عالم دے ساہمنے کیتے وعدیاں توں پھرن دے مترادف اے جہدے بعد دنیا وچ بھارت دے بارے چنگا تاثر زائل ہو گیا اے ایس لئی اک ارب 30کروڑ دی منڈی دی وجہ توں کوئی ملک کھلم کھلا تنقید کرن دی جسارت نہیں کردا سگوں سب نے اپنے معاشی مفادات دی وجہ توں خاموشی اختیار کر رکھی اے ایس لئی نریندر مودی دی موجودگی وچ احمد آباد وچ خیر مقدمی تقریب وچ ٹرمپ نے پاکستان بارے چنگے کلمات بولے پر چنگے کلمات نال سانوں خوشی فہمی دا شکار ہون دی بجائے سوچ سمجھ کے ای اعتبار یاں اعتماد کرنا چاہیدا اے۔نمستے ٹرمپ دی تقریب وچ امریکی صدر دا پاکستان نال چنگے مراسم دے ذکر تے دہشت گردی دے خلاف پاکستانی اقدامات دی تعریف نال بھارت قدرے پریشان اے تے پاکستان نوں عالمی سطح تے تنہا کرن دی مودی دی مہم دی نکامی ظاہر ہوئی اے پر تلخ سچ ایہ اے پچھلے چودہ ورھے دے دوران کسے امریکی صدر نے پاکستان دا دورہ کرن دی زحمت نہیں کیتی حالاں جے سرد جنگ دے دوران امریکی مفادات دے تحفظ دی پاداش وچ پاکستان نے بہت نقصان چکیا اے روس دی دشمنی مول لئی۔ جارج بش مارچ 2006وچ مختصر دورے تے پاکستان آئے پر پاکستان کوشش دے باوجود اقتصادی شراکت داری دا معاہدہ نہیں کر سکیا جہدا مطلب ایہ اے کہ امریکہ نوں پاکستان دے نال اقتصادی شراکت داری وچ دلچسپی ای نہیں وجہ ایہ اے کہ جنوبی ایشیا وچ بھارت ورگی وڈی تے کوئی منڈی نہیں بھارت دے نال امریکہ دا تجارتی حجم 150ارب ڈالر دے ہندسیاں نوں چھون لگا اے جد کہ پاک امریکہ تجارت چھ ارب 60کروڑ ڈالر دے لگ بھگ اے چین دی معیشت تے قوت کا توڑ بھارت دے سوا کوئی نظر نہیں آندا۔خیر مقدمی تقریب وچ میزبان دی منشا دے خلاف پاکستان دے حق وچ چنگے کلمات دی وجہ ایہ اے کہ افغان امن معاہدے لئی واشنگٹن انتظامیہ نوں اجے پاکستان دی لوڑ اے نیز علاقے وچ روس، چین، ترکی تے پاکستان دے ودھدے مراسم نوں اتحاد بنن توں روکنا اے ایس لئی فوجی تربیت دا پروگرام بحال کیتا اے کشمیر تے ثالثی دی پیشکش دے جواب وچ ریاست نوں بھارت دا حصہ بنان دا مودی دا عجلت وچ کیتا فیصلہ ٹرمپ نوں چنگا نہیں لگا پر ایس فیصلے نوں اوہ ختم کران دا وی خواہشمند نہیں تے پاکستان نوں کسے طرح مذاکرات دی میز تے لیانا چاہندا اے پر عمران خان دی موجودگی وچ ہن ڈرا دھمکا کے کم نہیں لیا جا سکدا اوہ وی ٹرمپ دی طرح منہ پھٹ نیں ایس لئی ہن دوستی جتا کے گل بات تے راضی کرن دی کوشش کیتی جا رہی اے ۔ احمد آباد وچ عوامی اجتماع وچ ٹرمپ نے پاکستان دے نال تعلقات دا حوالہ دتا جہدے تے مودی بھونچکا رہ گئے تے بھارتی میڈیا نے ٹرمپ تے تنقید شروع کر دتی حالاں جے امریکہ و بھارت مشترکہ اعلامیے وچ پاکستان نوں دہشت گرداں نوں زمین استعمال نہ کرن دین تے ممبئی و پٹھان کوٹ حملیاں دے ملزماں نوں سزا دین دا مطالبہ کیتا گیا اے مشترکہ اعلامیہ ظاہر کردا اے کہ دوواں ملکاں دی سوچ اک اے ایس لئی کجھ چنگے الفاظ سن کے پاکستان نوں احتیاط دا دامن نہیں چھڈنا چاہیدا۔امریکہ دی زوال پذیر اسلحے دی صنعت نوں چنگے خریداراں دی اشد لوڑ اے چاہوے سعودی عرب یاں اسرائیل یاں بھارت ہووے اوہنوں ناز بردار ی دے بدلے وچ اسلحہ ویچن وچ دلچسپی اے کسے ملک وچ انسانی حقوق پامال ہون یاں نسل کشی ہو رہی ہووے جے خریدار وڈا ہووے تے ساری خرابیاں توں چشم پوشی کر لیندا اے نئی دہلی وچ ذرائع ابلاغ دے نمائندیاں نال گل دے دوران ٹرمپ نے کشمیر سنے مذہبی آزادی تے اقلیتاں دے حقوق تے مودی نال ہون والی تفصیلی گل بات دی تصدیق کیتی پر انج لگدا اے ٹرمپ دے قول و فعل وچ تضاد اے ایس لئی تے بھارت نے ٹرمپ دی کسے نصیحت تے عمل نہیں کیتا دہلی چار دناں توں سڑ رہیا اے 28مسلمان جاناںتوں ہتھ دھو چکے پر صورتحال بہتر نہیں ہو رہی سگوں دارالحکومت وچ بلوائیاں دے مسلماناں تے حملیاں تے املاک نذرآتش کرن دے دوران پلس بھرپور معانوت کردی اے کیہ ایہ ظلم و بربریت دی نظر توں اوجھل رہی؟ یاں غریب بستیاں نوں لُکان لئی کندھ بنان دی طرح ایتھے وی مودی دا کرشمہ کم کر گیا؟ دنیا بھر دا میڈیا ہندوواں دی سفاکیاں وکھا رہیا اے پر ٹرمپ چپ نیں مبادا تن ارب ڈالر اسلھے دا معاہدہ خطرے وچ پے جاوے ٹرمپ اسلحے دے تاجر دی حیثیت نال تے خاصے کامیاب نیں پر نوبل انعام لئی اوہناں نوں اجے بہت کجھ کرن دی لوڑ اے پچھلے ورھے پنج اگست توں کشمیر وچ کرفیو اے تے نوجواناں نوں گھراں توں کڈھ کے فوج قتل کر رہی اے فیر وی مودی دی تعریف کیتی جا رہی اے دوغلے پن نال مسئلے بھلا حل ہو سکدے نیں کشمیر تے ثالثی دی پیشکش نال خطے دا ایہ دیرینہ مسئلہ حل نہیں ہو سکدا جدوں تک عملی طور تے کجھ نہیں کیتا جاندا اودوں تک ثالثی دی گلاں نال مثبت نتیجہ برآمد نہیں ہو سکدا۔ایہدے وچ شک نہیں کہ مملکتاں دے تعلقات مفادات دے تابع ہوندے نیں مودی دی آرزو سی کہ ٹرمپ نوں بھارت بلا کے پاکستان دے خلاف نفرت انگیز مہم چلائی جاوے تے دنیا نوں اپنی امن پسندی دا یقین دوایا جاوے پر ایہ آرزو یاں چال بری طرح نکام ہو گئی اے جہدی وجہ ایہ اے کہ پاکستان نوں امریکہ اجے ناراض نہیں کر سکدا پر اوہدے مفادات بھارت نال وابستہ نیں حالاں جے دنیا نہ تے بھارت نوں ذمہ دار ملک سمجھدی اے تے نہ ای ہن سیکولر تسلیم کرن نوں تیار اے پر تعلق بن کے رکھنا چاہندی اے ٹرمپ نے پاکستان تے عمران خان دی تعریف تے کر دتی پر کشمیر وچ جنم لین والے انسانی المیے نوں نظر انداز کر دتا اے جہدا مطلب اے کہ بھارت نال اوہنوں پیار اے کیوں جے وڈی منڈی ہون دے نال اوہ اسلحے دا وی چنگا خریداری اے پاکستانی قیادت نوں کشمیر تے ثالثی دی پیشکش قبول کردیاں حکمت و تدبر تے احتیاط دا مظاہرہ کرنا چاہیدا اے کیوں جے ٹرمپ نے فلسطین دی طرح جے حل تھوپ دتا تے اسیں کیویں انکار کراں گے تے انکار دا جواب کیہ پیش کراں گے؟ محتاط رہن وچ ای عافیت اے خوش فہمی دا شکار ہو کے نقصان کرنا دانشمندی نہیں۔