’’میرا جسم میری مرضی‘‘

لکھت:ارشاد عارف

پچھلے ورھے عورت مارچ وچ جہڑے بینر نمایاں ہوئے اوہناں تے تحریر نعریاں وچوں محتاط تے ذمہ دار پرنٹ میڈیا نے صرف میرا جسم میری مرضی نوں قابل اشاعت سمجھیا باقی نعرے ایس قدر لغو غلیظ تے دل آزاد سن کہ عورت مارچ دے علمبردار تے حامی الیکٹرانک میڈیا تے اینکراں نوں وی وکھان دی جرأت نہ ہوئی۔ بیہودگی تے غلاظت دا ایہ سودا ایس واری فیر وِکن نوں تیار اے تکنیک پر ایس واری وکھری اختیار کیتی گئی۔ سینیٹ وچ پیپلزپارٹی دی رکن شیری رحمان تے پریس کانفرنساں وچ بلاول بھٹو زرداری نے عورت مارچ دی حمایت دا اعلان کیتا۔ سوشل میڈیا تے الیکٹرانک میڈیا تے بحث چلی تے تحریک انصاف وچ موجود کدھرے دی اِٹ کدھرے دا روڑا وی پچھے نہ رہیا، مسلم لیگ دے مشاہد اللہ خان تے جاوید لطیف نوں اللہ خوش رکھے قومی احساسات دی ترجمانی کیتی۔ اک ٹی وی چینل تے ماروی سرمد تے خلیل الرحمان قمر وچکار تلخ جملیاں دا تبادلہ ہویا تے یار لوکاں نے خلیل الرحمان قمر نوں پاکستانی مرداں تے عورت مارچ دے مخالفاں دا نمائندہ قرار دے کے طوفان بدتمیزی برپا کر دتا۔ خلیل الرحمان قمر نوں اشتعال کیہنے دوایا میرا جسم میری مرضی دے مقالے وچ میری زبان میری مرضی دا نعرہ مستانہ لان تے اوہناں نوں مجبور کیہنے کیتا؟ ایس گل توں ہٹ کے خلیل الرحمان قمر دا طرز تخاطب تے لفظاں دا انتخاب ٹھیک نہ سہی اسلامی اقدار سماجی روایتاں تے اخلاقی ضابطیاں دے پابند و علمبردار بندے نوں اجہے موقعیاں تے ای ضبط و تحمل دا دامن تھامنا ہوندا اے تے کھرے بندے دی پہچان کرانی پیندی اے۔ ظفر آدمی اس کو نہ جانیے گا ہو وہ کیسا ہی صاحب فہم و ذکا جسے عیش میں یاد خدا نہ رہی جسے طیش میں خوف خدا نہ رہا غصے دے بارے وچ ایس لئی آکھیا گیا اوہ عقل نوں کھا جاندا اے کہ طیش وچ انسان دی زبان قابو وچ رہندی اے نہ لفظاں دے انتخاب تے قدرت برقرار۔ اکثر اینکر سوشل ایکٹوسٹ تے خلط مبحث د ے مرض وچ مبتلا دانشور اصل موضوع توں توجہ ہٹان تے اپنے موقف دی کمزوری نوں لُکان لئی مدمقابل نوں قطع کلامی تے یاں اوہ گوئی توں اشتعال دواندے تے تلخ کلامی تے مجبور کر دیندے نیں زیر بحث موضوع تلخ کلامی دی دھول وچ دب جاندا اے تے عوامی جذبات و احساسات دینی شعائر اسلامی اقدار تہذیبی روایتاں تے اخلاقی ضابطیاں دی شکست و ریخت تے تلیا گروہ مظلومیت دی چادر لے کے اپنے حامیاں تے مخالفاں دوواں دی ہمدردیاں سمیٹن لگدا اے۔ ماروی سرمد تے خلیل الرحمان قمر دے معاملے وچ ایہو ہویا پر خلیل الرحمان قمر خوش قسمت نیں ستر فیصد سوشل میڈیا صارفین دی ہمدردیاں اوہناں نے سمیٹ لئیاں تے روشن خیال مرد و خواتین دی اکثریت نے اوہناں تنگ آمد بجنگ آمد دی رعایت دتی ۔ حکم خداوندی پر ایہو اے کہ جدوں گل بات دے دوران کسے اجڈ نال واہ پوے تے اوہنوں آداب کہہ کے لنگھ جاؤ۔ عورت مارچ دے حامی تاویلات جو وی لبھ کے لیان تے مکروہ ایجنڈے تے حقوق نسواں دا دلفریب غلاف چڑھان پر ایہدا مقصد ساڈیاں ماواں، بھیناں، دھیاں نوں آزادی و خود مختاری دے ناں تے نکاح دے بعد میاں بیوی دے فطری تعلق بالاں دی پیدائش و تربیت حفظ عصمت و فروج عزت و آبرو دے مشرقی تصور گھریلو ذمہ داریاں تے بالی عمریا وچ ماں پیو دی نگرانی توں نجات دوانا اے۔ عورت مارچ دے حق وچ پرجوش مہم چلان والے مردوخواتین وچ اکثریت اوہناں دی اے جہڑے پاکستان دے اسلامی تشخص مذہب و اخلاقیات توں الرجک لادینیت دے پرچارک کرپشن اقربا پروری تے مادر پدر آزاد تہذیب دے مبلغ تے جسم فروشی بے حیائی عریانی نوں بندے دا ذاتی معاملہ قرار دین دے علمبردا نیں۔ ایہو 1973دے آئین وچ موجود اسلامی شقاں بالخصوص تحفظ ختم نبوت تے ناموس رسالت شراب و زنا بالرضا دی ممانعت دے قوانین دا خاتمہ چاہندے نیں۔ اینی اخلاقی جرات اوہناں وچ نہیں کہ اوہ کھل کے اپنے اصل عزائم نوں عوام تے عیاں کر سکن۔ آزادی نسواں دی آڑ وچ ایہ مافیا ساڈی تہذیبی تے ثقافتی جڑاں وچ تیزاب سُٹ کے اپنے غیر ملکی آقاواں دے ساہمنے سرخرو ہونا چاہندا اے۔ بجا کہ ہندو کلچر تے روایتاں توں متاثر قبائلی تے جاگیردارانہ معاشرے وچ عورت مظلوم اے تے حق تلفی دی عادی پر صرف عورتاں نہیں مرداں دے حقوق سلب کرن والا ایہ طبقہ موم بتی مافیا دا ممدوح تے سرپرست اے۔ عورتاں نوں ماپے دے ترکے تے تعلیم توں محروم رکھن ، نکی عمر دی شادی دے علاوہ کمسنی وچ زیادتی دا نشانہ بنان پسند دی شادی تے زندہ گاڑن تے سوار اونی کارا کاری دے فیصلے سنان والے جاگیردار تے وڈیرے پیپلزپارٹی مسلم لیگ (ن) تحریک انصاف دی صفاں تے پارلیمنٹ دے ہر ایوان وچ موجود نیں پر مجال اے کہ فارن فنڈز این جی اوز انسانی حقوق کمیشن تے ساڈے ترقی پسند میڈیا نے ایہناں عیاش و بدقماش ظالماں دے خلاف کوئی زوردار مہم چلائی ہووے۔ ایس بے ہودہ رسم و رواج نوں مذہب دی تائید و حمایت حاصل نہیں ایہ ساڈی اسلامی تہذیبی و ثقافتی روایتاں دا حصہ وی نہیں پر موم بتی مافیا ہمیشہ ٹارگٹ مذہب نوں کردا اے تے پناہ سیکولر ازم لادینیت وچ لبھدا اے۔ حضور اکرمؐ نے فرمایا جہڑا بندہ دو دھیاں دی پرورش، تعلیم و تربیت خوشدلی نال کرے اوہ روز قیامت میرے شانہ بشانہ جنت وچ داخل ہووے گا۔ آپؐ زندگی بھر دو عورتاں دا استقبال کھڑے ہو کے فرماندے اک اپنی رضاعی والدہ حضرت حلیمہ سعدیہؓ تے دوجی صاحبزادی حضرت فاطمتہ الزہراؓ۔ میرے نزدیک اوہ کلمہ گو جہڑا عورت ہون پاروں ماں دھی بھین بہو بھابھی ورگے مقدس رشتیاں دی توہین و تذلیل دا مرتکب ہووے بدبخت تے سرور کائنات شفیع المذنبینؐ دی شفاعت توں محروم بندہ اے پر حقوق نسواں دے ناں تے صنفی امتیاز مرداں توں نفرت عریانی و فحاشی جسم فروشی تے مادر پدر آزادی دی ترویج؟ حمایت کیتی جا سکدی اے نہ ایہ معاشرہ اجازت دیوے گا۔ کشمیر تے بھارت وچ عورتاں نال زیادتی دے واقعات تے مغربی میڈیا چیخ اٹھیا۔ بھارتی خواتین نے وی صدائے احتجاج بلند کیتی پر ہن تک ایہناں مظلوم عورتاں دے حق وچ اک وی عورت مارچ نہیں ہویا۔ خاندان دے اسلامی تصور دا ذکر کردیاں حقوق نسواں دی علمبردار خواتین رہنماواں دی زبان تے چھالے پیندے نیں۔ خلیل الرحمان قمر دے انداز تخاطب تے مشتعل مردوخواتین وچوں کسے دی رگ حمیت شیریں مزاری زرتاج گل تے خاتون اول بشریٰ بی بی دے خلاف سیاسی مخالفاں دے توہین آمیز ریمارکس تے پھڑکی نہ ڈاکٹر شاہد مسعود ڈاکٹر عامر لیاقت حسین دے خلاف گالھاں بھرے ٹویٹس تے وفاقی وزیر علی محمد خان تے مولانا حمد اللہ دے نال نیشنل ٹی وی چینلز تے ناشائستہ گل بات تے کوئی سیخ پا ہویا۔ شاید مغرب دی عطا کیتی ترقی پسند اخلاقیات دے تحت روشن خیال عورتاں نوں گالھاں دی آزادی اے۔ دوجیاں دے عقائد جذبات و احساسات دی توہین بنیادی انسانی حق تے معاشرے وچ فساد برپا کرنا فرض عین۔ عرصے توں پاکستان وچ زنا بالرضا نوں عورت دے بنیادی حق شادی دے بعد عورت دی مرضی دے بغیر جنسی تعلقات نوں زنا بالجبر دے طور تے متعارف کران تے ہم جنس پرستی نوں فروغ دین دی کوشش ہو رہی اے۔ ایس ایجنڈے تے عورت مارچ دے نعریاں وچ مماثلت اے پر اسیں ماروی سرمد تے خلیل الرحمان قمر وچکار تلخ کلامی نوں لے کے بیٹھے نیں۔ میرا جسم میری مرضی دے حق وچ دلائل دے ڈھیر لان والے ذرا سوچن کہ مخالفاں نے زباناں تے ہتھ کیتا آئی ایم ایف توں قرض لئے نیں یاں اوہناں نوں استعمال کرن لئی امریکہ تے اقوام متحدہ دی اجازت چاہیدی اے؟مہذب معاشرے وچ حدود و قیود دے تحت زندگی گزردی اے رشتیاں ضابطیاں تے تہذیبی روایتاں دے برعکس مادر پدر آزادی صرف جگل دے جانوراں نوں دستیاب اے یاں بے خدا معاشرے دے حیوان ناطق نوں۔ پاکستان خدانخواستہ جنگل اے نہ خدا دی باغی ریاست۔