صحافت اک بہت ای مقدس

صحافی دا مقام کسے ولی نالوں گھٹ نہیں کیوں کہ صحافت او پیشہ اے
جدے وچ انسانیت دی خدمت کیتی

محمد افضل طاہر
وزیرآبادی

صحافت اک بہت ای مقدس پیشہ اے صحافت نال جڑے لوک جیکر ایس پیشے نوں پوری ایمانداری نال نبھان تے اپنے فرائض پوری ایمانداری نال پورے کرن تے فیر اک صحافی دا مقام کسے ولی نالوں گھٹ نہیں کیوں کہ صحافت او پیشہ اے جدے وچ انسانیت دی خدمت کیتی جاندی اے ہر ظلم کرن والے دے خلاف تے مظلوم دے حق لئی آواز چکی جاندی اے جتھے وی کسے ماڑے بندے نال ظلم ہو ریا ہووے یا اوہدے نال بے ایمانی ہو رہی ہووے اوتھے قانونی ادارے یا پنچائیت اوس ماڑے نال جے انصاف نہ کر رہے ہون تے اوتھے فیر اک صحافی اپنا فرض نبھاندا اے او صحافی فیر اوس ماڑے لئی آواز چکدا اے تے اوہنوں انصاف دواندا اے صحافت او پیشہ اے جیڑا صرف تے صرف انسانیت دی خدمت لئی تے حق سچ دی آواز نوں بلند کرن لئی کیتا جاندا اے صحافت نوں صرف پیسہ کمان لئی احتیا ر نہیں کیتا جا سکدا حالانکہ کجھ وجوہات ایسیاں وی نیں کہ صحافت وچ کاروبار ہوندا وی اے مثال دے طور تے جیکر ادارہ اپنے نمائندے کولوں کسے اشتہار دے پیسے وصول کردا اے تے فیر اک صحافی دا حق بن دا اے کہ او وی اپنے پیسے وصول کرے ۔
جیکر صحافت وچ بلیک میلنگ کرپشن کسے دے خلاف غلط خبر لانی یا کسے نوں ناجائز پریشان کرنا ایہو جے غلط کم ہون گے تے فیر ایہو جے کم کرن والا صحافی نہیں بلکہ شیطان دا چیلا کہلان دا حقدار اے بلکہ اداریاں نوں چاہیدا اے کہ اپنے ہر نمائندے تے نظر رکھن جیڑا وی نمائندہ بلیک میلنگ یا کرپشن کردا نظر آوے تے اوہنوں اوسے ویلے ادارے چوں فارغ کیتا جاوے
صحافت صرف اے نہیں کہ خبراں اکٹھیاں کیتیاں تے میل کر دتیاں نہیں بلکہ اک صحافی دا فرض ہوندا اے کہ او پہلے ہر خبر دی تحقیق کرے کہ آیا او خبر سچی وی ہے کہ نہیں کیوں کہ غلط خبر چھپن نال کسے دی عزت وی خراب ہو سکدی اے کسے نوں پریشانی دا سامنا وی کرنا پے سکدا اے ایس توں علاوہ اک صحافی نوں چاہیدا اےکہ اپنے علاقے تے ہر وقت نظر رکھے جتھے وی کوئی غلط کم ہو ریا ہووے یا کوئی وی کسے نوں ناجائز تنگ کر ریا ہووے یا کوئی کسے نال زیادتی کر ریا ہووے تے صحافی دا فرض اے کہ او ایناں دی نشاندہی کرے تے ایناں دے خلاف قانونی کاروائی کرواے میں اج اپنے شہر وزیرآباد دی صحافت بارے ذکر کرنا چاہواں گا وزیرآباد نے صحافت وچ بڑے بڑے وڈے ناں پیدا کیتے جدے وچ سب توں وڈا ناں جینوں پوری دنیا جاندی اے او مولانا ظفر علی خان دا ناں اے جیناں نوں پڑھ کے لوکی صحافی بنندے نیں ایس توں علاوہ وزیرآباد وچ مولانا ظفر علی خان توں لے کہ ہن تک جنے وی صحافی آے اوہناں نے مولانا ظفر علی خان دی چھتر چھاویں ای رہ کہ صحافت کیتی بلکہ وزیرآباد دے صحافی ہن تک تے آوندی حیاتی وچ وی مولانا ظفر علی خان دیاں صحافتی خدمات اتے مولانا دے دربار تے خاضری تے سلامی پیش کردے رہن گےمولانا ظفر علی خان توں بعد ہن تیکر وزیرآباد وچ جیڑا پریس کلب بنیا او وی مالانا ظفر علی خان دے ناں توں ای چل ریا اے تے مولانا دی تعلیمات تے عمل کردے ہویاں ای وزیرآباد دی صحافت نوں ہن تک چلایا جا ریا اے میں سمجھنا کہ وزیر آبادی دی دھرتی دے مہان صحافی جناں نے صحافت وچ اپنا ناں بنایا تے جناں ٹھیک معنیاں وچ صحافت دا کم کیتا اوناں دا ناں لینا وی بہت ضروری اے ایتھے میں اے وی کہنا چاہواں گا کہ جیکر کسے دا ناں رہ جاے یا میں اپنی کم علمی پاروں نہ لکھ سکاں تے میں پہلے ای معذرت چاہواں گا وزیرآباد دے بہت سارے صحافی جیڑےایس دنیا توں کوچ کر گئے نیں اوہناں دے وی ناں وچ شامل کراں گا محمد صدیق کھوکھر ؛عبداللطیف چوہان؛ سروش ندیم؛ منو بھائی؛ حافظ مشتاق کوکب ؛محمد صدیق چوہان؛ طاہر حسین وزیرآبادی ؛عطاالحق قاسمی؛ ظفراللہ نعمانی ؛امان اللہ نعمانی ؛ملک محمد شفیق؛ نصیر عاصی؛ ملک سعادت اللہ؛ عبدالکریم بٹ ؛نیاز احمد چوہان؛مدثر اقبال بٹ ؛افتحار احمد بٹ ؛صوفی اشرف نثار؛صابر حسین بٹ؛ملک نجیب اللہ سوہدروی؛ مہر خالد مجید ؛ شیح طارق امین خالد؛خواجہ شعیب؛سیف اللہ بٹ؛ ملک شکیل اعوان؛ مہر فیاض فیضی ؛ طاہر جاوید مھٹو؛؛ نعیم اشرف محمود احمدلودھی؛ مرزا تقی علی؛شہباز بخاری؛عتیق مہر:خواجہ وقار قمر؛ ضمیر کاظمی؛ ندیم صادق ؛نعیم میو ؛عمران ڈار؛تے ہور وی واہوا صحافی نیں جناں دے میں ناں نہیں لکھ سکیا میں اوہناں کولوں معذرت چاہواں گا ایہ وزیرآباد دے او صحافی نیں جناں نیں وزیرآباد دی صحافت وچ اپنا اک مقام بنایا تے وزیرآباد دا صحافت وچ ناں اچا کیتا ایناں صحافیاں وچ کجھ صحافی ایسے وی نیں جیڑے جمے پلے تے وزیرآباوچ نیں پر بعد وچ صحافت وچ اچا ناں بناں لئی شہروں باہرچلے گئے مثال دے طور تے منوبھائ صحافت دا وڈا ناں جناں دا تعلق وزیرآباد نال سی پر او لاہور چلے گئے تے صحافت وچ وڈا ناں کمایا مدثر اقبال بٹ جناں نے صحافت وچ وڈا ناں پیدا کیتا تے ورلڈ پنجابی یونین دے پردھان وی رہے تے ایس ویلے وی پنجابی میڈیا دے چیئرمین وی نیں ایناں دا تعلق وی وزیرآباد نال ای اے تے ایس ویلے ماں بولی پنجابی دا پرچار کر رہے نیں نیاز احمد چوہان ملک شفیق نصیر عاصی ظفر اللہ نعمانی طاہر وزیرآبادی مہر خالد مجید؛ صدیق چوہان صدیق کھوکھر ورگے مہان صحافی جیڑے ایس دنیا توں چلے گئے نیں ایناں سب نیں وی صاف تے سچی صحافت کر کے اپنا تے اپنے شہر وزیرآباد دا ناں روشن کیتا پریس کلب وزیرآباد وچ شروع توں ای الیکشن دے ذریعے صدر چیئرمین تے جنرل سیکرٹری دا انتحاب ہوندا ریا اے ایس ویلے پریس کلب وزیرآباد دے سر پرست اعلی صابر حسین بٹ صاحب نیں صابر بٹ صاحب دیاں وزیرآباد دی صحافت وچ بہت زیادہ خدمات نیں صابر بٹ صاحب نیں بغیر کسے لالچ توں سچی تے سُچی صحافت کیتی اے تے کر رہے نیں بلکہ بٹ صاحب نیں ہر اوکھے سوکھے ویلے وزیرآباد پریس کلب دا جانی مالی ہرلحاظ نال ساتھ دتا وی تے دیندے وی نیں چیئرمین جناب افتحار احمد بٹ صاحب نیں افتحار احمد بٹ صاحب نیں وی وزیرآباد دی صحافت وچ اپنا اک کردار ادا کیتا تے وزیرآباد دے ہر شہری لئی اک مسیحا بن کے صحافت کردے نیں ۔
افتحار بٹ صاحب اک نڈر تے بے باک صحافی نیں ایس توں علاوہ وزیرآباد الیکٹرانک میڈیا وی وزیرآباد دی صحافت وچ اپنا اہم کردار ادا کر ریا اے چوں کہ ہن دور وی الیکٹرانک میڈیا تے سوشل میڈیا دا اے ایس لئی وزیرآباد دی صحافت نوں چاہیدا اے کہ الیکٹرانک میڈیا تے سوشل میڈیا وچ اپنا مثبت کردار ادا کرن وزیرآباد الیکٹرانک میڈیا نو ں کئی وریاں توں گروپ بندیاں وچ ویکھیا جا ریا اے تے مینوں لگدا اے کہ اے کوئی چنگی گل نہیں کیوں کہ ساڈہ شہر وزیرآباد کوئی ایڈا وڈا شہر نہیں کہ ایتھے صحافت نوں گروپاں وچ تقسیم کیتا جاوے یا دہڑے بناے جان ایتھے میں اپنے والد صاحب طاہر حسین وزیرآبادی ہوراں دا ذکر کرنا چاہواں گا کیوں کہ او وی ایہو ای گل کردے سن کہ وزیرآباد دی صحافت نوں اک جوٹھ ہو کہ رہنا چاہیدا اے اے دہڑے بندیاں تے گروپ بندیاں نہیں ہونیاں چاہیدیاں طاہر وزیرآبادی ہوراں اپنے آخری ساہنواں تک وزیرآباد دی صحافت نوں اکٹھیاں کرن دی کوشش کیتی تے میں وی ایہو ای چاہواں گا۔
کہ گروپ بندیاں ختم کر کے اک جوٹھ ہو کے وزیرآباد دی صحافت نوں صاف تے شفاف طریقے نال چلایا جاوے ہاں جیکر اک الیکشن کمیشن بنا کے صاف شفاف طریقے نال صلح صفائی دے نال الیکشن کرواے جان تے ایدے وچ کوئی حرج نہیں بلکہ اے بہت چنگی گل اے کہ جیڑا وی چیئرمین منتحب ہووے او ووٹ لے کے منتحب ہووے ایدے وچ فیر اوہدی چوکھی عزت ہووے گی پر اے گل چنگی نہیں کہ ہر بندہ اپنا اپنا دہڑہ بنا کہ تے اپنی مرضی دا چیئرمین تے سیکرٹری منتحب کر لے ایس طرح فیر الیکٹرانک میڈیا دے صحافی اک دوسرے نال کھندکاں ای کرن گے فیر کوئی چنگی صحافت نہیں کر سکن گے ایس لئی الیکٹرانک میڈیا دے صحافیاں نوں وزیرآباد دی صحافت نوں بہتر کرن بارے سوچنا پووے گا تے میں سمجھناں کہ صحافت لئی میرٹ نوں ضرور سامنے رکھنا چاہیدا اے اے ضروری اے کہ جس بندے نوں تسیں صحافت وچ شامل کر رہےاو کیا اوہنوں صحافت بارے علم وی ہے کہ نہیں اکثر ویکھن وچ آندا اے کہ اوہناں لوکاں گل وچ کارڈ پاے ہندے نیں جناں نوں نہ تے گل کرن دی جاچ ہندی اے تے نہ ای او وچارے خبر بنا سکدے نیں ایس لئی صحافتی اداریاں نوں چاہیدا اے کہ جس بندے نوں وی پریس دا کارڈ ایشو کرن پہلے اوہدا اک ٹیسٹ لیں کہ کیا اوہنوں صحافت بارے پتہ وی ہے کہ نہیں ساڈے معاشرے وچ صحافت ایسے لئی ای چوکھی بدنام اے کہ زیادہ تر لوک رشوت دے کے تے تعلق دی بناء تے صحافی بن جاندے نیں تے فیر ظاہری گل اے کہ او لوک فیر صحافت وچ بلیک میلنگ تے کرپشن ای کرن گے لہذا وزیرآباد پریس کلب دے مرکزی ممبران نوں چاہیدا اے کہ او وزیرآباد دی صحافت نوں بلیک میلنگ تے کرپشن توں پاک تے صاف کرن تے وزیرآبادی دی ساری صحافت نوں اک مٹھ کرن دی کوشش کرن اللہ پاک وزیرآباد تے پورے پاکستان تے اپنا رحم کرم تے فضل فرماے آمین