فادرز ڈے

’’باپو تیرا کر کے مَیں پَیراں تے کھلو گیا‘‘

منصور عزمی

’’فادرز ڈے‘‘ہر سال جون دے مہینے دے تیجے ایتوار نوں آئوندے اے۔ ’’فادرز ڈے‘‘ خاندان دی سنبھال کرن وچ پیوواں دے اہم کرداردا سنمان کرن لئی منایا جاندا اے۔ ’’فادرز ڈے‘‘ دے اِس اْچیچے موقعے تے آئو کجھ سماں اوہناں سارے نوں خراج تحسین پیش کرئیے جنہاں اِس دنیا نوں اپنے بچیاں دے رہن لئی اک سوہنی تھاں بنایا اے۔ بھاویں اوہ تہاڈے ڈیڈی، دادا،چاچا، تایا ،ماما ، بھرا، اُستادیاں تہاڈے مذہبی راہنما ہن۔جیکر اوہ تہاڈے لئی باپ دی تھاںہن تاں اوہناں نوں دسو کہ اوہ تہاڈے لئی کنے خاص ہن۔
تسیں اکثر ویکھیا ہونا ایں کہ ماں اپنے بچے نوں جدوں چُکدی اے تے وکھی تے ڈھاکے چکدی اے۔ اصل وچ ماں ایہ چاہندی اے کہ جِتھوں تیک میں ویکھدی ہاں میرا بچا وی اوتھوں تک ویکھ سکے۔ پر یاد رکھنا باپ جدوں وی اپنے بچیاں نوں چُکدا ہے اور موڈھیاں تے دھنگاڑے چُکدا اے۔ کیوں جے باپ ایہ چاہندا اے کہ جتھوں تیک میں ویکھدا ہاں میرا بچا اُس تو ں وی اگانہ تیک ویکھ سکے۔ ایہ اک باپ دیاں اوہ کوششاں ہن جہڑیاں سانوں وڈیاں ہو کے چیتے آئوندیاں ہن۔ اپنے کیلنڈر تے اس دن نوں نشان لا لئو اتے اپنے پیار تے شکرگزاری دا اظہار کر کے اوہناں لئی اس دن نوں یادگار بنائونا ناںبھلو۔ اوہناں دیاں اوہناں کوششاں تے اک جھات ضرور مارو اتے اوہناں نوں نگھ پریم اتے مان دیو جنہاں کارن تسیں ایتھوں تیک اپڑے او۔ چڑھدے پنجاب دے شاعر اَمر سندھو جی اپنی اولاد لئی کوششاں کرن والے باپ نوں جہڑے انمول اکھراں راہیں خراج تحسین پیش کردے نے سانوں وی ایہناں خیالاں نال سہمت ہون دی لوڑ اے۔باپو تیرا کر کے میں پیراں تے کھلو گیاتو ں سیکلاں تے کٹی تے میں گڈی جوگا ہو گیا۔

’’فادرز ڈے‘‘دا اتہاس
’’فادرز ڈے‘‘ پہلی وار 19 جون، 1910 نوں واشنگٹن وچ منایا گیا۔ دو وار ہون والے سول یدھّ دے آگو اتے 14 بچیاں دے باپ’’ ولیم جیکسن سمارٹ‘‘ نوں اس خاص دن دا موڈھی منیا جاندا اے۔ 1909 وچ ولیم دی دھی سونورا سمارٹ ڈوڈ’’ فادرز ڈے‘‘ نوں اپنے باپ لئی منائون والی پہلی کُڑی مَنی جاندی اے۔ 1909 وچ جدوں اوہ ماواں دے دیہاڑ تے ماواں بارے اک وڈے پروگرام وچ تقریر کر رہی سی تے اُس نے دسیا کہ ساڈی ماں دے مرن توں بعد ساڈے باپ نے کنیاں مشکلاں اتے مصیبتاں نال اکلے 14 بچیاں نوں پالیا۔ اوہ چاہندی سی کہ اوہ اپنے باپ نوں ایہ دس سکے کہ اوہ اوہناں دیاں اولاد لئی کیتیاں کوشش توں کنی خش اے اتے ایہ دس سکے کہ اوہ ساڈے لئی کنا خاص اے۔ اِس لئی اوہنے اگلے ای سال 5 جون نوں اپنے باپ دے جنم دن تے ہی دنیا بھر دے باپاں نوں خراج تحسین پیش کرن لئی ’’سپوکین منسٹریئل الائنس‘‘ اگے اک پٹیشن اوہناں ساریاں باپاں لئی دھر دتی جنہاں ماں دے مرن توں بعد اپنی اولاد دی دیکھ ریکھ کرن دی ذمہ داری بڑے سُچجے ڈھنگ نال نبھائی۔ مقامی چرچ نے اُس دے اس خیال نوں قبول کر کے چرچ ولوں ہی اک حکمنامہ جاری کیتا جس دے مطابق 19 جون نوں اس دا آغاز کیتا گیا۔ اس پہلے فادرز ڈے دے پروگرام وچ سپوکین دے مئیر اتے واشنگٹن دے گورنر نے اْچیچے طور تے رلت کیتی۔
اس سال توں امریکا وچ باپ دے سنمان لئی یادگاری تقریباں ہندیاں رہیاں۔ پر کوئی پکا دن نہیں مِتھیا گیا۔ اس دن نوں سرکاری طور تے منائون لئی کیتے گئے جتناں نوں 60 سال لگ گئے۔ 1926 وچ نیو یارک وچ اس دن نوں منائون لئی سرکاری پدھر تے اک کمیٹی بنائی گئی اتے 1956 وچ امریکی کانگرس ولوں وی اس دن نوں منائون دے حق وچ اک قرارداد پیش کیتی گئی۔ اتے فر اخیر 1972 وچ امریکی صدر رچرڈ ایم۔ نکسن نے فادرز ڈے نوں قرارداد راہیں باقایدا طور تے من لیا گیا اتے ہر سال 19 جون نوں اس دن نوں منائون دا اعلان کیتا گیا۔
فادرز ڈے دی اُچیچتا
ایہ گل سو فیصد سچ اے کہ ماواں اپنیاں بالاں نوں بناں شرط اتے لوبھ پیار کردیاں ہن پر ایہ گل وی چیتے رکھن جوگ اے کہ باپ گھراں دے تھم ہندے ہن۔ہر خاندان دا سہارا ہندے ہن۔ اسیں ایہ گل تاں مخول وچ آکھ جاندے ہاں کہ ماں دے پیراں تھلے جنت ہْندی اے پر باپ دے پیراں وچ جُتّی وی ہیں ہْندی۔ ایہ گل مخول والی نہیں سگوں سوچن جوگ اے کہ باپ تاں ایہ چاہندا اے کہ اوہ ننگے پیریں رہ کے وی اپنی اولاد دیاں خُشیاں نوں پوریاں کر سکے۔ ایسے لئی تاں میاں محمد بخش صاحب ؒفرمائوندے ہن۔باپ سِراں دے تاج محمد ، ماواں ٹھنڈیاں چھاواںاوہ باپ جہڑا آپ بھُکھا رہ کہ اپنے بچیاں دا ڈِھڈ بھرن دا چارا کردا اے لوڑ اے کہ جے سارا سال نہیں تاں سال دا اک دن ہی اُس باپ دے ناں کر کے اُس نوں شکر گزاری دا مان بخشیئے۔
’’فادرز ڈے‘‘ بچیاں دے لئی اونہاں دے باپ دی اُچیچتا اتے اوہدے انمول ہون نوں سمجھن وچ مدد دیندا اے۔ایہ دن بچیاںنوں اپنے باپ دے نال اپنے تعلق اتے رشتے نوں وی مضبوط کرن لئی مدد کردا اے۔ ایہ دن اس کر کے وی منایا جاندا ے کہ اسیں اپنے اپنے باپ دیاں کیتیاں محنتاں اتے اُس کی شفقت دا اقرار کر سکئیے اتے اوہنوں ایہ دس سکیئے کہ تہاڈے بغیر ساڈی حیاتی رَڑی وانگر اے پر تہاڈے ہون کارن ساڈی حیاتی گلزار بن جاندی اے۔ ضروری نہیں کہ سال وچ بس اکو وار ہی اسیں ایہ کرئیے، سگوں چاہیدا اے کہ سال دا ہر دن اسیں اپنے اپنے باپ نوں ایہ احساس دواندے رہئیے کہ اوہناں توں باجھ اسیں کجھ وی نہیں۔
دنیا بھر دیساں وچ فادرز ڈے وکھّ وکھّ تریخاں اتے وکھو وکھرے ڈھنگ نال منایا جاندا اے۔اس سلسلے وچ وڈا جشن واشنگٹن، امریکا وچ منایا جاندا اے جتھے پہلا فادرز ڈے منایا گیا سی۔ دنیا دے وکھّووکھّ حصیاں وچ فادرز ڈے کویں منایا جاندا اے آئو اس تے اک جھات ماردے ہاں۔
کینڈا، برطانیہ، متحدہ عرب عمارات، ارجنٹائنا، فرانس، یونان، بھارت، آئرلینڈ، میکسیکو، پاکستان، سنگاپور، دکھنی افریکا اتے وینزوئیلا وچ جون دے تیجے ایتوار نوں فادرز ڈے منایا جاندا ہے۔ اس دن نوں دنیا بھر دے زیاداتر دیس وڈے طور تے بھرویں روپ نال منائوندے ہن۔یورپ دے کیتھولک دیس ہر سال 19 مارچ نوں فادرز ڈے نوں ’’سینٹ جوزف دی عید‘‘ ہون وجوں منائوندے ہن۔ستمبر دے پہلے ایتوار نوں آسٹریلیا اتے نیوزی لینڈ وچ وی فادرز ڈے ایسے وجوں ای منایا جاندا اے۔برازیل دے لوک اگست دے دوجے ایتوار نوںاس دن نوں منائوندے ہن۔ تھائی لینڈ وچ فادرز ڈے 5 دسمبر نوں اپنے راجے دے جنم دن دی یاد وچ منایا جاندا اے۔اتے ایسے طرحاں دینادے اڈو اڈ دیس واسی اپنی اپنی رہت اتے سبھیا چار مطابق اس دن نوں منائون دا جتن کردے ہن۔
اس وار فادرز ڈے 19 جون نوں آ رہیا اے۔ تاں کیہ تسیں اپنے سپر ڈیڈی نوں خش کرن لئی کوئی پروگرام بنایا اے؟ جیکر تسیں اجے وی فادرز ڈے لئی کوئی پروگرام نہیں بنایا تاں اجے وی سماں اے تسیں کسے بہت اچھے پروگرام دی تیاری کر لئو۔ تانجے ویلے سر پروگرام کر کے اپنے باپ دیاں اکھاں وچ خُشی دی چمک ویکھ سکو۔جے تسیں اپنے باپ دے نال رہندے ہو تاں سارے کم چھڈ کے اک پورا دن چھٹی کرکے اس دے نال گزارو۔ ماپیاں نال ودھیا سماں بتائونا اوہناں لئی فادرز ڈے دا سب توں ودھیا تحفا ہووے گا۔بچپن دیاں اوہناں انمول یاداں نوں تازا کرنا ہور وی خشی دی گل اے۔ ساڈی عمر بھاویں کنی وی ہووے اسیں ہمیشا اوہناں دناں دی یاد تازا کردے ہاں جدوں ساڈے والد صاحب ساہنوں اپنے موڈھیاں اُتے چکدے ہْندے سن۔ فادرز ڈے اوہ سماں ہندا ہے جدوں تسیں اوہناں سنہری دناں نال دُبارا جڑ سکدے او۔
اتے جے تسیں اوہناں کولوں دور رہندے اواتے اس دن تے اوہناں کول نہیں اپڑ سکدے تاں فر اوہناں نوں کجھ گھنٹے سکائپ یا وٹس ایپ تے ویڈیو کال کرو۔اوہناں لئی کوئی تحفا کورئیر کرو۔چیتے رکھن دی لوڑ اے کہ تسیں اوہناں لئی بھاویں جنیاں مرضی مہنگیاں اتے سوہنیاں شیواں دے تحفے خریدو، پر اک سدھی سانویں فون کال اوہناں دے ہونٹھاں تے مسکراہٹ لیائون دا سبب بن سکدی اے۔ اتے ایسے دی اوہناں نوں لوڑ وی ہندی اے۔