چونسا تے لنگڑی ٹیر

حناپرویزبٹ

جدوں وی خیانت سر چڑھ کے بولدی اے تے نہ کوئی وطن نظر آندا اے نہ عوامی مفاد‘ نہ ملک دی جغرافیائی سلامتی تے نہ معیشت نوں برقرار رکھن دی محبت باقی بچدی اے فیر قوم نوں دھوکھا دین لئی بار بار جھوٹ دی آڑ لینی پیندی اے۔ لوک سمجھ چکے نیں کہ اوہناں نوں صرف خواب وکھائے گئے‘ ایران دا انقلاب تے خمینی‘ رجب اردوان آئیڈیل‘ محمد بن سلمان ترقی دا استعارہ سب لولی پاپ سن۔ اک دن تے جمہوریت دی فرنی تقسیم کرنی شروع کر دتی جمہوری فرنی اجے مکمل ونڈی نہیں سی کہ صدارتی نظام دے پائے پکن لئی چلہے تے چڑھا دتے جو اج تک پک نہیں سکے۔ نریندر موندی دے جتن دی خواہش کردا کردا پیوٹن وچ جا کے لگا‘ حیران کن گل تے ایہہ وے کہ اک رات توں ودھ حوالات وچ رہ نہیں سکیا تے دعوے نیلسن منڈیلا بنن دے کر رہیا اے نام نہاد جمہوریت پسند پارٹی توں لے کے کابینہ تک عملی طور تے ہٹلر بنیا رہیا اقتدار توں لے کے بے دخلی دی رسوائی تک اوہنے جنے بیان بدلے نیں اوہدی مثال نہیں ملدی۔ ہر دن تقریباً سوشل میڈیا دے راہیں مین سٹریم میڈیا تے نشر کروان دا نشہ اوہنوں لے ڈبیا‘ چمک دے زور تے بنایا گیا بھان متی دا کنبہ روڑا روڑا ہو گیا جہدے تے پپٹ اپنا دماغی توازن کھو چکیا اے اوہدا ہر انٹرویو کسے سابقہ انٹرویو دی تردید تے مجسم شرمندگی ثابت ہوندا رہیا اے پر شرم تے شرم والیاں نوں ای آندی اے۔
بی بی سی دی اصلی گوری صحافی دے سامنے بڑھک مار بیٹھا کہ جو چاہے سوال کر لوو‘ پر ایس واری سارے سوال ای آئوٹ آف کورس نکلے‘ نہ کوئی فرمائشی سوال آیا نہ لیڈنگ‘ اوہنے جنے وی جوابات دتے اوہناں دا سوالات نال کوئی تعلق ای نہیں سی‘ عمر اکثر بندیاں نوں عقلمند بنا دیندی اے پر مجال اے اوہدی ودھدی عمر توں لمحہ بھر لئی وی شک پیا ہووے کہ اوہ اک سنجیدہ‘ عقلمند‘ مخلص تے روادار انسان اے کوئی اوہنوں دسے کہ لوکاں نوں پتہ چل گیا اے کہ اوہنے آپ بی بی سی نوں انٹرویو نشر کرن توں روکن دی درخواست رد ہون دی خبر چلوائی۔ 9 مئی نوں جو اوہنے لوکاں توں کروایا اوہدے توں وی لاتعلق ہو کے مکر جانا ای متوقع سی غریباں دے بچے‘ بھائی‘ باپ‘ ماواں تے بھیناں اوہدے ٹریپ وچ پھس کے جیل چلے گئے پر مجال اے اوہدے کن تے کوئی جوں وی رینگی ہووے‘ لگدا اے کسے دن اوہ وی کہہ دیوے گا کہ مینوں تے پتہ ای نہیں چلا کہ سارے الیکٹ ایبلز مینوں چھڈ گئے نیں لوکاں نوں پک ہو گیا اے کہ اوہنوں اقتدار وچ لیانا اک عارضی بندوبست سی جو پری میچور ہون تے دم دے چکیا اے۔
اک اوہ ویلا سی جدوں ایہ اپوزیشن دے مذاکرات دے مطالبے دا مذاق اڑاندا سی پر اوہ بدستور ایہ پراپیگنڈا کردا رہیا کہ اوہدا ووٹ بینک قائم اے۔ کوئی اوہنوں جگائو کہ جہناں نے لوکاں توں ووٹ لے کے جتنا سی اوہ کدی نہ پرتن لئی وکھ ہو چکے نیں پتہ تے اوس ویلے لگے گا جدوں الیکشن دا اعلان ہووے گا تے نہ اوہ ملک وچ ہووے گا تے نہ اوہدا کوئی نام لیوا‘ جعلی فائٹر کہہ رہیا اے کہ میری کمیٹی نوں قائل کر دیو میں پچھے ہٹ جاواں گا۔ حقیقت تے ایہہ وے کہ اوہ نُکرے لگ چکیا اے شاہ محمود قریشی دا ریکارڈ گواہ اے کدی اوہناں دے نہیں بنے‘ جہناں نے اوہناں نوں مقام و مرتبہ تے عزت دتی‘ جدوں اکثر بچن لئی پی ٹی آئی دے ڈبدے ٹائی ٹینک توں چھالاں مار رہے نیں اوہ اوہدا جھنڈا پھڑی رکھن دا دعویٰ کر رہے نیں۔ انج موجودہ حالت ٹانگہ پارٹی ورگی ہو چکی اے جہدیاں چھ سواریاں وی پوریاں نہیں ہو رہیاں لوکاں نوں جیلاں وچ پھسا کے اوہناں توں لاتعلقی اختیار کرن والا فیر سفید جھوٹ بول رہیا اے کہ میں کدی لوکاں نوں نہیں کہیا کہ اوہ جلائو گھیرائو کرو‘ کوئی اوہنوں دسو اوہدی سیاسی جدوجہد شروع ہوئے اجے اک مہینہ ای ہویا اے جے اوہنوں نیلسن منڈیلا بننا اے تے قید قبول کرنی پوے گی۔ ذریعاں دا کہنا اے کہ تعویز لکھن والی وی چھیتی اوہنوں داغ جدائی دے جاوے گی جہدے بعد اوہ وی برضا و رغبت جلاوطن ہون دا اعلان کرکے برطانیہ چلا جاوے گا۔
آخر وچ دو مزے دیاں گلاں‘ پہلی ایہ کہ اک مہینہ گزر گیا اے سوشل میڈیا تے ریڈلائن‘ ریڈلائن دا رولا پان والے غایب ہو گئے نیں جہدے تے لوک کہہ رہے نیں شکریہ حافظ صاحب‘ دوجی گل تے بڑی ای مزے دی لطیفہ مشہور ہو رہیا اے کہ شہبازشریف نے جدوں چونسے امب پیش کیتے تے ترکی دے صدر اردوان نے پچھیا لنگڑے دی سنائو اوہ کہندا ہوندا سی کہ کلا ای کافی آں؟ شہبازشریف ہس کے بولے ہاں اوہ ہن اکلا ای لنگڑی ٹیر کھیڈ رہیا اے۔