مسلم لیگ ن پنجاب جت پائے گی؟

وزیراعظم شہباز شریف اپنی حکومت دی آئینی مدت دے مقررہ وقت تے اختتام دا باضابطہ اعلان کر چکے نیں

حذیفہ رحمن

وزیراعظم شہباز شریف اپنی حکومت دی آئینی مدت دے مقررہ وقت تے اختتام دا باضابطہ اعلان کر چکے نیں۔ اگست دے تیجے ہفتے تک وفاق وچ وی نگران حکومت قائم ہو چکی ہووے گی۔ ملک تیزی نال عام انتخابات ول ودھ رہیا اے۔ کیہ عام انتخابات 90دناں وچ ہو جان گے‘ ایہدے اتے کجھ کہنا قبل از وقت اے۔ مگر ایہہ طے ہے کہ آن اولے کجھ مہینیاں وچ عام انتخابات دا پربندھ ہو جاوے گا۔ جہدے نتیجے وچ اک مستحکم سیاسی حکومت 5 سال لئی اقتدار سنبھالے گی۔ اتحادی حکومت دے بجائے کسی اک جماعت نوں واضح اکثریت ملن دے امکانات بوہتے نیں کیوں جے معاشی استحکام براہ راست سیاسی استحکام نال جڑیا ہویا اے تے سیاسی استحکام لئی ضروری اے کہ وفاق وچ اک مضبوط مستحکم حکومت ہووے جہڑی ہر طرحاں دی سیاسی بلیک میلنگ توں آزاد ہووے مگر وفاق وچ سادہ اکثریت لئی ضروری اے کہ پنجاب نوں فتح کیتا جاوے۔ جہڑی جماعت پنجاب وچ کلین سویپ کرے گی اوہو جماعت وفاق وچ مضبوط سیاسی حکومت بنان دی پوزیشن وچ ہووے گی۔ ایس ویلے پنجاب وچ ن لیگ تے پی ٹی آئی دا مقابلہ اے‘ دو تن حلقیاں دے علاوہ پاکستان پیپلز پارٹی دا وجود نہ ہون دے برابر اے۔ پنجاب ہمیشہ توں ن لیگ دا مضبوط قلعہ رہیا اے۔ ن لیگ نے جدوں وی مرکز وچ حکومت بنائی تے اوہ پنجاب دی ای مرہون منت سی۔ پنجاب جہدے نال کھڑا ہو جاندا اے‘ اسلام آباد وچ وی پنجے اوہدے مضبوط ہوندے نیں۔ موجودہ حالات وچ ن لیگ لئی پنجاب نوں واضح اکثریت نال فتح کرنا اک وڈا چیلنج ہووے گا۔ اک سال دی پی ڈی ایم حکومت وچ سب توں ودھ سیاسی قیمت مسلم لیگ ن نے ادا کیتی اے۔ معیشت بچان لئی جہڑے سخت فیصلے کیتے گئے اوس توں اک عام بندے اتے بوجھ پیا۔ عوام توقع کر رہے سن کہ ایہہ حکومت آندے ای اوہناں نوں وڈا ریلیف دیوے گی تے عمران دور دی مہنگائی‘ کرپشن تے بدانتظامی دامداوا کریگی لیکن زبوں حال معیشت نے شہباز حکومت نوں ایسا کجھ کرن نہیں دتا جو سرنگیں تحریک انصاف دے چار سالہ دور وچ وچھائی گئیاں سن۔ اوہ شہباز شریف تے ن لیگ دی توقع توں بہت زیادہ سن ایس لئی ن لیگ دے ووٹر نوں اوہ ریلیف نہیں مل سکیا جہدی اوہ توقع کیتے بیٹھیا سی۔
لیکن ایہہ وی اک ناقابل تردید حقیقت اے کہ پنجاب دے عوام دی اکثریت اج وی نواز شریف دے نال اے۔ تحریک انصاف تے عمران خان نے ن لیگ دے ووٹ بینک نوں متاثر کیتا اے لیکن پنجاب اج وی نواز شریف دے نال کھلوتا اے کیوں جے اوہناں دی جماعت نوں انتخابی سیاست اتے کافی عبور حاصل اے۔ پنجاب دے حلقیاں دی گل کریے تے ن لیگ دے کول اج وی تحریک انصاف دے مقابلے وچ بہترین امیدوار نیں۔
ن لیگ نوں عام انتخابات دے دنگل وچ اترن توں پہلاں اپنی بہترین ٹیم نوں میدان وچ لیانا ہووے گا۔ نواز شریف مسلم لیگ ن دے کپتان نیں تے شنید اے کہ اوہ ایس انتخابی مہم نوں خود لیڈ کرن گے مگر کیہڑے کھیڈاری نوں کتھے کھڈانا اے ایس حوالے نال انتہائی سوچ وچار کرنا ہووے گی۔ پنجاب دی سیاست اتے حمزہ شہباز دی کافی مضبوط گرفت اے۔ جنرل (ر) قمر جاوید باجوہ دی انتقامی مداخلت دے کارن مسلم لیگ ن 14 حلقیاں وچ ضمنی انتخاب ہار گئی سی۔ اوہناں دی چار مہینے دی پنجاب حکومت نوں مسلسل مداخلت کر کے نکام کیتا گیا جہدے مگروں حمزہ شہباز دا دلبرداشتہ ہونا فطری سی۔ میاں نواز شریف مگروں اج وی حمزہ شہباز پنجاب دے حلقیاں دی سیاست نوں بہت بہتر سمجھدے نیں۔ پنجاب دا کوئی حلقہ ایسا نہیں اے جتھے اوہناں نے 2008 توں 2018 دے دوران ترقیاتی منصوبیاں دا جال نہ وچھایا ہووے۔ الیکٹیبلز دے مزاج توں واقف نیں۔ ایس لئی پنجاب وچ اوہناں کولوں اوپننگ کرانا ن لیگ لئی بہت فیدہ مند ہووے گا۔ کیوں جے ایس واری مقابلہ بڑا سخت اے تے انج دے حالات وچ نویں نویں تجربیاں توں بہتر اے کہ آزمودہ کھیڈاریاں اتے ای بھروسہ کیتا جاوے۔ ذاتی پسند و ناپسند دے بجائے ایہہ ویکھنا ہووے گا کہ پارٹی دے مفاد وچ کیہ ضروری اے۔
ایس واری میاں نواز شریف‘ شہباز شریف‘ مریم نواز تے حمزہ شہباز شریف نوں رل کے پنجاب دے سیاسی دنگل وچ اترنا ہووے گا۔لیکن ایہہ وی اک ناقابل تردید حقیقت اے کہ پنجاب دے عوام دی اکثریت اج وی نواز شریف دے نال اے۔ تحریک انصاف تے عمران خان نے ن لیگ دے ووٹ بینک نوں متاثر کیتا اے لیکن پنجاب اج وی نواز شریف دے نال کھلوتا اے کیوں جے اوہناں دی جماعت نوں انتخابی سیاست اتے کافی عبور حاصل اے۔ پنجاب دے حلقیاں دی گل کریے تے ن لیگ دے کول اج وی تحریک انصاف دے مقابلے وچ بہترین امیدوار نیں۔
نواز شریف پنجاب دے عوام دی نبض خوب جاندے نیں۔ اوہناں دے فرنٹ اتے آ کے انتخابی مہم نوں لیڈ کرن نال مسلم لیگ نوں بڑا فیدہ ہووے گا کیوں جے نواز شریف اج وی پنجاب دے عوام وچ بہت مقبول نیں لیکن ایس واری اوہناں نوں اپنے ووٹر نوں مطمئن کرن لئی آئندہ پنج سال دا روڈ میپ دینا ہووے گا۔ پچھلے پنج سال دے دوران لوکاں دی مایوسی وچ بہت وادھا ہویا اے۔ کمر توڑ مہنگائی نے عوام دی اکثریت دا سکون کھو لیتا اے۔ووٹر نوں چارج کرن لئی ن لیگ نوں اک موثر منشور دینا ہووے گا۔
اک ایسا منشور جو واضح تے جامع ہووے۔ عوام دی اکثریت مسلم لیگ ن دے منشور توں قائل ہوگئی تے فیر مسلم لیگ ن دے وڈی تعداد وچ نکلن والے ووٹر نوں کوئی نہیں روک سکے گا تے جے پنجاب دے عوام نے ن لیگ دے حق وچ فیصلہ سنا دتا تے فیر وفاق سادہ اکثریت نال پنج سال لئی مسلم لیگ ن دے کول ہووے گا۔ لیکن ایس واری اعصاب دی جنگ اے جو بہتر حکمت عملی دا مظاہرہ کرے گا فتح اوہدا مقدر ہووے گی۔