مہنگائی رے مہنگائی ،عوام دی دہائی!

حکمران اتحاد دا پہلے آئی ایم ایف معاہدے اتے زور سی تے ہن
اوہناں دے احکامات تے عملدرآمد دا شور اے

لکھت:شاہد ندیم

حکمران اتحاد دا پہلے آئی ایم ایف معاہدے اتے زور سی تے ہن اوہناں دے احکامات تے عملدرآمد دا شور اے۔ وزیراعظم دا کہنا اے کہ آئی ایم ایف دی شرطاں پوری کرن لئی بجلی دے اک یونٹ تے مجبوراً 5روپے ودھائے جا رہے نیں جد کہ گیس دے نرخیاں وچ وادھا کرنا وی ضروری اے۔ساڈے حکمران ایس قدر ڈرپوک نیں کہ آئی ایم ایف دے احکامات اتے عمل کردیاں کہندے نیں کہ اوہدی سانوں وی لوڑاے۔
حکمران آئی ایم ایف دی آڑ وچ کدوں تک عوام اتے ای بوجھ ودھاندے رہن گے۔ حکومت نے کفایت شعاری دے جہڑے منصوبے بنائے سن۔ مقتدر طبقیاں دی مراعات ختم کرن دے جہڑے وعدے کیتے سن۔ ویلے دا تقاضا اے کہ اوہناں نوں پورا کر کے عوام نوں فاقہ کشی توں بچایا جاوے لیکن حکمران مہنگائی رے مہنگائی‘ عوام دی دہائی وی سنن لئی تیار نہیں نیں۔
ایس حقیقت دا اتحادی قیادت نوں ادراک ہونا چاہیدا اے کہ آئی ایم ایف دے نال نویں معاہدے تے دوجی اقتصادی مالیاتی پالیسیاں دے نتیجہ وچ عوام اتے جہڑے بے مہابا انداز وچ مہنگائی مسلط کیتی جا چکی اے۔ اوہدے ہوندے ہوئے عوام اوہناں جماعتاں لئی اپنے ووٹ دے ذریعے کلمہ خیر ادا کرن اتے ہر گز آمادہ نہیں ہون گے ۔وزیر خزانہ اسحاق ڈار نے تے پٹرولیم نرخیاں وچ 7توں 9روپے فی لٹر کمی دا اعلان کر کے اپنے تئیں بڑا تیر ماریا اے مگر بجلی تے گیس دے نرخیاں وچ جس شرح دے نال وادھا کر کے مہنگائی دے نویں جھکڑ چلان دا پربندھ کتیا جاندا اے۔ ایس توں عوام نوں پٹرولیم نرخیاں وچ کمی دی صورت وچ تھوڑا بہت ریلیف ملن دے ثمرات وی غارت ہوندے وکھائی دتے رہے نیں۔
ایہہ کنی عجیب گل اے کہ حکومت اک پاسے پیٹرولیم وچ ریلیف دے کے دوجے پاسے بجلی‘ گیس وچ رقم اینٹھ رہی اے۔ گیس پاکستان دی اپنی پیداوار تے ایس اپنی ای چیز دی قیمت ودھدی جا رہی اے۔ اوہنوں بین الاقوامی مارکیٹ دے ریٹ تے لیایا جارہیا اے۔ پاکستانی زمین د اقدرتی تحفہ پاکستان لئی اے۔ اوہنوں غیر ملکی اداریاںتوں تلاش کروا کے اوہانں دے مطابق ریٹ مقرر کرنا۔ پاکستانی عوام دے نال سراسر ناانصافی اے۔ جے انج ای کرنا اے تے آئل اینڈ گیس ڈویلپمنٹ کارپوریشن بند ای کر دینا چاہیدا اے۔ اک اندازے دے مطابق بجلی دے نرخیاں وچ وادھا توں عوام کولوں 500 ارب روپے اضافی وصول کیتے جان گے۔ بجلی پہلے ای کون سی سستی تے دستیاب اے۔ اوہدے باوجود لوکاں کولوں بھاری بل وصول کیتے جا رہے نیں۔ کوئی پچھن والا ہے نہ ای عوام دے مسئلیاں دا تدارک کرن والا کوئی وکھائی دیندا اے۔ ایتھے سب ای عوامی مسئلیاں نوں بھل بھلا کے اقتدار دی بندربانٹ وچ لگے ہوئے نیں۔
حکمران اتحاد عوام نوں ریلیف دین دے دعوویاں دے نال اقتدار وچ آئے سن لیکن اپنے ڈیڑھ سالہ دور اقتدار وچ عوام نوں ریکارڈ مہنگائی دین دے علاوہ کجھ وی نہیں دتے پائے نیں اوہدے باوجود وزیراعظم بار بار کہہ رہے نیں کہ عوام نے دوبارہ منتخب کرایا تے آئی ایم ایف دے نال رل کے ملک نوں ترقی دین گے۔ ایہہ کیسی ترقی ہووے گی کہ جہدے وچ عوام ای پسدے چلے جان گے تے حکمران طبقہ پرتعیش زندگی گزارن گے۔ حکمراناں دی ذاتی زندگی تے عوام نے کدی اعتراض کیتا ای نہیں اے لیکن سرکاری خرچ تے جو عیش کیتے جا رہے نیں۔ ایہدے تے بوہتا اعتراض اے۔ جے حکمران اپنی مراعات تے عیاشیاں بند کر دین تے عوام اتے بہت سارے شعبیاں وچ ٹیکس لان دی لوڑ ای نہ پووے لیکن حکمران مراعات چھڈن لئی تیار نیں نہ ای اپنی عیاشیاں وچ کوئی کمی لا رہے نیں۔ ایہدے باوجود عوام دی ای رٹ لاندے نیں۔ ایہہ کیویں حکمران نیں کہ اوہناں نوں عوام دی فکر اے نہ ای عوام دا احساس اے اوہدے باوجود کیسے توقع رکھدے نیں کہ عوام آزمائے ہوئے ای دے حق وچ فیصلہ دین گے۔
عوام سب کجھ جاندے نیں مگر اجے تک کجھ کر نہیں پا رہے نیں۔ عوام منتظر نیں کہ کدوں اوہناں نوں حساب تے احتساب کرن دا موقع دتا جاندا اے۔ اہل سیاست وی آگاہ نیں۔اوہ جاندے نیں کہ صبر لبریز ہو چکیا اے۔ ایس لئی چور سپاہی دے کھیڈ وچ ای اپنا ویلا لنگھا کے جان دا ارادہ رکھدے نیں۔ حکمران اتحاد نے جس برق رفتاری دا مظاہرہ کردیاں اپنے مخالفاں نوں رستے ہٹایا تے خود نوں سارے مقدمات توں بچایا اے۔ ایہدے کارن ای حکومت اپنا کم ٹھیک طرح سرانجام دے پائی نہ ای پوزیشن کدی اپنا اصل رنگ روپ وکھا پائی اے۔
ا یس لئی ہمیشہ توں ای سب دی حیثیت پانی دے بلبلے جئی رہی اے تے شاید آئندہ وی ایسے ای رہوے گی کیوں جے فیصلے عوام دی عدالت وچ نہیں۔ کدھرے ہور ای ہوندے نیں جد کہ بچارے عوام دی قسمت وچ تے بحران‘ مہنگائی تے مسائل دی دلدل وچ پئے رہنا ای لکھ دتا گیا اے۔ مہنگائی رے مہنگائی دی دہائی کوئی سنن والا ہے نہ ای کوئی تدارک کرن والا‘ ایتھے سارے ای اپنے مفادات وچ عوام نوں قربان کرن لئی تیار بیٹھے نیں۔