ہن خش خبریاں توں ڈر لگدا اے

شکیل امجد صادق

پروفیسر جے۔پی چوہدری ماہر سیاسیات و سماجیات نیں۔ آپ دی حالیہ فکر تے کاز اوہ کجھ ایس طرح اے کہ اے دانشوران شرق و غرب! اکیہویں صدی عیسوی تے پندرھویں صدی ہجری حقیقی گلوبلزم دے قیام دی صدی اے۔ اکیہویں صدی عیسوی تے پندرھویں صدی ہجری وچ 193 دی 193 قومی‘ علاقائی تے جغرافیائی ریاستاں دی معدومیت تے انٹرنیشنلزم دے خاتمے تے انہدام دی صدی اے۔ اکیہویں صدی عیسوی تے پندرھویں صدی ہجری پورے دے پورے کرہ ارض دی تے سارے دے سارے ابن آدم دی کامل آزادیاں تے کامل نجات دی صدی اے۔ اکیہویں صدی عیسوی تے 15 ویں صدی ہجری ابن آدم دی بارڈر لیس ہم آہنگی‘ میل جول‘ میل ملاپ‘ رابطیاں‘ رشتے داریاں تے بھائی چارے دی صدی اے۔ اکیہویں صدی عیسوی تے 15ویں صدی ہجری ہر طرح دے استحصال‘ ہر طرح دے سود تے ہر طرح دی لٹ مار توں پاک صرف بارڈر لیس‘ لاطبقاتی عالمی‘ جمہوری ریاست دے قیام تے اک ہور صرف اک بارڈر لیس‘ لاطبقاتی‘ عالمی‘ جمہوری تے جنتی سماج دے قیام دی صدی اے۔ جہڑے لوک بھٹو نوں اک عظیم جمہوری لیڈر تے پی پی پی نوں وڈی جمہوریت پسند سیاسی جماعت سمجھدے نیں اوہ بھٹو صاحب دے آمریت پسندی تے آمراں دے نال رَل کے جمہوریت تے شب خون مارن دی ماضی دی اک بازگشت سماعت فرما لین تے جہڑے لوک پی پی پی دی جمہوریت کش پالیسیاں تے حیران نیں کہ بھٹو ورگے انقلابی دی جماعت کیویں جمہوریت پسندی چھڈ کے اسٹیبلشمنٹ دی جھولی وچ بیٹھی اے تے اوہ ایہ جان لین کہ پی پی پی دے بانی چیئرمین بھٹو وی ایسے خصلت دے مالک سن ذوالفقارعلی بھٹو دا میجر جنرل سکندر مرزا نوں خط کجھ ایس طرح اے۔
میجر جنرل سکندر مرز ا جدوں پاکستان دا صدر سی۔ ذوالفقارعلی بھٹو نے اوہدے ناں اک خط لکھیا سی۔ ذوالفقارعلی بھٹو نے سکندر مرزا نوں مخاطب کردے ہوئے لکھیا سی کہ :جناب تاریخ تہانوں اک عظیم بندے دے طور تے یاد رکھے گی تے تہاڈا ناں قائداعظم محمدعلی جناح توں وی اُتے لکھیا جاوے گا۔
ذوالفقارعلی بھٹو نے صرف اک وزارت لئی سکندر مرزا ورگے بندے نال قائداعظم دا موازنہ کیتا تے فیر اوہنوں قائداعظم توں وی اُچے مقام تے فائز کیتا۔ ذوالفقارعلی بھٹو نوں سیاست وچ پاکستان دے آمر صدر میجر جنرل سکندر مرزا نے متعارف کرایا جد کہ ذوالفقارعلی بھٹو دی سیاسی پرورش پاکستان دے آمر فوجی حکمران جنرل ایوب خان نے کیتی۔ ذوالفقارعلی بھٹو نے ایوب خان دے 1958ء وچ مارشل لاء دی حمایت کیتی سی تے جنرل ایوب خان دی فوجی حکومت وچ وفاقی وزیر بن گیا سی سگوں ایوب خان دی قربت حاصل کرن لئی ایوب خان نوں ڈیڈی کہندا سی۔ ایہ بھٹو دی کامیابی دا راز سی‘ ہن ن لیگ ول آنے آں۔
جیویں میں بار بار کہنا واں ن لیگ کوئی سیاسی جماعت نہیں سگوں نواز نوں بینظیر دے مقابل اسٹیبلشمنٹ نے پنجاب چوں زبردستی پیدا کیتا جہدی ٹریننگ جنرل ضیاء الحق نے کیتی۔ ن دا مائنڈ سیٹ مکمل آقا و غلام والا اے۔ کدھرے ایہ کسے دے غلام نیں تے کدھرے ایہ آپ کسے تے آقا بنن دی کوشش کردے نیں۔ کسے سیاسی لیڈر دا اک مشہور مقولہ اے میاں نواز شریف لئی کہ جدوں ایہ اقتدار وچ ہوندا اے تے گریبان پھڑدا اے تے جدوں اقتدار وچ نہیں ہوندا تے سر جھکا کے اپنا کم کڈھ لیندا اے۔
ایتھے مثال دینا واں کہ جدوں تک ضیا وِکدا رہیا نوازشریف وی ضیاء الحق نوں اپنا بزرگ بولدا رہیا تے جدوں ضیاء الحق دا دور ختم ہون لگا تے نوازشریف جمہوری بن گیا۔ ایہ ن لیگ ای سی جنہے محترمہ شہید دے خلاف آئی جے آئی بنائی۔ کل تک ایہ ووٹ نوں عزت دین دی گل کردے سن تے اج ریاست وچ ریاست بنان والیاں دے غیرآئینی اقدامات دی تعریف و تائید وچ لگے ہوئے نیں۔ موجودہ سیاسی صورتحال وچ ملک و قوم دا کسے نوں خیال نہیں۔ سارے لوک اپنے مفادات تے اختیارات دی جنگ لڑ رہے نیں۔ جہدے وچ ملک تے قوم مفلوج ہو چکے نیں جے موجودہ صدی وچ اسیں درج بالا فکر نوں اپنے واسطے سچ کرنا اے تے فیر غلامی چوں نکل کے آزادی‘ کرپشن چوں نکل کے ایمانداری تے غیرذمہ داری چوں نکل کے ذمہ داری ول آنا ہووے گا جے ہن انج نہ ہو سکیا تے فیر داستاناں وچ کیہ تریخ وچ وی ملیامیٹ ہو جاواں گے۔٭