سنچری توں محروم بدقسمت بلے باز

ایس حقیقت نوں تسلیم کرنا ضروری اے کہ قسمت دے کھیڈ نرالے ہوندے نیں

کشور یاسمین

جدوں اک بلے باز 99سکورتے آئوٹ ہو جاوے تے اوہدی مایوسی دیدنی ہوندی اے۔ اوہ اپنی غلطی نال آئوٹ ہووے یا فیر اوہدی قسمت اوہدا ساتھ نہ دیوے‘ ایہہ اک وکھرا معاملہ اے۔ 99تے آئوٹ ہونا بہرحال دکھ دی گل اے تے جے اک بلے باز199تے اپنی وکٹ گوا بیٹھے تے ایہدے دکھ وچ بہت زیادہ وادھا ہو جاندا اے۔ایہدی وجہ ایہہ اے کہ ڈبل سنچری کرن دا موقع کسی وی بلے باز نوں شاذ ای ملدا اے لیکن ایہہ کرکٹ اے تے ایہدے وچ کجھ وی ہو سکدا اے۔ تریخ وچ دو بلے باز ایسے وی گزرے نیں جہڑے ٹرپل سنچری توں محروم رہ گئے۔ اک ڈان بریڈمین تے دوجے مارٹن کرو۔ ڈان بریڈمین دی بدقسمتی رہی کہ جدوں اوہ 299 رنز تے پہنچے تے اوہناں دے نال کھیڈاری جہڑا نمبر11اتے بلے بازی کر رہیا سی آئوٹ ہو گیا۔ یعنی اوہ آپ آئوٹ نہیں ہوئے بلکہ نمبر11دے کھیڈاری دے آئوٹ تے ٹرپل سنچری توں محروم رہ گئے۔ نیوزی لینڈ دے مارٹن کرو جدوں 299 سکور تے آئوٹ ہوئے تے اوہناں نوں بہت صدمہ ہویا۔ ٹیسٹ اننگز وچ 299سکور تے آئوٹ ہون والے اوہ واحد بلے باز سن۔
ایہہ واقعہ 4فروری 1999نوں ولنگٹن وچ سری لنکا دے خلاف میچ کھیڈدے ہوئے پیش آیا۔ بائولر سن ارجنا رانا ٹنگا۔ ایس باری مارٹن کرو دا آکھنا سی کہ جدوں اوہ 299سکور تے کھیڈ رہے سن تے اوہناں دے ذہن وچ بار بار اک ای گل آ رہی سی کہ اوہ نیوزی لینڈ دے پہلے بلے باز ہون گے جہڑے ٹیسٹ دی اک اننگز وچ ٹرپل سنچری بنان دا اعزاز حاصل کرے گا۔ خوشی تے تجسس دے ایس امتزاج دی وجہ نال مارٹن کرو اپنا ذہنی توازن برقرار نہ رکھ سکے تے رانا ٹنگا دی بائولنگ تے آئوٹ ہو گئے۔ ایہدا ناں ای کرکٹ اے۔ ایہدے وچ بلے بازاں دے علاوہ بائولراں نوں وی صدمے چکنے پیندے نیں۔ کئی واری جہڑے فیلڈرز اہم ترین کیچ پھڑن وچ نکام ہو جاندے نیں تے اوہ وی دکھ دے سمندر وچ ڈب جاندے نیں کیوں جے بسا اوقات اک اہم کیچ سٹن نال ٹیم پورا میچ ہار جاندی اے۔
ایس مضمون وچ اسیں اوہناں بلے بازاں دا ذکر کر رہے آں جہڑے کسی اک ٹکسٹ اننگز وچ 199سکور تے آئوٹ ہوئے تے انج ڈبل سنچری توں محروم ہو گئے۔
1۔دثر نذر(پاکستان)
پاکستان دے پچھلے اوپنر مدثر نذر 1984 وچ بھارت دے خلاف فیصل آباد ٹیسٹ کھیڈدے ہوئے 199سکور تے پویلین لوٹ گئے۔ فیصل آباد وچ کھیڈیا جان والا پاکستان تے بھارت دا ایہہ دوجا ٹیسٹ میچ سی۔ بھارتی ٹیم نے پہلی اننگز وچ 500 سکور بنائے۔ پاکستان نے وی خوب بلے بازی کیتی۔ قاسم عمر دے نال مدثر نذر نے 250 سکور دی شراکت داری کیتی تے فیر قسمت نے مدثر نذر دا ساتھ چھڈدتا۔ اوہ 199سکور تے بھارتی بائولر شیولال یادو دی گیند تے وکٹ کیپر سید کرمانی دے ہتھ کیچ آئوٹ ہو گئے۔
2- محمد اظہرالدین (بھارت)
1986 وچ سری لنکا دے خلاف محمد اظہرالدین 199سکور تے آئوٹ ہو گئے۔ اوہناں نے 505 گینداں اتے 16 چوکے تے اک چھکا لایا۔ جدوں اوہ 199سکور تے پہنچے تے ایل بی ڈبلیو ہو گئے۔ محمد اظہرالدین دی دوجی بدقسمتی ایہہ رہی کہ اوہ فیر دوبارہ ڈبل سنچری نہیں کرسکے تے اوہناں دا اک اننگز وچ ودھ توں ودھ ٹیسٹ سکور 199سکور رہیا۔
3- میتھیوایلیٹ (آسٹریلیا)
1997 وچ آسٹریلیا نے لیڈ ٹیسٹ وچ انگلینڈ دے خلاف شاندار فتح حاصل کیتی۔ لیکن ہویا انج کہ آسٹریلوی اوپنر میتھیو ایلیٹ 199 سکور تے اپنی وکٹ گوا بیٹھے۔ اوہناں نے انگلینڈ دے تیز بائولر ڈیرن گف نے آئوٹ کر دتا تے اوہ مایوسی دی تصویر بنے واپس پویلین لوٹ گئے۔ ایس میچ وچ آسٹریلوی بلے باز رکی پونٹنگ نے وی سنچری کیتی۔
4- سنت جے سوریا (سری لنکا)
سال سی 1997 جدوں بھارت تے سری لنکا دی ٹیسٹ سیریز جاری سی۔ سچن ٹنڈولکر تے سارو گنگولی دے زبردست کھیڈ دی وجہ نال بھارت نوں سری لنکا اتے برتری حاصل سی لیکن فیر جے سوریا آئے تے اوہناں نے کھیڈ دا پانسہ پلٹ دتا۔ پہلی اننگز وچ جے سوریا نے 32سکور بنائے لیکن دوجی اننگز وچ اوہناں دے بلے نے سکور دے ڈھیر لا دتے۔ 199سکور دے انفرادی سکور تے اوہ بھارتی بائولر ابے کوری ملا دے ہتھوں آئوٹ ہو گئے۔سنت جے سوریا دی ایس یادگار اننگز پاروں سری لنکا ایہہ میچ ڈرا کرن وچ کامیاب ہو گیا۔
5- سٹیووا (آسٹریلیا)
آسٹریلیا دے پچھلے کرکٹ کپتان سٹیووا دا شمار کرکٹ دی تریخ دے عظیم بلے بازاں وچ ہوندا اے۔ اوہناں دے جڑواں بھراں مارک وا وی بڑے چنگے بلے باز سن۔ سٹیووا نے کئی یادگار ٹیسٹ اننگز کھیڈیاں۔ قسمت دی دیوی ہمیشہ اوہناں اتے مہربان رہی لیکن ویسٹ انڈیز دے خلاف اک میچ وچ اوہ 199سکور تے آئوٹ ہو گئے۔ ظاہر اے اوہناں لئی ایہ بڑے دکھ دی گل سی لیکن اوہناں نے ایس غم نوں چھیتی ای بھلا دتا تے استقامت نال کم لیتا۔ ایہہ ٹیسٹ میچ 1999وچ کھیڈیا گیا جہنوں ویسٹ انڈیز نے اک وکٹ نال جت لیتا۔ سٹیووا 509 منٹ تک کریز اتے جمے رہے لیکن فیر ویسٹ انڈیز دے بائولر بنیمیا پیری نے اوہناں نوں ایل بی ڈبلیو کر دتا۔ اوہ آسٹریلیا دے دوجے بلے باز سن جہڑے اک ٹیسٹ اننگز وچ 199سکور بنا کے آئوٹ ہوئے۔
6- یونس خان (پاکستان)
مدثر نذر مگروں یونس خان پاکستان دے دوجے کھیڈاری نیں جہڑے 199سکور بنا کے آئوٹ ہوئے۔ 2006 وچ جدوں بھارت دی ٹیم پاکستان دے دورے تے سی تے لہور ٹیسٹ وچ یونس خان دلکش کھیڈ دا مظاہرہ کررہے سن۔ اوہ 199سکور تے اوس ویلے اپنی وکٹ گوا بیٹھے جدوں بھارتی بائولر ہرھجن سنگھ نے اوہناں نوں رن آئوٹ کیتا۔ انج لگدا اے کہ یونس خان شاید نروس ہو گئے سن کیوں جے جہڑی گیند تے اوہ رن آئوٹ ہوئے اوہدے تے سکور بندا ای نہیں سی۔ جے اوہ تھوڑے صبر دا مظاہرہ کردے تے بڑی آسانی نال ڈبل سنچری بنان وچ کامیاب ہو سکدے سن لیکن جو ہونا سی سو ہو گیا۔ ویسے تے یونس خان نے بہت ساری ڈبل سنچریاں تے ٹرپل سنچریاں وی بنائیاں نیں لیکن جے ایہہ ڈبل سنچری وی بن جاندی تے اوہناں دا ریکارڈ ہور شاندار ہو جاندا۔
7- ایان بیل (انگلینڈ)
انگلینڈ دے دلکش بلے باز ایان بیل وج اک واری 199سکور تے آئوٹ ہو گئے۔ ایہہ اوہناں دے عروج دا دور سی۔ ایان بیل اوہ بلے باز سن جنہاں نے انگلینڈ ولوں کئی شاندار اننگز کھیڈیاں۔ بدقسمتی نال جنوبی افریقہ دے خلاف اک ٹیسٹ میچ وچ اوہ سپنر پال ہیرس دی بائولنگ تے اوہناں ای دے ہتھیں کیچ آئوٹ ہو گئے۔ایان بیل بہت افسردہ ہوئے تے اوہدے وچ حیرانی دی کوئی گل نہیں سی۔ ایہہ ٹیسٹ میچ 2008وچ کھیڈیا گیا سی۔ مگروں ایان بیل نے ایہہ آکھیا سی کہ اوہناں نے تھوڑی جئی غیر زمہ واری دا مظاہرہ کیتا سی تے گیند نوں میرٹ اتے نہیں کھیڈیا۔
8- سٹیوسمتھ (آسٹریلیا)
2015 وچ ویسٹ انڈیز دے خلاف کھیڈدے ہوئے اک ٹیسٹ میچ وچ سٹیو سمتھ 199سکور تے آئوٹ ہو گئے۔اوہ مایوسی دی تصویر بن گئے۔ اوہ بڑے شاندار کھیڈ دا مظاہرہ کر رہے سن۔ ایہہ اوہ ویلا سی کہ سٹیو سمتھ سپر بیٹسمین دی ساری خوبیاں دا مظاہرہ کر رہے سن۔ آسٹریلوی ٹیم ویسٹ انڈیز دے دورے تے سی۔ دوجے ٹیسٹ دی پہلی اننگز وچ اوہ کمال دی بلے بازی کر رہے سن۔ جدوں جیمز ٹیلر نے سٹیو سمتھ نوں ایل بی ڈبلیو کر دتا۔ ایس گل دا تذکرہ ضروری اے کہ جیمز ٹیلر نے ایس اننگز وچ چھیڈ کھیڈاریاں نوں آئوٹ کیتاسی۔ اوہناں ساریاں دے باوجود آسٹریلیا نے ایس ٹیسٹ وچ فتح حاصل کیتی تے سٹیو سمتھ نوں مین آف دی میچ قرار دتا گیا۔
9- کے ایل راہول (بھارت)
2016 وچ چنائی وچ بھارت تے انگلینڈ وچ ٹیسٹ میچ کھیڈیا جا رہیا سی۔ ایہہ ٹیسٹ میچ ایس لئی شہرت داحامل اے کہ ایہدے وچ کیرون فائر دوجے بھارتی بلے باز بن گئے جنہاں نے ٹرپل سنچری بنان دا اعزاز حاصل کیتا۔ کے ایل راہول نے بھارتی ٹیم ولوں اوپننگ دا آغاز کیتا سی۔ اوہناں نے 199سکور بنائے سن جدوں اوہ عادل رشید دی گیند تے جوس بٹلر دے ہتھوں کیچ آئوٹ ہو گئے۔ ایہہ اک عام جئی گیند سی تے کے ایل راہول نے اوہنوں بہت آسان لے لیتا۔ اصل وچ اوہ ڈبل سنچری کرن لئی بہت چھیتی وچ سن۔ بہرحال اوہناں نوں مگروں اپنی غلطی دا احساس ہویا لیکن موقع نکل چکیا سی۔ کے ایل راہول نے مگروں میڈیا نال گل کردے ہوئے آکھیا کہ اوہ ہر گز نروس نہیں سن۔ میں اپنی پوری اننگز وچ نروس نہیں ہویا۔میں بڑی مستقل مزاجی نال کھیڈ رہیا سی جدوں میں پہلی سنچری کیتی تے اوسے ویلے میں عزم کر لیتا سی کہ ہن میں ڈبل سنچری کراں گا۔ 190سکور کرن مگروں وی میں نروس نہیں ہویا لیکن 199سکور تے ایسی غلطی کر بیٹھیا جہدا خود میں تصور نہیں کیتا سی۔ اک کمزور گیند اتے شاٹ کھیڈی تے میں آئوٹ ہو گیا۔ بہرحال اوہدے مگروں میں ایہہ سبق سکھیا کہ ایسے موقع تے ذرا جئی وی غیر سنجیدگی دا مظاہرہ نہیں کرنا چاہیدا۔ ایس غلطی نے مینوں بہت کجھ سکھایا اے۔
10- ڈین ایلگر (جنوبی افریقہ)
جنوبی افریقہ دے موجودہ کپتان ڈین ایلگر اپنی ٹیم ولوں اوہ واحد بلے باز بن گئے جہڑے کسی وی ٹیسٹ میچ وچ 199سکور تے آئوٹ ہوئے۔ 2017 وچ بنگلہ دیش کرکٹ ٹیم جنوبی افریقہ دے دورے تے سی۔ سیریز دے پہلے ٹیسٹ وچ ایلگر 199سکور تے اپنی وکٹ گوا بیٹھے۔ ایہہ اوہناں لئی بہت افسوسناک مرحلہ سی۔ بنگلہ دیش دے بائولر مستفیض الرحمان نے ایلگر نوں آئوٹ کیتا۔ اوہناں نے آئوٹ ہون مگروں باقی بلے بازاں وانگوں افسوس دا اظہار کیتا لیکن نال ای ایہہ وی آکھیا کہ کرکٹ وچ انج ہوند ااے۔
11- فاف ڈوپلیسی (جنوبی افریقہ)
ایہناں دا تعلق وی جنوبی افریقہ نال سی۔ 2020وچ سری لنکن ٹیم جنوبی افریقہ دے دورے تے سی۔ پہلے ٹیسٹ دی پہلی اننگز وچ سری لنکا نے 396 سکور بنائے۔ جنوبی افریقہ دی ٹیم برتری حاصل کرنا چاہندی سی تے اوہ تھوڑے جئے دبائو وچ وی سی۔ بہرحال جنوبی افریقہ نے 621سکور بنائے۔ ڈوپلیسی نے بڑی شاندار بلے بازی کیتی تے 621 سکور بنان وچ زبردست کردار ادا کیتا۔ اوہناں دی مستقل مزاجی نے جنوبی افریقہ دے دوجے بلے بازاں دا وی حوصلہ ودھایا تے اوہناں نے وی اپنی صلاحیتاں دا بھرواں مظاہرہ کیتا لیکن ہویا انج کہ ڈوپلیسی آپ 199سکور بنا کے آئوٹ ہو گئے۔اوہناں نوں کیہ بلکہ پوری تیم نوں بہت دکھ ہویا۔ ایہدی وجہ ایہہ سی کہ اوہناں دی شاندار بلے بازی پاروں ای باقی ٹیم نوں حوصلہ ملیا سی۔ میچ دے اختتام تے ڈوپلیسی نے زیادہ دکھ دا اظہار نہیں کیتا۔ا لبتہ اینا ضرور آکھیا کہ میری ڈبل سنچری توں ودھ ٹیم دی پوزیشن مستحکم کرنا ضروری سی۔ اسیں ذرا دبائو وچ ساں لیکن فیر اسیں ایس دبائو توں نکل آئے۔