ایہہ کیہ ہورہا ہے ؟

قرض لین ویلے حکومت نے عالمی مالیاتی ادارے دی جہڑی شرطاںتسلیم کیتیاں اوہناں وچوں اک بجلی دے مل وچ وادھا تے گردشی قرضہ گھٹ کرنا اے جہنوں مدنظر رکھدیاں کابینہ دی منظوری نال بجلی دی قیمت وچ 7روپے 50پیسے فی یونٹ وادھا کردتا گیا اے۔

حمیداللہ بھٹی

قرض لین ویلے حکومت نے عالمی مالیاتی ادارے دی جہڑی شرطاںتسلیم کیتیاں اوہناں وچوں اک بجلی دے مل وچ وادھا تے گردشی قرضہ گھٹ کرنا اے جہنوں مدنظر رکھدیاں کابینہ دی منظوری نال بجلی دی قیمت وچ 7روپے 50پیسے فی یونٹ وادھا کردتا گیا اے۔ ایس اک فیصلے توں بجلی صارفین اتے 3ہزار 495 ارب دا اضافی بوجھ پووے گا۔ ایہہ فیصلہ عام بندے نوں تے متاثر کرے گا ای۔
صنعت و زراعت وی ایہدے تباہ کن اثرات توں محفوظ نہیں رہوے گی کیوں جے لاگت وچ بے تحاشا وادھا ہو جاوے گا جہدے توں مہنگائی دا جنم لین والا طوفان غریب دی کمر توڑ کے رکھ دیوے گا۔
حکومت دے حالیہ فیصلیاں توں ملک دے معاشی حالت بہتر ہووے گی یا نہیں۔ ایس بارے وثوق نال کجھ کہنا اوکھا اے البتہ عام بندے دی زندگی اجیرن ہون وچ کوئی شائبہ نہیں حکومت دے حالیہ فیصلیاں نوں عوام دشمن کہہ سکدے نیں۔ کجھ عرصے توں ہر حکومت دی اولین کوشش ہوندی اے کہ کسی طرحاں عوام دی جیب توں پیسے کڈوائے جان بجلی دے بلاں وچ ٹی وی‘ ریڈیو ٹیکس ایسی ای کوششاں دا حصہ نیں۔ حالانکہ مسجداں دے بلاں وچ ٹی وی فیس شامل کرن دا کوئی جواز نہیں بندا کیوں جے اوتھے ایسی کرافات دا کوئی امکان ای نہیں ہن تے ریڈیو فیس وی عائد ہوگئی اے۔جدوں پاکستانی ذرائع ابلاغ وچ ریڈیو دا کوئی حصہ نہیں تے سامعین دی تعداد نہ ہون دے برابر اے فیر وی حکومت بحالی چاہندی اے تے ہونا ایہہ چاہیدا اے کہ ریڈیو سامعین کولوں ای فیس وصول کیتی جاوے مگر بجلی دے بلاں دا حصہ بنا کے طاقت دے بل بوتے تے ایہہ وصولی بدمعاشی اے۔ ممکن اے ایس واری 14 اگست نوں لوک دل دل پاکستان گان دے بجائے بل بل پاکستان دی دہائیاں دین۔ ملک وچ ایسی اصلاحات دی لوڑ اے جہدے توں اداریاں دا خسارہ ختم ہووے ہر ادارے دی بحالی لئی عوام اتے ٹیکساں دا بوجھ ودھانا حل نہیں۔ عوام نوں ایہہ وی خدشہ اے کہ تقسیم ہند ویلے مسلماناں نوں پاکستان لیان لئی استعمال ہون والی ٹرین دے اخراجات وی کدھرے موجودہ حکومت ای نہ وصول کرنا شروع کر دیوے ۔
جے حکومت معاشی بحالی وچ سنجیدہ اے تے اوہنوں غیر ضروری اخراجات اتے قابو پانا ہووے گا مگر ایسا کجھ نہیں ہو رہیا۔ ایس ویلے جدوں دیوالیہ ہون دے خطریاں دا سامنا اے۔ ملکی تریخ دی بھاری بھرکم 85 رکنی کابینہ موجود اے جہناں وچوں اکثر دا عوامی مسائل حل کرن وچ کوئی کردار نہیں بلکہ زیادہ تر مراعات وصول کرن یا فیر غیر ملکی دوریاں وچ مصروف رہندے نیں۔ گڈیاں‘ پیٹرول‘ علاج معالجے تے مفت رہائش فراہم کرن تے ارباں روپے صرف کیتا جا رہیا اے۔ پچھلے ڈیڑھ سال توںخصوصی طیارہ استعمال کرن دا رجحان جنم لے چکیا اے۔ عوامی حلقیاں دا مطالبہ اے کہ معاشی بحالی لئی عوام دا خون نچوڑن دی بجائے اشرافیہ دی مراعات گھٹ کیتی جان مگر حکومت شاید سیاسی مجبوریاں دی وجہ نال ایسا کرن توں قاصر نیں۔ اقوام متحدہ دے پروگرام یو این ڈی پی‘ این ایچ آر دے مطابق ملک دی جی ڈی پی دا چھ فیصد اشرافیہ نوں دتی جان والی مراعات اتے خرچ ہو جاندا اے۔ا یہہ رقم ساڈے سترہ ارب ڈالر بندی اے کیسی ستم ظریفی اے کہ کاروباری‘ جاگیردار تے ملک دا امیر ترین اک فیصد طبقہ سب توں ودھ مراعات یافتہ اے۔ پاکستان دے امیر ترین لوکاں دا 20فیصد ملک دی تقریباً ادھی آمدن دا مالک اے فیر وی اوہناں نوں ہر حکومت ٹیکس وچ چھوٹ دیندی اے تے عوام نوں آسان تے کمزور ہدف جان کے مختلف قسم دے ٹیکس لائے جاندے نین۔ ایسی ای غلط پالیسیاں دا نتیجہ اے کہ ملک دی ادھی آبادی غربت دا شکار اے۔ اسیں دشمن دے بالاں نوں پڑھان دی گلاں کردے پھردے نیں تے ساڈا دشمن چن اتے پہنچ چکیا اے جد کی اسیں اج وی آئی ایم ایف کولوں قرض ملن تے خوشیاں منا رہے نیں۔بہتر ایہہ اے کہ طرزعمل اتے غور کیتا جاوے تے غلطیاں دور کرن دا طریقہ کار بنا کے صدق دل توں عمل وی کرن۔ جس قومی اسمبلی وچ قنون پاس کرن لئی بارہ بندے حاضر ہون تے مزے دی گل ایہہ کہ کوئی وی کورم دی نشاندہی نہ کرے بلکہ بل پاس ہو جاوے تے غیر حاضر ممبران ماراعات وصول کر لین اوس حکومت نوں عوامی تے فلاحی نہیں کہہ سکدے۔
کجھ مہینے پہلاں وفاقی حکومت نے اخراجات لئی مطلوبہ رقماں نہ ہون دا جواز پیش کردے ہوئے پنجاب وچ انتخابات کران توں انکار کردتا سی لیکن ہن پنجاب دی نگران حکومت نے بیورو کریسی نوں سوا دو ارب روپے دی نویں تے مہنگی گڈیاں خرید کے دین دا پروگرام بنایا اے تے کابینہ توں منظوری لے کے گڈیاں دی خرید وی شروع کردتی اے۔ وفاقی حکومت دے اعلان دے مطابق ایہو پنجاب حکومت صوبائی سرکاری ملازماں دی تنخواہ تے پینشن وچ وادھا کرن توں ایہہ کہہ کے انکاری سی کہ صوبے دے کول وسائل نہیں جہدے تے سرکاری ملازماں نے دھرنا دے کے اپنے مطالبے منوائے ہن جد کہ بیوروکریسی ولوں نویں گڈیاں دا کوئی مطالبہ وی نہیں کیتا گیا۔ پنجاب حکومت نے فیاضی دا مظاہرہ کردے ہوئے نوازشاں دی حد کردتی اے۔ ایہہ منصوبہ کسی طور عوامی مفاد وچ نہیں بلکہ عام انتخابات توں پہلاں انتظامیہ نوں خوش کرنا تے انتخابی عمل دے دوران ہمدردیاں حاصل کرن دے سلسلے دی کڑی لگدا اے۔ اک پاسے تے ساڈا ملک آئی ایم ایف کولوں ملن والے قرضیاں اتے زندہ اے لیکن حکومتی شاہ خرچیاں ویکھ کے معاشی بدحالی دی گلاں جھوٹ لگدیاں نیں۔ ایسے حالات وچ جدوں ٹیکس عائد کرن وچ ملک نوں نکامی دا سامنا اے۔ غیر ضروری تے مراعات اتے ہون والے اخراجات دا جی ڈی پی دا 25 فیصد ہو جانا خطرے دا الارم اے۔ سوچن والی گل ایہہ اے کہ حکومت دے کول عوام نوں ریلیف دین لئی کجھ نہیں مگر قرض لے کے ضائع کر دینا سمجھ توں بالاتر اے۔ عوامی سوال ایہہ اے کہ بجلی دے نرخ ودھانا جے آئی ایم ایف دی شرطاں دا حصہ اے تے کیہ ارباں دی نویں گڈیاں خریدنا عالمی مالیاتی ادارے دی ہدایات دا حصہ اے؟
ملک وچ ہو کیہ ہو رہیا اے عوام ویکھ ویکھ کے حیران تے پریشان نیں۔ ایسے حیرانی تے پریشانی دی وجہ نال جہڑے بچے گھراں وچ جھنڈیاں لا کے 14 اگست مناندے سن۔ اوہ ہن جوان ہو کے ملک چھڈن تے دیار غیر وچ روزگار تلاش کرن تے مجبور نیں مگر خراب ترین صورتحال دا سیاسی اشرافیہ نوں ادراک ای نہیں اوہ اج وی کہہ رہے نیں کہ چوتھی واری اقتدار ملیا تے ملک دی تقدیر سنوار دیو گے۔ شاید پہلے اوہناں کولوں بھل ہو گئی سی تے اوہ ملک دے بجائے علطی نال اپنے بالاں دی تقدیر سنوارن وچ لگے رہے۔بیرون ملک رہن والے ووٹ دے حقدار نہیں تے ایہہ پوچھنا تے بندا اے کہ بیرون ملک جائیداداں بنان والے ایتھے الیکشن لڑن دے کیونکر اہل نیں؟ علاوہ ازیں ملک وچ سب توں ودھ شوگر ملزمالکان دا تعلق استحکام پارٹی توں اے جہدا دعویٰ اے کہ اقتدار وچ آ کے 300یونٹ بجلی فری تے مہنگائی گھٹ کر دیاں گے حالانکہ ایہہ چاہن تے ہن وی چینی دی قیمت ادھی کرن تے قادر نیں جو عوام لئی کسی وڈے ریلیف توں گھٹ نہیں ہووے گا مگر لگدا اے ایتھے سب اقتدار وچ آ کے ای کجھ کرنا چاہندے نیں جے اقتدار نہیں تے ایہہ وی صرف وعدے ای کراں گے۔