نگران وزیر اعلیٰ محسن نقوی نے سرکاری ہسپتال دا آپریشن کردتا

2 دن پہلاں سوشل میڈیا اتے اک ویڈیو وائرل ہوئی جہدے وچ وکھایا گیا کہ لہور دے سرکاری ہسپتال دے اپریشن تھیٹر وچ اک مریض زندگی تے موت دی جنگ لڑ رہیا سی کہ اچانک ہسپتال دی بجلی چلی گئی

ڈاکٹر جمشید

دو دن پہلاں سوشل میڈیا اتے اک ویڈیو وائرل ہوئی جہدے وچ وکھایا گیا کہ لہور دے سرکاری ہسپتال دے اپریشن تھیٹر وچ اک مریض زندگی تے موت دی جنگ لڑ رہیا سی کہ اچانک ہسپتال دی بجلی چلی گئی۔ ہسپتال وچ جنریٹر تے موجود سی لیکن اوہدے وچ پیٹرول نہیں سی۔ اپریشن تھیٹر وچ موجود ڈاکٹر مریض نوں انج چھڈ نہیں سکدے سن۔ اوہناں نے مسیحائی دا بھرم رکھدیاں ذمہ داری دا مظاہرہ کیتا تے مریض دا اپریشن کسی نہ کسی طرحاں جاری رکھیا۔ زندگی دا بجھدا دیوا بالے رکھن لئی مسیحاواں نے اپنے موبائل دی لائٹاں آن کر لیاں تے اپریشن جاری رکھیا۔ ایہہ لمحات انج ای سن جیویں کسی چلدی مسافر بس دے ڈرائیور دی اکھاں اتے پٹی بنھ دتی گئی ہووے۔ اپریشن دے دوران موبائل دا چانن کسی نعمت توں گھٹ نہیں سی بالکل انج لگ رہیا سی جیویں انھیرے رستے وچ جگنو دی مدھم روشنی کسی بھٹکے ہوئے نوں رستہ وکھاندی اے۔ ڈاکٹراں نے انھیرے وچ مریض دی جان بچان دی کوشش کرن دے دوران ارباب اختیار دی توجہ دوان لئی ویڈیو بنا کے وائرل کردتی تے معاشرے دا اوہ کربناک پہلو سامنے لے آئے جہنوں سامنے لیان دی کوئی ڈاکٹر جرات نہیں کر سکیا۔ اکثر سرکاری ہسپتالاں دے اپریشن تھیٹراں تے وارڈاں وچ بجلی جان دی صورت وچ نہ کوئی یوپی ایس ہوندا اے تے نہ ای جنریٹر لئی پیٹرول لیکن ہسپتال دے افسران بالا دے کمریاں وچ جا کے ویکھو تے اوتھے بجلی دے جان دا پتہ ای نہیں لگدا کیوں جے اوتھے یو پی ایس تے جنریٹر تواتر دے نال چل رہے ہوندے نیں۔ وائرل ویڈیو جدوں نگران وزیراعلیٰ محسن نقوی تک پہنچی تے اوہناں نے فوری نوٹس لیندیاں ہسپتال دا ہنگامی دورہ کیتا تے اوتھے تن گھنٹے تک ہسپتال دی ساری صورتحال دا جائزہ لیندے رہے۔ ایس دوران اوہناں دے سامنے ہسپتال دی حالت زار تے ایسے پیچیدہ مسائل سامنے آئے کہ اوہ حیرت وچ گم ہو گئے تے ایہہ کہن تے مجبور ہوگئے کہ ’’میں درجناں ہسپتالاں دے دورہ کیتے لیکن سب توں بھیری تے بدترین حالت سروسز ہسپتال دی اے‘‘۔ نگران وزیراعلیٰ نے ہسپتال وچ تن گھنٹے لنگھان مگروں بہت سارے اقدامات کیتے جہناں وچ ہسپتال وچ پرانے میٹرس تے بیڈ دی تبدیلی‘ ڈائلسز یونٹ وچ زیرعلاج نوجوان مریض طلحہ دا کڈنی ٹرانسپلانٹ‘ مریضاں نوں معیاری علاج معالجہ دی فراہمی‘ ہسپتال دے ماسٹر پلان دی تیاری ‘ لہور پارکنگ کمیٹی نوں ہسپتال دی پارکنگ دا نظام سنبھالن‘ اوورچارجنگ تے پارکنگ ٹھیکہ دی منسوخی‘ اے سی دی دیکھ بھال کرن والے کنٹریکٹرز نوں ادائیگیاں نہ کرن تے ڈائریکٹر فنانس نوں عہدے توں ہٹان تے نویں ایمرجنسی نوں ست دناں وچ فنکشن کرن جئے اقدامات دی ہدایات جاری کیتیاں۔ نگران وزیراعلیٰ نے میڈیا دے سامنے ایس عزم دا وی اظہار کیتا کہ چاہے اوہناں نوں ہر دن آنا پووے اوہ ہسپتال دی حالت نوں بہتر بنا کے رہن گے۔ نگران وزیراعلیٰ دے ایکشن تے عوام خصوصاً ہسپتال وچ داخل مریضاں نے اوہناں دا شکریہ ادا کردیاں مسرت دا اظہار کیتا اے۔ ایس توں پہلاں وی نگران وزیراعلیٰ محسن نقوی آئے دن سرکاری ہسپتالاں دا دورہ کر کے مریضاں نوں دتی جان والی طبی سہولتاں دا جائزہ لیندے رہندے نیں۔ جدوں اوہ حج توں واپس آئے سن تے سب توں پہلاں گنگارام ہسپتال لہور دا دورہ کیتا تے ہسپتال وچ داخل مریضاں دا احوال دریافت کیتا سی۔ نگران وزیراعلیٰ دے ہسپتالاں دے ہنگامی دوریاں توں باخبر رہن دے باوجود لہور دے اک وڈے سرکاری ہسپتال وچ ایسا واقعہ پیش آنا لمحہ فکریہ اے۔ اخباراں وچ آئے دن ایہہ خبراں تے آندی رہندیاں سن کہ سرکاری ہسپتالاں دے وارڈاں وچ بارشی پانی بھر گیا تے مریضاں دے بستر پانی وچ تیرن لگ گئے لیکن اپریشن دے دوران بجلی دا چلے جانا تے ڈاکٹراں دا انج انھیرے وچ اپریشن جاری رکھنا بڑی تشویش دی گل اے۔ ہر سال پنجاب دے بجٹ وچ اک بہت وڈی رقم صحت دے شعبے لئی مختص کیتی جاندی اے لیکن ایس رقم توں مریضاں نوں فیدہ ہو رہیا اے یا نہیں ؟ ایس سوال دا جواب وی شاید پنجاب دی نگران حکومت نوں تلاش کرنا ہووے گا؟