سیاست اُتے چھائے بے یقینی دے بدل !

ایس ملک نوں بنے سالہا سال لنگھ گئے۔ کنی ای رتاں بدل گئیاں
لیکن حکمراناں دے بیان تے دعوے نہیں بدلے

شاہد ندیم

ایس ملک نوں بنے سالہا سال لنگھ گئے۔ کنی ای رتاں بدل گئیاں لیکن حکمراناں دے بیان تے دعوے نہیں بدلے۔ اوہو پرانے بیانات تے دعوے دہرائے جارہے نیں۔ اوہو پرانے سفنے ویچے جا رہے نیں۔ ایہہ سفنا ویچن والے واریاں لا کے اپنا شوق حکمرانی تے پورا کر رہے نیں لیکن عوام نوں وکھائے سفنیاں دی تعبیر دور تک کدھرے وکھائی نہیں دے رہی اے۔ ایہدے باوجود وزیراعظم دا کہنا اے کہ جے سانوں عوام نے موقع دتا تے ملک و عوام دی تقدیربدل دیاں گے۔ ایہہ تقدیر بدلن والے حکمراناں دے کمالات دا ای اعجاز اے کہ عام بندے نوں اک ویلے دی روٹی پوری کرن دے لالے پئے نیں تے اوہ بھکے خودکشیاں کرن تے مجبور ہو رہے نیں۔
عوام آئے دن روز ودھدی مہنگائی دے ہتھوں پریشان حال اے۔ لیکن حکمراناں نوں عوام دے مسائل دے تدارک دے بجائے نگراں سیٹ اپ دی پریشانی کھائے جا رہی اے۔ ایس حکومت دی خواہش اے کہ نگراں حکومت نہ صرف اوہناں دی منشا دے مطابق بنے بلکہ بااختیار وی ہونی چاہیدی اے۔ ایہدے لئی جتھے قنون سازی کیتی جا رہی اے اوتھے اپنے من پسند نگراں سیٹ اپ بارے اظہار خیال وی کیتا جا رہیا اے۔ نگران وزیراعظم لئی اسحاق ڈار دا نام زوروشور نال زیر گردش اے۔ ایس توں قطر نظر کہ ایہہ زیر گردش نام کدوں حقیقت دا روپ دھاردا اے ایہہ سوال ہر ذہن وچ اٹھ رہیا اے کہ اک ایسے شخص دے نام اتے غور وی کیویں کیتا جا سکدا اے جو کہ نہ صرف اک سیاسی جماعت دا باقاعدہ عہدیدار اے بلکہ ایس حکومت وچ وزیر خزانہ دے منصب اتے وی فائز اے۔
ایس ملک وچ کدی کجھ وی ہو سکدا اے۔ جے ایس ملک وچ کل دے کرپٹ اج دے حکمران تے کل دے ایماندار اج دے بے ایمان ہو سکدے نیں تے ایس حکومت دے وزیر خزانہ نگران وزیراعظم وی بن سکدے نیں۔ ایس ویلے جو کجھ وی ہو رہیا اے اوہدی ماضی وچ کوئی مثال نہیں ملدی۔ ایس ملک دے آئین تے قنون نوں موم دی نک بنا دتا گیا اے کہ جہنوں اپنی منشا دے مطابق بآسانی جدھر چاہو موڑیا جا رہیا اے۔ معاشی بحالی و استحکام دے نام تے اک ایسا پتلی تماشا لگیا اے کہ جہدے وچ اتحادی ہوس اقتدار دے لالچ وچ ان ویکھے ہتھ دے اشاریاں اتے نچے چلے جا رہے نیں‘ ایہہ بھل رہے نیں کہ ڈوریاں ٹٹ سکدیاں نیں۔ ان دیکھے ہتھاں کولوں چھٹ وی سکدیاں نیں۔ لیکن ایہہ اوہناںساری گلاں توں بے پرواہ نچن وچ ایسے مگن نیں کہ اوہناں نوں کجھ سجھائی ای نہیں دے رہیا اے۔اتحادی خوش نیں کہ طاقتور حلقیاں دے نال رہندے ہوئے آئندہ اقتدار وی اوہناں دا ای اے ایس لئی اپنے مخالفاں نوں نہ صرف کھلے عام کندھ نال لایا جا رہیا اے بلکہ سیاسی میدان توں ای باہر کیتا جا رہیا اے ایہدے لئی سارے ناجائز ہتھ کنڈے استعمال کیتے جا رہے نیں۔ ایس ملک وچ پہلی واری ایسا سیاسی ڈرامہ رچایا گیا اے کہ اک شخص جیل توں رہیا ہوندا اے‘ پریس کلب پہنچدا اے تے اوتھے پریس کانفرنس نال خطاب کردیاں اپنی پارٹی چھڈن دا اعلان کر دیندا اے۔ جے اوہ انج نہیں کردا تے اوہنوں باربار پابند سلاسل کیتا جا رہیا اے۔ ایہہ سب کجھ ساریاں دے سامنے ہو رہیا اے تے سارے ای بے بس وکھائی دے رہے نیں۔ایہہ کون کروا رہیا اے تے کون کر رہیا اے‘ایہہ سب جاندے نیں لیکن کوئی روکن والا ہے نہ ای ٹوکن والا کیوں جے اوہناں دا نام اتے زبان تے ہتھ سڑدے نیں۔
پوری قوم ای کھلی اکھاں نال سارا ڈرامہ ویکھ رہی اے۔ اوہ وی جاندی اے کہ ایہہ کون لوک سارا ڈرامہ کر رہے نیں لیکن ماسوائے سوشل میڈیا تے احتجاج دے کجھ وی نہیں کر پا رہے۔ ایہہ ایس ویلے احتجاج دا سب توں مہذب تے محفوظ طریقہ ای وکھائی دیندا اے۔ایس توں پہلاں عوامی احتجاج اتے حکومت نے عوام دے نال جو کجھ روا رکھیا ساری دنیا نے ویکھیا اے تے ہن پچھلے وزیراعلیٰ پنجاب چودھری پرویزالٰہی توں لے کے عمر سرفراز چیمہ تک تے ڈاکٹر یاسمین راشد توں لے کے خدیجہ شاہ سنے دوجی زنانیاں دے نال جو سلوک روا رکھیا جا رہیا اے اوہ بہت زیادہ افسوسناک تے حیرت انگیز اے۔ اتحادی قیادت نوں یاد رکھنا چاہیدا اے کہ اوہ اج جو کجھ بو رہے نیں اوہناں نوں کل سود سنے وڈنا وی پووے گا۔
ایہدے وچ کوئی دو رائے نہیں کہ حکمران اتحاد جنا اپنے مخالفاں دے خلاف انتقامی کارروائیا ں کر رہے نیں اوہناں ای اوہناںدی مقبولیت وچ وادھا ہو رہیا اے۔ اوہدی بنیادی وجہ ایہہ اے کہ مقتدرہ جہناں تیرہ جماعتاں اتے مشتمل سیاسی ٹولے دی حمایت کر رہی اے۔ اوہدی فرد عمل وچ کرپشن‘ لٹ مار تے نااہلی دے سوا کجھ وی نہیں اے۔ ایہہ اپنے دوراقتدار وچ مقدمیاں توں بچ تے سکدے نیں لیکن اپنی ساکھ بحال کر سکدے نیں نہ ای عوام دااعتماد حاصل کر سکدے نیں۔ ایہہ ٹولہ عوام نوں مایوسیاں دے علاوہ کجھ دے پایا نہ ای عوام اوہناں کولوں کوئی امید لائے بیٹھے نیں ایس لئی فیصلہ سازاں نوں فیصلہ سازی وچ عوام دی خواہشاں دا وی خیال رکھنا چاہیدا اے۔ جے عوام نوں اک واری فیر فیصلہ سازی وچ نظرانداز کیتا گیا تے ایس اتحادی حکومت دے ای تسلسل نوں نگراں سیٹ اپ وچ وی جاری رکھیا گیا تے اوہدے نتائج کدی چنگے نہیں نکلن گے۔ ایہدے خلاف جتھے عوام دا ردعمل آوے گا اوتھے ملک دے سیاسی تے اقتصادی مستقبل اتے بے یقینی دے بدل ایسے ای چھائے رہن گے۔