الیکشن دی تیاری

قومی سنے چار وچوں دو صوبائی اسمبلیاں دی آئینی مدت 12اگست 2023 نوں پوری ہو ن جا رہی اے

اُچیچی لکھت

قومی سنے چار وچوں دو صوبائی اسمبلیاں دی آئینی مدت 12اگست 2023 نوں پوری ہو ن جا رہی اے۔ ایس صورت وچ پارلیمانی کیلنڈر دے مطابق 12اکتوبر تک تے جے قبل از وقت اوہناں نوں تحلیل کر دتا جاندا اے تے 90دن وچ عام انتخابات دا انعقاد ضروری اے۔ آئین دے آرٹیکل (1)224 دے تحت ایس مدت وچ وادھا ایس صورت وچ ممکن اے کہ اسمبلیاں مدت پوری ہون توں پہلاں تحلیل کردتیاں جان۔ مجموعی صورتحال دے تناظر وچ الیکشن کمیشن آف پاکستان (ای سی پی) دے سیکرٹری عمر حمید خان دی جمعرات نوں منعقدہ پریس کانفرنس توں عوامی تے سیاسی حلقیاں وچ پائے جان والے شکوک و شبہات دور ہو جانے چاہیدے نیں جہدے وچ واضح کیتا گیا اے کہ اسمبلیاں چاہے ویلے تے یا ایس توں پہلے تحلیل ہون‘ انتخابات دی تیاری مکمل اے تے ایہہ پرانی مردم شماری دے مطابق ہون گے۔ قبل ازیں وفاقی وزیر داخلہ رانا ثنا اللہ وی ایہہ گل واضح کر چکے نیں کہ جے اسمبلیاں دی تحلیل دے دن تک مردم شماری نوں نوٹیفائی نہ کیتا گیا تے الیکشن کمیشن اتے لازم اے کہ اوہ انتخابات دا پربندھ پرانی فہرستاں دی بنیاد اتے کروائے۔ وزیر داخلہ نے اسمبلیاں دی تحلیل مگروں نگران سیٹ اپ دے حوالے نال کہیا کہ وزیراعظم ایہدے اتے کم کر رہے نیں جہناں ناماں اتے اوہ متفق نیں اوہدے اتے لیڈر آف اپوزیشن تے اتحادیاں نال مشاورت کراں گے تے ایہہ عمل ہفتہ دس دن وچ مکمل ہو جاوے گا۔ سیکرٹری الیکشن کمیشن دا کہنا اے کہ جے مردم شماری دی منظوری مشترکہ مفادات کونسل توں ہو جاندی اے تے نویں حلقہ بندیاں لئی چار توں ساڈے چار مہینے درکار ہون گے۔چیتا رہوے کہ قومی ادارہ شماریات ولوں کیتی جان والی ملک دی ڈیجیٹل مردم شماری مئی 2023دے جاری کردہ ابتدائی نتائج وچ انکشاف کیتا گیا سی کہ ملک دی آبادی 24کروڑ 95لکھ توں تجاوز کر چکی اے۔ تاہم ایم کیو ایم‘ پی ٹی آئی تے جماعت اسلامی نے اوہناں اتے اعتراض کیتا سی جہدا بروقت دور کیتا جانا ضروری اے۔ تاہم ایہہ یاد رہوے کہ ملک دا آئین جمہوری عمل دا ضامن ہوندا اے جہدی پاسداری سارے قومی اداریاں اتے لازم اے۔ ایہدے باوجود لوکاں وچ پایا جان والا ایہہ خدشہ کہ جے الیکشن کمیشن 60یا 90دناں وچ انتخابات کروان وچ نکام رہیا تے ایس صورت وچ کیہ ہووے گا۔ ایہہ محض ملک وچ بے چینی ویکھن دے شوقین تے غیر جمہوری سوچ رکھن والے منفی عناصر دا پروپیگنڈاہ ہو سکدا اے۔ وزیراعظم شہباز شریف اپنے نشری تے عوامی اجتماعات نال خطاب وچ آئینی مدت دے اندر آئندہ ماہ اپنی حکومت دی برخاستگی دا اعلان کر چکے نیں جد کہ سیکرٹری الیکشن کمیشن دی متذکرہ پریس کانفرنس ایہدے اتے مہر تصدیق ثبت اے۔ جمعرات دے دن اقتصادی رابطہ کمیٹی نے عام انتخابات لئی 42ارب 528کروڑ روپے مختص کرن دی منظوری دتی جہدے مگروں وفاقی کابینہ ایہدی توثیق کرے گی۔ انتخابی اصلاحات لئی قائم خصوصی پارلیمانی کمیٹی نے مجوزہ ترامیم نوں حتمی شکل دے دتی اے جہدی منظوری قومی اسمبلی تے سینیٹ توں لیتی جاوے گی۔ ایہدے مطابق حلقہ بندیاں رجسٹرڈ ووٹراں دی مساوی تعداد اتے کیتی جان گئیاں جدکہ اوورسیز پاکستانیاں لئی ووٹنگ دی سہولت دا مینڈیٹ الیکشن کمیشن نوں تفویض کرن دی تجویز اے۔ بروقت‘ غیر جانبدار تے شفاف انتخابات دا انعقاد جمہوری نظام دا سب توں بنیادی تقاضا اے۔ ایس حوالے نال حالیہ دناں وچ پائے جان والے شکوک و شبہات دا ہونانویں گل نہیں بلکہ ایہہ ایس توں پہلاں وی پچھلی دو دہائیاں وچ ہون والے انتخابات وچ سامنے آ چکی اے جہدی وڈی وجہ غیر جمہوری دور وچ پروان چڑھن والی روایت اے جہڑی ہن دم توڑ چکی اے البتہ ویلا دا تقاضا اے کہ سارے حلقے اپنے اندر مثبت جمہوری سوچ پیدا کرن۔