ڈاکٹر ضیا القیوم نوں روک لوو

ڈاکٹر صغرا صدف

قوماں دی ترقی اک لمے سماجی‘ سیاسی تے ثقافتی شعوری سفر دی مانگ کردی اے۔ ایہناں ساریاں دی کنجی‘ بنیاد تے شروعات تعلیم اے تسیں گھر بہہ کے ان گنت کتاباں پڑھو‘ امتحان وچ اعلیٰ ڈگریاں حاصل کرو‘ تہاڈی سوچ وچ جو وسعت‘ نظریاتی سوجھ بوجھ تے تفہیم یونیورسٹی دا احاطہ دیندا اے اوہدا کوئی نعم البدل نہیں۔ ایہ شخصیت سازی دا دور ہوندا اے نصابی تے غیر نصابی سرگرمیاں حالاں کہ پورا ماحول انسان دے اندر دیاں صلاحیتاں نوں اجاگر کرن وچ معاون ہوندا اے۔ ایتھے جو کجھ سکھیا جاندا اے تے زندگی دا جو رخ وکھایا جاندا اے یاں جس رخ دی تربیت کیتی جاندی اے اوہو ساری عمر نال چلدا اے۔ بندے تے ملک و قوم دا وسیع تر مفاد یونیورسٹیاں دی چار دیواری نال جڑن پاروں اوہناں دے ناظم دی حیثیت‘ قابلیت‘ سماجی و تعلیمی شعور بڑی اہمیت رکھدا اے۔ میرٹ بناندے ہوئے تسیں صرف نمبر ویکھ کے فیصلہ نہیں کر سکدے۔ قائدانہ صلاحیتاں تے مسئلیاں دی سوجھ بوجھ‘ نویں دور دے تقاضیاں دی تفہیم‘ چیلنجاں دا سامنا‘ اوکڑاں دا رونا رون دی تھاں حل لبھن دی حکمت عملی رکھنا بہوں ضروری اے۔ چنگی شخصیت دے نال فکری دانش تے تدبر دی حامل وائس چانسلرز یونیورسٹیاں نوں حقیقی معنیاں وچ دانش گاہ بنا دیندے نیں۔
پچھلے دیہاڑیاں پاکستان وچ وکھووکھ یونیورسٹیاں وچ انقلابی تبدیلیاں دے امام ڈاکٹر ضیاالقیوم نال لمی نشست دا موقع ملیا۔ ڈاکٹر ضیاالقیوم دے یونیورسی آف گجرات دے وائس چانسلری دے دور وچ مینوں ایتھوں دیاں کئی کمیٹیاں تے علمی‘ ادبی تے فکری پروگرام وچ شرکت دا موقع ملیا۔ ہر پروگرام وچ اوہناں دی مثبت تے تعمیری سوچ نے بڑا متاثر کیتا۔ اوہناں نے چار ورھے وچ یونیورسٹی آف گجرات نوں عروج ول لے جان وچ جو وی تدبیر کیتی اللہ نے اوہناں نوں کامیاب کیتا۔ میں ہمیشہ اوہناں نو ںجذباتی مقرر دی بجائے زیرک تے مدبر منتظم پایا جو زمانے دی نبض نوں محسوس کرکے پالیسیاں بناندا تے ناقدین دی اکھاں وچ اکھاں پا کے قائل کرن دا ہنر رکھدا اے۔ تن عشریاں توں پاکستان دے اعلیٰ تعلیمی اداریاں نال وابستہ رہن دی وجہ نال ہن جامعات دی اندرونی تے بیرونی ساریاں بیماریاں دی تشخیص دا ماہر ہو چکیا اے۔ جے اوہدے سفر دیاں کجھ کامیابیاں اجاگر کیتیاں جان تے ہمدرد یونیورسٹی فیصل آباد کیمپس دی تشکیل وچ مڈھلا کردار نبھایا‘ فاسٹ نیشنل یونیورسٹی دے فیصل آباد چنیوٹ کیمپس دے تصور توں تعبیر تک راہبری کردے ہوئے عمدگی تے ریکارڈ مدت وچ کیمپس نوں تکمیل دے مرحلے چوں گزار کے کامیابی دے جس سفر تے پایا اوہ اک مثال اے۔ اوہناں دیاں صلاحیتاں دی خوشبو پھیلی تے 2014ء وچ وزیراعلیٰ پنجاب میاں شہبازشریف نے اوہناں نوں اک نویں تے بہت سارے امکانات دی راہ ویکھدی جامعہ‘ یونیورسٹی آف گجرات دی سربراہی دا فریضہ دتا‘ گجرات دی مشکل سیاسی تے معاشرتی فضا وچ وڈے معرکے سرانجام دینا اک وڈا چیلنج سی جہنوں ڈاکٹر ضیا نے اپنی فہم و فراست تے سچی لگن نال ممکن بنایا تے یونیورسٹی نوں کسے گروپ دے تسلط تو ںبچا کے آزادانہ ماحول بنائی رکھیا۔ فیر ویلے نے ویکھیا تے لکھیا کہ اک نویں جامعہ جدید تدریسی معیار نوں اپنا کے درس گاہ توں دانش گاہ ول سفر دا مڈھ بنھ چکی اے۔
پنجاب دی گواہی نے اوہناں نوں مرکز وچ خدمت دا موقع دتا۔ 2018ء وچ اسلام آباد وچ موجود پورے ملک دی تعلیم نال جڑی اعلیٰ پر فکری جمود‘ انتظامی بحران تے مالیاتی مسئلیاں دی شکار فاصلاتی نظام دی پرچارک‘ علامہ اقبال اوپن یونیورسٹی نوں جدید جامعہ وچ بدلن دا ٹاسک دتا گیا تے چار ورھیاں وچ دیانتداری تے شفافیت پاروں ادارے دی آمدنی وچ ارباں روپیے دا وادھا کیتا۔ مالی استحکام نال اصلاحات دی کامیابی دے ثمرات دا عکس یونیورسٹی دے درودیوار توں جھلکن لگا۔ میرٹ تے داخلے تے بھرتیاں کرکے ادارے دی ساکھ بحال کیتی۔ لکھاں دی گنتی وچ داخلیاں دے نال نال ریسورس مینجمنٹ‘ فکری مکالمے دی فضا‘ عالمی معیار دی کانفرنسز‘ سیمینارز‘ سیرت چیئر‘ اقبالیات دا فروغ‘ تریخی شعور تے مکالمے ورگے انقلابی پروگرام شروع ہوئے۔ ڈاکٹر صاحب نے مینوں دسیا کہ اوہناں نوں بیرون ملک توں کئی جامعات ولوں آفرز نیں شاید اوہ کوئی قبول وی کر لین کہ کم کرن والا بندہ زیادہ دیر فارغ نہیں بہہ سکدا پر اپنے ملک دی ترقی نال محبت دا تقاضا اے کہ قابل‘ دیانتدار تے ساریاں نوں نال لے کے چلن والیاں نوں ملک چوں باہر نہیں ملک دے اندر خدمت دا موقع دتا جاوے۔٭