یوم استحصالِ کشمیر تے ساڈا میڈیا

صفِ اول دے ایڈورٹائزر انعام اکبر نے اہل کشمیر دابھرپور مقدمہ لڑیا اے

علی بابر

اک واری فیر 5 اگست نوں سیاہ ترین دن اپنی پوری سفاکی تے بربریت دے نال ساڈے احساسات دے در کھٹکھٹا رہیا اے۔ جنت نظیر وادی نوں دنیا دی سب توں وڈی جیل بنے چار لمے سال لنگھ گئے نیں تے ایہناں چار سالاں وچ بھارت نے کشمیر نوں اوہدے باسیاں دے لہو نال غسل دتا اے۔ کشمیریاں دے درد‘ اذیت تے تکلیف نوں ہن تے لفظاں دا پیرہن دنیا وی بڑا اوکھا اے۔ 5 اگست 2019 نوں جدوں بھارتی آئین دے آرٹیکل 373تے 35اے دی دفعات نوں منسوخ کر کے مقبوضہ کشمیر دی خصوصی حیثیت نوں ختم کیتا گیا تے اوہدے مگروں حسن‘ خشبو تے جھرناں دے وادی بارو ددی بوتھلے دب گئی۔ اوہدی دل کشی گھٹن وچ بدل گئی۔ انڈین فوج دی جارحیت ہزاراں بے گناہ کشمیریاں نوں نگل گئی۔ طویل کرفیو وچ اپنے گھراں وچ محصور بے بس کشمیریاں لئی امید دی واحد کرن پاکستانی عوام دی محبت تے حکومت دی اخلاقی حمایت سی۔ بانی پاکستان نے کشمیر نوں پاکستان دی شہ رگ قرار دتا سی تے اوہدے وچ کوئی شک نہیں کہ کشمیری ساڈے دلاں دی دھڑکن وچ بسے ہوئے نیں۔ پاکستان نے 1939 توں لے کے ہن تک اپنی کامیاب سفارتکاری توں کشمیر دے مسئلہ نوں زندہ رکھیا اے۔ کشمیر دی خصوصی حیثیت دے خاتمہ مگروں پاکستان نے جس شدید ردعمل دا اظہار کیتا تے ایس مودی حکومت دے ایس منحوس فیصلے خلاف جیویں کشمیری بھین بھراواں نال یکجہتی دا اظہار کیتا اوہ تریخ ساز اے۔ مینوں خوشی ایہہ اے کہ صرف حکومتی سطح اتے وی نہیں بلکہ لوکاں نے انفرادی سطح تے کشمیریاں دی اخلاقی حمایت وچ گراں قدر خدمات سرانجام دتیاں۔ مینوں چنگی طرحاں چیتا اے کہ جدوں انڈین میڈیا اک مخصوص ایجنڈے تے مودی دے ایس اقدام نوں کشمیر دی فتح قرار دے رہیا سی تے دنیا دی اکھاں وچ دھول جھونکن لئی خصوصی حیثیت دے خاتمے نوں کشمیر وچ تعمیرو ترقی دے نویں دورتوں تعمیر کر رہیا سی۔ اک طاقتور تے پراثر آواز نے پوری دنیا وچ بھارتی مکروہ پروپیگنڈے دے پرخچے اڈا دتے تے اصلی حقیقت کھول کے دنیا دے سامنے رکھ دتی۔ ایہہ طاقتور آواز پاکستان دی ممتاز ایڈورٹائزنگ کمپنی میڈاس اوہدی سی جہدے مالک انعام اکبر نے عالمی سطح تے اک پراثر مہم دا آغاز کیتا اوہناں نے واضح کیتا کہ دنیا وچ سب توں قیمتی چیز شناخت اے۔ کسی دی شناخت نوں کھو کے احساسات نوں روند کے ثقافت نوں مسخ کر کے اک قبرستان بنایا جا سکدا اے تے مودی حکومت دل کش ترغیبات دے سنہری دھاگیاں توں دنیا دی اکھاں وچ مٹی پا کے کشمیر نوں دفن کررہی اے۔ میڈاس نامی ایس کمپنی نے کشمیر نال اپنی محبت دا عملی اظہار کیتا اوہناں نے عالمی میڈیا وچ انڈین پروپیگنڈے نوں چاروں شانے چت کیتا۔ میں جاننا واں کہ عالمی نشریاتی اداریاں وچ انڈین لابی کنی مضبوط اے تے ایہناں اداریاں دے مالی مفاد وی جدوں انڈیا نال جڑے ہون تے میڈیا دے محاذ تے ایس منتظم مافیا دا پچھاڑنا جوئے شیر لیان دے مترادف اے لیکن انعام اکبر دے جنون نے ساری مشکلاں نوں ڈھیر کر کے پرنٹ‘ الیکٹرانک‘ ڈیجیٹل حتیٰ کہ سوشل میڈیا وچ وی بھارت نوں دھول چٹا دتی میڈاس دی موثر میڈیا مہم نے کشمیری عقوبت خانیاں وچ گونجن والی چیخاں نوں اقوام متحدہ دے اجلاس تک پہنچا دتا۔ مظلوم کشمیریاں دی اصل تے تکلیف دہ تصویر نے اقوام عالم نوں جھنجھوڑ کے رکھ دتا۔ ہندوستان دے کریہہ تے ہیبت ناک چہرے نوں پہلی واری دنیا نے ویکھیا تے عرصہ دراز توں کشمیر دی اوہ مٹھی بھر قیادت جو ہندوستان دی ہاں وچ ہاں ملاندی سی اوہ وی مظلوم کشمیریاں نال کھڑی ہو گئی۔ عبداللہ تے محبوبہ مفتی جئی انڈین نواز سیاسی قائدین دے ایہہ جملے کہ اسیں ہمیشہ توں غلطی تے سی تے جہناں اپنے نوجواناں نوں اسیں بھٹکے ہوئے قرار دینے سن۔ وقت نے ثابت کیتا کہ اوہ درست سن۔ تریخ دا حصہ بن چکے نیں۔ میرا ایمان اے کہ چھیتی یا بدیر ظلم دی کالی رات ختم ہووے گی۔ آزادی دا سویرا کشمیریاں دی دہلیز نوں چومے گامورخ جدوں تریخ رقم کرن لگے گا۔ انعام اکبر نامی ایس گمنام مجاہد نوں فراموش نہیں کر پاوے گا جہنے تن تنہا میڈیا دے محاذ تے ہندوستان نوں عالمی سطح اتے ناک رگڑوا دتی۔