سیاسی محول گرم، عبدالعلیم خان نے ترین گروپ وچ شامل ہون دا اعلان کر دتا

لہور( پنجابی میڈیا گروپ) پاکستان تحریک انصاف ( پی ٹی آئی) دے سینئر رہنما تے سابق صوبائی وزیر عبدالعلیم خان نے ترین گروپ وچ شامل ہون دا اعلان کر دتا ۔ حکومت دے خلاف اپوزیشن دی تحریک عدم اعتماد آن توں پہلاں تحریک انصاف دے رہنما جہانگیر ترین دی رہائش گاہ اُتے ترین گروپ دے رہنماواں دے نال نال علیم خان دی اہم ملاقات ہوئی، جس وچ موجودہ سیاسی صورتحال دے حوالے نال لائحہ عمل کیتا گیا۔ذرائع دے مطابق علیم خان دی پچھلے3 دن وچ 40 توں ودھ ارکان صوبائی اسمبلی نال ملاقات ہوئی تے اوہ ہم خیال گروپ نال ملن جہانگیر ترین دی رہائش گاہ اُپڑے جیتھے اوہناں دی ویڈیو لنک دے ذریعے جہانگیر ترین نال گل بات ہوئی۔یاد رہے کہ جہانگیر ترین اج کل علاج لئی لندن موجود نیں ۔ جہانگیر ترین دی رہائش گاہ اُتے اپڑن والے اراکاناں اسمبلی وچ نعمان لنگڑیال، خرم لغاری، عبدالحئی دستی، لالا طاہر رندھاوا، اجمل چیمہ، عون چودھری، سلمان نعیم، لالہ طاہر رندھاوا، نعمان لنگڑیال، خرم لغاری، اسلم بھروانہ، آصف نکئی سعید نوانی، زوار حیسن، بلال ورڑائچ، افتخار گوندل، امین چودھری ، غلام سنگھا تے قاسم لنگا شامل سن۔ملاقات توں پہلاں وزیر پنجاب دے سابق مشیر نال صحافیاں نے سوال کیتا کہ عون چودھری صاحب کیہ ہون جارہیا اے؟اوس اُتے اوہناں نے جواب دتا کہ اجے کجھ دس نہیں سکدا، تھوڑا جیا سسپنس رہن دیو، جو ہوئے گا بہتر ہوئے گا، دعا کرو