دُوجیاں جماعتاں نوں توڑن والے دی اپنی جماعت ٹُٹ رہی اے: مریم

لہور( پنجابی میڈیا گروپ) پاکستان مسلم لیگ ن دی نائب صدر مریم نواز نے وزیراعظم عمران خان اُتے تنقید کردیاں ہویاں آکھیا اے کہ ریاستی طاقت استعمال کر کے دُوجیاں جماعتاں نوں توڑن دی کوشش کرن والے دااک اک لمحہ اراکاناں دیاں منتاں کرن وچ لنگ رہیا اے۔سماجی رابطے دی ویب سائٹ ٹویٹر اُتے اپنے سلسلہ وار ٹویٹ کر دیاں ہویاں مسلم لیگ ن دی نائب صدر نے آکھیا کہ کل کیہ ہوئے گا ایہ صرف اللہ تعالی دی ذات جاندی اے مگر عمران خان نال جو وی ہو رہیا اے اوہ مکافات عمل دے سوا کجھ نہیں۔ کرسی، طاقت دا غلط استعمال تے اوس نوں دائمی سمجھ لین والے دا انجام اینج ہی ہندا اے۔اوہناں نے آکھیا کہ سیاست وچ اتار چڑھا رہے نیں تے حکومت وی آنی جانی چیز اے مگر تکبر تے ظلم انسان اگے آندا اے۔نواز شریف صاحب اُتے ایہ اوہناں دی ذاتی و سیاسی زندگی دا شاید مشکل ترین ویلا سی مگر بدترین حالات دے باوجود اوہناں دا کوئی ساتھی اوہناں نوں چھڈ کے نہیں گیا۔ کیونکہ اوہناں نے ہر کسی نوں عزت دتی ۔ اپنے مخالف تے دشمن نوں وی۔