وزیراعظم دی زیر صدارت اجلاس،نیشنل اکنامک کونسل تشکیل دین دا فیصلہ

اسلام آباد( پنجابی میڈیا گروپ)وزیراعظم دی زیرصدارت معاشی ماہرین داہنگامی اجلاس ہویا،شہباز شریف نے قومی بیلنس شیٹ دے حقائق توں آگاہی حاصل کیتی،اجلاس وچ ملک نوں درپیش سنگین معاشی چیلنجاں اُتے تفصیلی سوچ وچار،نیشنل اکنامک کونسل تشکیل دین دا فیصلہ کیتا گیا۔ وزیراعظم دی زیرصدارت معاشی ماہرین دے اجلاس دا انعقاد کیتا گیا،اجلاس وچ شہباز شریف نے معاشی بہتری لئی تجویز تیار کرن دی ہدایت کردیاں ہویاں آکھیا کہ زراعت،صنعت،سرمایہ کاری،بینکاری دے شعبہ وچ تجویزاں دتیاں جان،تاجر و کاروباری برادری سنے سارے متعلقہ طبقیاں دی آرا وچ تجویزاں مرتب کتیاں جان۔اجلاس دے جاری کردہ اعلامیہ دے مطابق وزیر اعظم نے تجویزاں لئی آئندہ کجھ دناں وچ سمٹ منعقد کرن،نیشنل اکنامک کونسل تشکیل دین دا وی فیصلہ کیتا۔اجلاس وچ شہباز شریف نے آکھیا کہ کونسل غیرجانبدار تے ممتاز معاشی ماہریناں اُتے مشتمل ہوئے گی،سنگین مالی خطریاں پاروں فوری،وسط تے طویل المدتی اہداف دا واضح تعین کرن،پالیسی آپشنزاُتے جامع سفارشاں پیش کرن تاکہ اوہناں دی روشنی وچ ٹھوس اقدام لئے جاسکن،عوام نوں ریلیف تے مہنگائی اُتے قابو پان دے حوالے نال وی جامع تجویزاں مرتب کیتیاں جان۔اوہناں نے رمضان بازاراں دی مانیٹرنگ تے ضرورت دیاں شیواں دیاں قیمتاں نوں فوری گھٹ کرن دی ہدایت کردیاں ہویاں آکھیا کہ قومی تے عوامی مفاداں دے درمیان بہترین توازن نال اگے ودھنا اے۔